Jeremías 38:1-28
38 Matán chachan Sefatías yoqapasa, Pasjur chachan Guedalías yoqapasa, Selemías chachan Jucal+ yoqapasa, Malkiya chachan Pasjur+ yoqapasa, kunanaktï Jeremiasajj akham sasin taqpach markar siskäna uka arunakwa istʼapjjäna:
2 “Jehová Diosajj akham siwa: ‘Aka markan quedasirejj espadampi, manqʼat pistʼañampi, usumpiw*+ jiwani. Ukampis khititejj caldeonakatak rendisjjani* ukajj jakaskakiniwa, vidap salvani,*+ janirakiw jiwkaniti’ sasa.
3 Jehová Diosajj akham siwa: ‘Aka markajj cheqpachapuniw Babilonia markan reyipan ejercitopar katuyatäni, jupasti aka markarojj katuntarakiniwa’+ sasa”.
4 Principenakajj akham sasaw Sedequías reyir sapjjäna: “Mirä amp suma, aka chachajj jiwayatäpan,+ uka arunak jupanakar parlasajj aka markan jiltʼir soldadonakarus taqpach markarus aynachtʼayaskiwa. Aka chachajj janiw aka markan sumankañap thaqkiti, jan ukasti jan waltʼäwin uñjasiñap muni” sasa.
5 Sedequías reyejj akham sänwa: “Kuntï jupar lurañ munapkta uk lurasipkakim, naya reyejj janiw jumanakar jarkʼañatakejj kuns lurkäti” sasa.
6 Ukatwa jupanakajj Jeremiasar katuntasajj reyin yoqapäkäna* uka Malkiya chachan uma estanquepar uchapjjäna, ukajj Guardianakan Patiopankänwa,+ Jeremiasarojj pitanakampiw* uka estanquer warkoqapjjäna. Uka estanquejj janiw umanïkänti, ñeqʼekiw utjäna, Jeremiasasti uka ñeqʼeruw chhaqaranttäna.
7 Reyin utapankir* eunucökäna* uka Ébed-Mélec+ sat etíope chachajja, Jeremiasarojj estanquer uchapjjatapwa yatïna. Reyisti Benjaminan Punkupan+ qontʼatäskänwa,
8 ukatwa Ébed-Mélec chachajj reyin utapat* mistusajj reyir akham säna:
9 “¡Jachʼa rey, kuntï uka chachanakajj Jeremías profetar lurapki ukajj jan walipuniwa! Jupanakajj estanqueruw jaqontapjje, ukanwa jupajj manqʼatjam jiwani, janirakiw kuna tʼantʼas markan utj-jjeti”+ sasa.
10 Ukatsti reyejj Ébed-Mélec sat etíope chacharojj akham sasaw ordenäna: “Jumamp chikajj 30 chachanak aka lugarat irpasim, Jeremías profetarojj janïr jiwkipan estanquet apsunjjam” sasa.
11 Ukatwa Ébed-Mélec chachajj uka chachanak jupamp chik irpjjarusisajj reyin utapar* saräna, wali valoraninak imañ uta aynachankir mä cuartoru.+ Jupanakajj uka cheqatwa thantha traponakampi jiskʼa merqʼe telanakampi apapjjäna, ukanaksti mä pitampiw* Jeremiasatak estanquer warkoqapjjäna.
12 Ébed-Mélec sat etíope chachajj akham sasaw Jeremiasar säna: “Mirä amp suma, traponaksa jiskʼa telanaksa uka pitanakar* ucham, ukatsti uka pitanak chheqanqaramar uchasirakim” sasa. Jeremiasajj ukhamwa luräna,
13 jupanakajj uka pitanakamp* jiysusaw estanquet apsupjjäna. Ukatsti Jeremiasajj Guardianakan Patiopankaskakïnwa.+
14 Sedequías reyejj Jehová Diosan utapankkäna uka kimsïri mantañ cheqaruw Jeremías profetar irptayanïna, reyejj akham sasaw Jeremiasar säna: “Jumarojj may jisktʼañ munsma. Jan nayarojj kuns imtʼistati” sasa.
15 Ukatjja Jeremiasajj akham sasaw Sedequías reyir säna: “Jumarutï sirismajja, jumajj cheqpachapuniw jiwayitasma. Jumarutï ewjjtʼirismajja, janiw istʼkitasmati” sasa.
16 Ukatwa Sedequías reyejj Jeremiasatakejj jamasat mä juramento luräna, akham sasa: “Kunjamtï Jehová Diosajj cheqpachapun jakkir Diosäki, juparak jakañ churkistojja, nayajj janiw jiwaykämati, janirakiw jumar jiwayañatak thaqasipktam uka chachanakarojj katuykämati” sasa.
17 Jeremiasajj akham sasaw Sedequías reyir säna: “Israelan Diosapäki ejercitonakan Diosapäkaraki uka Jehová Diosajj akham siwa: ‘Jumatï Babilonia markan reyipan principenakapatak rendisjjätajja,* jakaskakïtawa, aka markajj janiw ninamp phichantatäkaniti, jumasa utamankirinakasa jakasipkakïtawa.+
18 Ukampirus jumatï Babilonia markan reyipan principenakapatak jan rendiskätajja,* aka markajj caldeonakan amparapar katuyatäniwa, jupanakajj ninampiw phichantapjjani,+ jumajj janiw jupanakan amparapat escapkätati’+ sasa”.
19 Ukatsti Sedequías reyejj akham sasaw Jeremiasar säna: “Caldeonakan ukar sarjjapjje uka judionakaruw ajjsarta. Jupanakarutï katuyapjjetaspajja, jupanakajj tʼaqesiyapjjetaspawa” sasa.
20 Ukampis Jeremiasajj akham sänwa: “Jumajj janiw jupanakar katuyatäkätati. Mirä amp suma, kuntï nayajj sisksma ukarjamay Jehová Diosan arup istʼam. Ukhamatwa jumajj sumar saräta, jakaskakïtawa.
21 Ukampis jumatï jan rendiskätajja,* Jehová Diosajj kunas pasani uk akham uñjayitu:
22 Judá markan reyipan utapan* jiltʼapki taqe uka warminakajja, Babilonia markan reyipan principenakapan ukar apatäpjjaniwa.+ Warminakajj akham sapjjaniwa:
‘Jumajj confiykayäta uka chachanakajj* engañjapjjtamwa, atipjapjjaraktamwa.+
Jupanakajj ñeqʼeruw kayunakam chhaqaranttayapjjtam.
Jichhasti jupanakajj kuttʼasaw sarjjapjjaraki’ sasa.
23 Taqe warminakamarusa wawanakamarus caldeonakan ukaruw apapjjani, jumajj janiw jupanakan amparapat escapkätati, jan ukasti Babilonia markan reyipaw katuntätam,+ juma kawsajj ninampiw aka mark phichantapjjani”+ sasa.
24 Ukatsti Sedequiasajj akham sasaw Jeremiasar säna: “Juman jan jiwañamatakejj janiw khitis ukanak yatiñapäkiti.
25 Principenakatï jumampi parlataj yatipjjani, ukatsti juman ukar jutasajj ‘mirä amp suma, kuntï reyir siskta uk nanakar sapjjeta. Jan kuns imtʼapjjestati, nanakajj janiw jiwayapkämati.+ ¿Reyejj kamstamsa?’ sapjjätam ukhajja,
26 jupanakarojj akham sañamawa: ‘Nayajj Jehonatán chachan utapar jan kuttʼayatäñatakiw reyirojj mayiskayäta, ukhamat ukan jan jiwañataki’+ sasa”.
27 Tiempompejja taqe principenakaw Jeremiasan ukar jutasajj jisktʼapjjäna. Jeremiasasti kuntï reyejj jupan sañapatak siskäna taqe uka arunakwa jupanakar sarakïna. Ukhamajj janiw jupanakajj kunsa jupar sisjjapjjänti, kuntï jupanakajj parlapkäna uk jan khitin istʼatap layku.
28 Jerusalén markajj katuntatäkäna ukürkamaw Jeremiasajj Guardianakan Patiopankaskakïna.+ Jerusalén markajj katuntatäjjäna ukhas ukankaskakïnwa.+
Notanaka
^ Hebreo arunjja, “pestempiw”.
^ Hebreo arunjja, “caldeonakan ukar mistjjani”.
^ Jan ukajja, “vidapampiw escapani”.
^ Jupajj inas reyin utapankirinakat maynïchïna.
^ Variante: “kawuyanakampiw”.
^ Jan ukajja, “palaciopankir”.
^ Jan ukajja, “palaciopat”.
^ Variante: “kawuyampiw”.
^ Jan ukajja, “palaciopar”.
^ Variante: “kawuyanakar”.
^ Variante: “kawuyanakamp”.
^ Hebreo arunjja, “principenakapan ukar mistütajja”.
^ Hebreo arunjja, “principenakapan ukar jan mistkätajja”.
^ Hebreo arunjja, “jan mistkätajja”.
^ Jan ukajja, “Jumamp sumankir chachanakajj”.
^ Jan ukajja, “palaciopan”.
