Jeremías 7:1-34
7 Jehová Diosajj akham sasaw Jeremiasar säna:
2 “Jehová Diosan uta punkupan saytʼasim, ukatsti akham sasin yatiyarakim: ‘Jehová Diosan arunakap istʼapjjam, taqe Judá markan jakirinaka, khitinakatï Jehová Dios nayraqatan altʼasiñatak aka punku mantapkta ukanaka.
3 Israelan Diosapäki uka ejercitonakan Jehová Diosapajj akham siwa: “Thakinakamsa luratanakamsa cheqañchasipjjam, nayasti aka lugaran jakasipkakiñamatakiw jaytapjjäma.+
4 Jan jumanakajj kʼari arunakar confiyasajj akham sapjjamti: ‘¡Akajj* Jehová Diosan templopawa! ¡Jehová Diosan templopawa! ¡Jehová Diosan templopawa!’+ sasa.
5 Jumanakatï cheqpachans thakinakamsa luratanakamsa cheqañchasipjjäta, cheqas jumanakatï mä chachampin jaqe masipampin quejanakap cheqaparjam uñjapjjäta,+
6 jumanakatï extranjero jaqenakarusa, wajchanakarusa,* viudanakarus jan tʼaqesiyapkäta,+ jan juchan jaqenakan wilapsa aka lugaran jan wartapkäta, jumanakatï jumanak pachpa usuchjasiñatak yaqha diosanakan qhepap jan sarapkarakïta ukhajja,+
7 nayasti aka lugaran jakasipkakiñamatakiw jaytapjjäma, nayra awkinakamar wiñayatak* churkta uka oraqena” sasa’”.
8 “Ukampis jumanakajj kʼari arunakaruw confiyasipktajja.+ Ukajj janiw jumanakarojj kunans yanaptʼapkätamti.
9 ¿Jumanakajj lunthatasisasa,+ jaqe jiwayasasa, adulterio jucha lurasasa, kʼari juramentonak+ lurasasa, Baal+ diosar sacrificionak loqtasasa,* jan uñtʼapkayäta uka diosanakar arkasasa,
10 taqe uka ajjtaskañanak lurkasas sutij apir aka utar jutasati naya nayraqatan saytʼasisin ‘cheqpachans nanakajj salvasipjjäwa’ sasin sapjjasma?
11 ¿Jumanakatakejj sutij apir aka utajj lunthatanakan utapäjjeti?+ Naya pachpaw uk uñjta”, sistwa naya Jehová Diosajja.
12 “‘Ukampis jichhajj Siló+ markankki uka santuariojar sarapjjam, qalltan sutijatak ajlliskta uka lugararu,+ ukatsti kuntï nayajj Israel markajan jan walinak luratapat uka lugarar lurkta uk uñjapjjam.+
13 Ukampis jumanakajj taqe ukanak lurasipkaktawa’, sistwa naya Jehová Diosajja, ‘jumanakarojj kutin kutinis parlapksmajja,* janiw istʼasipktati.+ Nayasti jumanakarojj jawsapjjayäsmawa, ukampis jumanakajj janiw jaysapkistati.+
14 Kunjamtï Siló markar lurktjja, uka pachparakwa jumanakajj confiyapkta+ uka sutij apir utarojj luräjja,+ aka templorus ukhamaraki, uksti jumanakampiru nayra awkinakamampiruw churayäta.+
15 Jumanakarusti taqeniruw naya nayraqatat apanukupjjäma, kunjamtï Efrainat jutapki taqe uka jilanakamar apanukkta ukhama’+ sasa.
16 ”Ukhamasti jumajj* jan aka marka laykojj oración luramti. Jan jupanak laykojj arnaqasimti, jan oración luramti ni wals ruwistati,+ nayajj janiw istʼkämati.+
17 ¿Janit jumajj kunsa Judá oraqenkir markanakansa Jerusalén markan callenakapans lurasipki uk uñjkta?
18 Wawanakasti lawanak pallthapisipki, awkinakajj nina naktayasipkaraki, warminakasti Alajjpachankir Reinar*+ tʼantʼanak sacrificiot loqtañatakiw masa chapuntasipki,* vino ofrendanak yaqha diosanakar loqtasipkaraki, ukhamat nayar colerayañataki.+
19 ‘Ukampis jupanakajj ¿nayarut usuchjapjjetu?’,* sistwa naya Jehová Diosajja. ‘¿Janit jupanak pachpa usuchjasisipki, ukhamat phenqʼachatäñataki?’.+
20 Ukatwa Taqe Kunjjar Munañani Jehová Dios Tatitojj akham saraki: ‘Colerasitajasa wal colerasiñajasa aka oraqjjaruw jutani,+ jaqenakjjaru, animalanakjjaru, camponkir qoqanakjjaru,* oraqen achunakapjjaru. Nayan colerasitajajj mä ninar uñtataw wal aqtasin jan jiwarkaniti’+ sasa.
21 ”Israelan Diosapäki uka ejercitonakan Jehová Diosapajj akham siwa: ‘Jumanakajj lurasipkakim, mayni sacrificionakamarojj enterpach nakhantayat ofrendanakamp yaptʼapjjam, jumanak pachparak aychanak manqʼapjjam.+
22 Kunapachatï nayajj nayra awkinakamar Egipto oraqet apsunkayäta ukhajja, janiw enterpach nakhantayat ofrendanakatsa ni sacrificionakatsa jupanakar parlkayätti ni kuns ordenkayätti.+
23 Jan ukasti ak jupanakar ordenayätjja: “Aruj istʼapjjam, nayasti jumanakan Diosamäyäwa, jumanakajj nayan markajäpjjarakïtawa.+ Kawki thaktï khitapkäma uka thakpun sarapjjañama, ukhamat jumanakajj sumaru sarapjjañamataki”+ sasa’.
24 Ukampis jupanakajj janiw kasusipkänti, ni atencionampis istʼapkänti,+ antisaw amtanakaparjam* sarnaqapjjäna, jan istʼasisaw jan wali chuymapamp apayasipjjäna.+ Jupanakajj qheparuw sarapjjäna, janiw nayrar sarapkänti,
25 kunürutï nayra awkinakamajj Egipto oraqet mistunipkäna uka urut jichhürkama.+ Ukatwa jumanakarojj nayar serviri taqe profetanakajarojj khitanipjjayäsma, sapüru, kutin kutiniraki.*+
26 Ukampis jupanakajj janiw nayar istʼañ munapkitänti, janirakiw ni atencionampis istʼapkitänti,+ antisas jan istʼasiriw tukupjjäna. ¡Nayra awkinakapat sipans jukʼamp jan walinak lurapjjäna!
27 ”Jumajj taqe uka arunak arsuskäta,+ ukampis jupanakajj janiw istʼapkätamti, jupanakarojj jawsätawa, ukampis janiw jaysapkätamti.
28 Ukatsti jupanakarojj akham sätawa: ‘Aka markaw Jehová Diosapar jan istʼir markajja, janirakiw cheqañchäwi katoqasiñ munkiti. Jan apanukusiñajj chhaqtjjewa, janirakiw jupanak taypin uka toqet parljjapjjeti’+ sasa.
29 ”Jan khuchurat ñikʼutam* khuchurasim, jaqtarakim, ukatsti jiskʼa qollunakan mä llakkañ canción cantarakim, kuna laykutejj aka tiempon jakir jaqenakarojj Jehová Diosajj apanukuwa, jaytanukurakiniwa, jupar wal colerayapjjatap layku.
30 ‘Judá markajj kunatï naya nayraqatan jan walïki ukanak lurapjje’, sistwa naya Jehová Diosajja. ‘Jupanakajj sutij apki uka utarojj ajjtaskañ idolonakap uchapjje, ukhamat uka ut qʼañuchañataki.+
31 Jupanakajj Tófet lugaran alto cheqankir sagrado lugaranak lurasipjje, uka lugarajj Hinón+ vallenkiwa,* ukhamat yoqall wawanakaparus imill wawanakaparus ninamp phichantañataki,+ janiw nayajj ukham lurapjjañap maykayätti, janipuniw chuymajansa* uk munkayätti’.+
32 ”‘Ukatwa urunakajj jakʼachasisinki’, sistwa naya Jehová Diosajja, ‘ukapachasti uka lugarajj janiw Tófet satäjjaniti, ni Hinón valle* satäjjanisa, jan ukasti Jiwarayañ valle satäjjaniwa. Jupanakajj Tófet lugaranwa jiwatanak imtʼapjjani, imtʼañatak lugarajj jan utjkani ukhakama.+
33 Aycha manqʼani jamachʼinakampi salvaje animalanakampiw aka markan jiwat cuerponakap manqʼapjjani, janirakiw khitis uka animalanakarojj alisnukkaniti.+
34 Judá oraqenkir markanakansa Jerusalén markan callenakapansa, nayaw kusisiñat arnaqasitanakapsa, wali kusisiñat arnaqasitanakapsa, casarasir waynan arupsa, casarasir tawaqon arupsa chhaqtayäjja,+ kuna laykutejj markajj laqayar tukuyatäniwa’”.+
Notanaka
^ Hebreo arunjja, “Akanakajj”. Ukham sasinjja, templon utjkäna taqe uka utanakat parlaski.
^ Jan ukajja, “jan awkin wajcha (iñu) wawanakarusa”.
^ Jan ukajja, “wiñayatpach wiñayatak”.
^ Jan ukajja, “sacrificio jewqʼeyasasa”.
^ Hebreo arunjja, “jumanakarojj alwatpach sartasas parlapksmajja”.
^ “Jumajj” sasinjja, Jeremiasat parlaski.
^ Variante: “ñatjasipki”.
^ Ukajj mä warmi diosänwa, juparuw apóstata israelitanakajj adorapjjerïna (yupaychapjjerïna). Uka diosaw warminakarojj wawanïñapatak yanaptʼi sasaw jupanakajj sapjjerïna.
^ Jan ukajja, “jiskʼachapjjetu; colerayapjjetu”.
^ Jan ukajja, “arbolanakjjaru”.
^ Jan ukajja, “amuytʼatanakaparjam”.
^ Hebreo arunjja, “sapürus alwatpach sartasa, khitasaraki”.
^ Jan ukajja, “Katuyat ñikʼutam”.
^ Jan ukajja, “janipuniw amuyujansa”.
