Jeremías 34:1-22
34 Kunapachatï Babilonia markan Nabucodonosor* reyipasa, taqpach ejercitopasa, jupamp apnaqata oraqenkir taqe reinonakasa,* taqe markanakasa, Jerusalén contra taqe markanakap contra nuwasisipkäna ukapachaw Jehová Diosajj akham sasin Jeremiasar parläna:+
2 “Israelan naya Jehová Diosapajj akham sistwa: ‘Judá markan Sedequías+ reyipan ukar saram, juparojj akham sarakim: “Jehová Diosajj akham siwa: ‘Babilonia markan reyipan amparaparuw aka marka katuyaskta, jupasti aka mark ninampiw phichantani.+
3 Jumajj janiw jupan amparapat escapkätati, jumar katuntasajj juparuw katuyapjjätam.+ Babilonia markan reyipampejj ajanuy ajanuw uñkatasipjjäta, jupampiw parläta, Babilonia markar apatarakïyätawa’+ sasa.
4 Ukampirus Judá markan Sedequías reyipa, Jehová Diosan aka arunakap istʼam: ‘Jehová Diosajj jumjjat akham siwa: “Janiw espadamp jiwayatäkätati.
5 Jumajj sumakiw jiwjjäta,+ kunjamtï awkinakamäkäna uka jumat nayra utjir reyinakatak suma olorani qollanak nakhayapkänjja, uka kikparakiw jaqenakajj jumatak nakhayapjjani, ‘¡ay nanakan reyija!’ sasaw jumatjam jachapjjarakini. ‘Nayaw uka arunak arsta’ siw Jehová Diosajja”’”’”.
6 Jeremías profetajj Jerusalén markanwa taqe uka arunak Judá markan Sedequías reyipar parläna,
7 ukapachaw Babilonia markan reyipan ejercitopajj Jerusalén marka contra, Lakís+ ukhamarak Azecá+ markanak contra nuwasiskäna. Judá oraqen utjkäna uka markanakatjja,+ uka oraqenakakiw jachʼa perqanakamp muyuntat markanakat jan katuntatäkänti.
8 Sedequías reyejj Jerusalén markankir jaqenakampi mä pacto lurkäna uka qhepatwa Jehová Diosajj Jeremiasar parläna. Uka pactojj esclavonak antutañatakïnwa,+
9 taqenis hebreo esclavonakapar antutañapataki, chachäpansa warmïpansa, ukhamat jan khitis judío masipar esclavot serviyasiñapataki.
10 Taqpach principenakasa taqpach jaqenakasa ukarjamaw lurapjjäna. Jupanakajj esclavonakaparu esclavanakaparu antutañatakiw mä pacto lurapjjäna, ukhamat jupanakarojj jan jukʼamp esclavot serviyasiñataki. Jupanakajj istʼasipjjänwa, esclavonakaparojj khitjjapjjarakïnwa.
11 Ukampis qhepatjja, antutapkäna uka esclavonakaparusa esclavanakaparus wasitat kuttʼayanjjapjjäna, jupanakarojj wasitat esclavot servipjjañapatak obligapjjäna.
12 Ukatwa Jehová Diosajj Jeremiasar parläna, Jehová Diosajj akham sänwa:
13 “Israelan naya Jehová Diosapajj akham sistwa: ‘Kunapachatï nayra awkinakamarojj esclavöpkäna+ uka Egipto oraqet irpsunkayäta uka urunwa nayajj jupanakamp mä pacto lurayäta,+ akham sasa:
14 “Paqallqo maranak tukuyatarojja, jumanakat sapa mayniw hebreo jilanakamarojj esclavot serviyasiñatak alasipkta, sojjta maranak jumanakar servipkaraktam ukanakarojj antutjjapjjañama, jupanakarojj librew khitjjapjjañama”+ sasa. Ukampis nayra awkinakamajj janiw istʼapkitänti ni atencionampis istʼapkänti.
15 Jichhakiw* jumanakajj cambiapjjtajja, jaqe masimaru esclavöñat antutasajj kunatï naya nayraqatan cheqapäki uk lurapjjtajja. Ukatjja nayan sutij apki uka utanwa naya nayraqatan mä pacto lurapjjaraktajja.
16 Ukampis jumanakajj qheparuw kuttʼapjjtajja, kawkirutï sarañ munapkäna ukar sarapjjañapatak libre antutapkayäta ukanakar esclavota esclavata kuttʼayanisaw sutij jiskʼachapjjtajja,+ jupanakarusti esclavot servipjjañapatakiw mayamp obligapjjtajja’.
17 ”Naya Jehová Diosajj akham sistwa: ‘Jumanakajj libre antutañ toqet janiw istʼapkistati, janiw jilamarusa jaqe masimarusa esclavot libre antutapktati.+ Ukampis nayajj libre antutapjjäma’, sistwa naya Jehová Diosajja, ‘jumanakarojj espadampita, usumpita,* manqʼat pistʼañampit+ jiwapjjañamatakiw libre antutapjjäma, aka oraqenkir taqe reinonakatakejj* wali ajjsarkañaruw tukuyapjjäma.+
18 Khitinakatï naya nayraqatan mä pacto lurasajj mä torillo payar kharinoqapkäna, ukatsti uka pä chikat taypi pasapkäna,+ ukampis uka pacton arunakap jan phoqapkäna uka chachanakarojj akaw pasani,
19 Judá markan principenakaparu, Jerusalén markan principenakaparu, palacion trabajir jilïrinakaru, sacerdotenakaru, payar kharinoqat torillo taypi pasapkäna taqe aka oraqenkir jaqenakaru:
20 nayasti jupanakarojj enemigonakapan amparaparu, khitinakatï jupanakar jiwayañatak thaqapki ukanakan amparaparuw katuyäjja, jiwat cuerponakapjja aycha manqʼani jamachʼinakampi salvaje animalanakampiw manqʼapjjani.+
21 Judá markan Sedequías reyiparusa principenakaparusa, enemigonakapan amparaparu, jiwayañ munapki ukanakan amparaparu ukhamarak Babilonia markan ejercitopan amparaparuw katuyäjja,+ jupanakajj jumanak contra saytʼañatwa sarjjasipki’.+
22 ”‘Nayajj mä orden churäjja’, sistwa naya Jehová Diosajja, ‘ejercitonakarojj wasitat aka markar kuttʼayanëjja, jupanakasti aka marka contraw nuwasipjjani, katuntapjjaniwa, ninampiw phichantapjjarakini.+ Judá oraqen markanakaparojj chʼusak jaytäjja, jan khiti jakirini’”.+
Notanaka
^ Hebreo arunjja, “Nabucodorosor”. Uka sutejj qellqañanwa mayjtʼi.
^ Jan ukajja, “gobiernonakasa”.
^ Hebreo arunjja, “Jichhüruw”.
^ Hebreo arunjja, “pestempita”.
^ Jan ukajja, “gobiernonakatakejj”.
