Nehemías 4:1-23
4 Kunapachatï Sanbalat+ chachajj murallanak mayamp lurasipkataj yatïna ukhajja, jupajj mayjtʼasïnwa, walpun colerasirakïna, ukatjja judionakat burlasiskakïnwa.
2 Sanbalat chachajj masinakap nayraqatansa Samaria markan ejercitop nayraqatansa akham sänwa: “¿Aka pisi chʼamani judionakajj kunsa lurasipki? ¿Jupanakakit uk lurapjjani? ¿Jupanakajj sacrificionakti loqtapjjani? ¿Mä urunakti tukuyapjjani? ¿Escombronak taypin utjki uka qʼala tʼunjata ninamp nakhantayat qalanakampit trabajipjjani?”+ sasa.
3 Sanbalat chachampi chikäkäna uka Tobías+ sat ammonita+ chachajj akham sarakïnwa: “Qalanakamp lurapki uka murallarutï mä qamaqejj* makataspajja, uka qalamp lurat murallajj qʼalaw allthaptaspa” sasa.
4 Ukatwa nayajj akham sasin orasta: “Nanakan Diosaja, istʼapjjakitaya, nanakajj wali jiskʼachatapuniw uñjasipjjta.+ Jupanakan burlasitanakapajj jupanak pachparuy kutjjatpan.*+ Jupanakajj kunanakatï guerran katuntatäki ukanakjam uñjatäpjjpan, yaqha markar preso apat uñjasipjjpan.
5 Jupanakan pantjasitanakap janikiy imtʼamti, juchanakapsa janikiy juma nayraqatat chhaqtayamti,+ jupanakajj trabajirinakaruw insultapjje” sasa.
6 Ukatsti nanakajj uka murall lurasipkakiyätwa, murallajj mayachthapisiskänwa, altorojj chika murallkamaw askichatäjjäna. Markankirinakasti taqe chuymaw trabajisipkakïna.
7 Ukampis kunapachatï Sanbalat chachasa, Tobías+ chachasa, arabenakasa,+ ammonitanakasa, asdoditanakas+ Jerusalén markan murallanakapan askichasitapajj nayrar sartaskatapa ukhamarak murallanakan qʼasanakapas mayachthapisiskatap istʼapjjäna ukhajja, jupanakajj walpun colertʼasipjjäna.
8 Ukatwa jupanakajj Jerusalén marka contra nuwasir jutañatakejj mayachtʼasipjjäna, ukhamat nanakar jan waltʼayañataki.
9 Ukampis yanaptʼayasiñatakejj nanakan Diosajaruw oración lurapjjta, jupanakat jarkʼaqasiñatakejj uruy arumaw mä guardia uchapjjta.
10 Ukampis Judá markankirinakajj akham sapjjänwa: “Trabajirinakajj* wali qaritäjjapjjewa, escombronakas waljarakiwa. Janipuniw aka murall mayamp saytʼayañ puedkañäniti” sasa.
11 Nanakan enemigonakajasti akham sapjjarakïnwa: “Jupanakajj janïr kuns yatipkani, janïr kuns uñjapkani, ukhaw jiwasajj jupanak taypir mantasajj jiwarayañäni. Ukhamatwa jupanakan trabajop saytʼayañäni” sasa.
12 Ukatsti kunapachatï enemigonakaj jakʼan jakiri judionakajj markar jutapjjäna ukhajja, kutin kutiniw* nanakar akham sapjjetäna: “Jupanakajj taqe cheqatwa jiwas contra jutapjjani” sasa.
13 Ukatwa nayajj uka murallan qhepäjjankkäna uka manqhäjj toqenakarojj guardianak uchta, kawkja lugaranakatï jan suma jarkʼatäkäna uka cheqanakaru. Jupanakarojj familianakaparjamaw grup grupo uchta, espadanakampi, lanzanakampi, flechtʼañ arconakampi armantatäpjjänwa.
14 Kunapachatï nayajj jupanakan ajjsarapjjatap uñjta ukhajja, ukspachaw nayajj pʼeqtʼirinakarusa,+ sullka apnaqerinakarusa, markankirinakarus akham sista: “Jan jumanakajj jupanakar ajjsarapjjamti.+ Jumanakajj Jehová Diosat amtasipjjam, jupasti musparkañ jachʼa Diosawa,+ ukhamasti jilanakam layku, yoqanakam layku, phuchanakam layku, warminakam layku ukhamarak utankirinakam layku nuwasipjjam” sasa.
15 Ukatsti enemigonakajajj kunanaktï lurañ amtapkäna uksa kunjamsa cheqpach Diosajj jupanakan amtanakap pantjasiyäna uksa, nanakan amuyasipjjatajwa yatipjjäna. Uka qhepatjja nanakajj wasitat murall lurañan trabajisipkakiyäta.
16 Uka urut uksarojj jaqenakajat chikatanejj trabajipjjänwa,+ chikatanisti lanzanakampi, escudonakampi, flechtʼañ arconakampi, armaduranakampi armantatäpjjänwa. Principenakasti+ taqpach judionakaruw yanaptʼapjjarakïna,*
17 kawkïri judionakatejj muralla lurasipkäna ukanakaru. Carganak apirinakasti mä amparampikiw trabajipjjäna, maysa amparampisti mä arma* kattʼatäpjjarakïnwa.
18 Sapa mayni trabajirinakasti cinturapar mä espadamp chinkatataw trabajipjjäna. Putut phustʼirejj+ ladojankaskarakïnwa.
19 Ukatjja pʼeqtʼirinakarusa, sullka apnaqerinakarusa, markankirinakarus nayajj akham sistwa: “Muralla lurañan wali trabajiñaw utji, sapa maynit jayarstʼataw trabajiraktanjja.
20 Ukhamasti putut phustʼir istʼapjjäta ukhajja, kawkjankkätejj nayajj uka cheqar jutasaw tantachtʼasipjjañama. Jiwasan Diosasaw jiwas lanti nuwasini”+ sasa.
21 Willjtat warawaranakan uñstaniñapkamaw nanakat chikatanejj trabajipjjäna, chikatanisti lanzanak kattʼatäpjjarakïnwa.
22 Ukapachaw nayajj markankirinakar akham sista: “Chachanakasti Jerusalén manqhan quedasipjjpan, jupanakajj sapa mayniw servirinakapamp chik ukankañapa. Arum toqerusti guardiat uñjapjjani, urusti trabajipjjarakiniwa” sasa.
23 Ukatwa nayasa, jilanakajasa, servirinakajasa,+ nayar arkir guardianakas isinak jan turksusipkayätti. Taqenirakiw kupi amparan mä arma kattʼatäpjjayäta.
Notanaka
^ Jan ukajja, “mä zorrojj”.
^ Hebreo arunjja, “jupanakan pʼeqepjjaruy kutjjatpan”.
^ Jan ukajja, “Qʼepirinakajj”.
^ Hebreo arunjja, “tunka kutiw”.
^ Hebreo arunjja, “taqpach judionakan qhepäjjapankapjjänwa”.
^ Jan ukajja, “mä lanza”.
