Nehemías 6:1-19
6 Ukatjja Sanbalat chachasa, Tobías+ chachasa, Guésem sat árabe+ chachasa, nanakan mayni enemigonakajas uka murall wasitat saytʼayatajwa+ yatipjjäna, murallan qʼasanakapajj jan utj-jjatapsa yatipjjarakïnwa (ukampirus nayajj janïraw punkunakan hojanakap uchkayätti).+
2 Sanbalat chachampi Guésem chachampejj jankʼakiw aka yatiyäwi apayanipjjetäna: “Jutam, Onó+ valle pampan utjki uka jiskʼa markanakan jumamp tantachasiñatak mä fecha amtañäni” sasa. Ukampis jupanakajj nayar jan waltʼayañ amtasipkäna.
3 Ukatwa nayajj akham sanipjjañapatak mensajeronak khitta: “Nayajj wali wakiskiri trabajo luraskta, janiw jumanakan ukar saraqankiristti. ¿Trabaj jaytasat jumanakan ukar jutiristjja?” sasa.
4 Jupanakajj pusi kutiw uka pachpa yatiyäwi apayanipjjetäna, nayajj pusi kutirakiw jupanakarojj uka pachpa arunakamp jaysarakta.
5 Ukatsti Sanbalat chachajj phesqër kutimpiw yanapirip taypejj pachpa yatiyäwi apayanitäna, yanapiripan amparapankkäna uka cartajj jistʼaratänwa.
6 Uka cartanjja akham qellqatänwa: “Jumampi judionakampejj reyi contra saytʼañ amtasipkatamaw markanak taypin istʼasi, Guésem+ chachas uka pachparakwa parli.+ Ukatwa jumajj uka murall wasitat saytʼayasktajja. Ukatsti jupanakan aruparjamajja, jumaw jupanakan reyipäjjäta.
7 Jumajj profetanak uttʼayaraktajja, ukhamat ‘¡Judá markajj mä reyinëjjewa!’ sasin jumjjat taqe Jerusalén markan yatiyapjjañapataki. Jichhajj taqe ukanakajj reyiruw yatiyasini. Ukhamajj uka toqet parlañatak jutam” sasa.
8 Ukampis nayajj aka yatiyäwi apayarakta: “Kunanaktï jumajj parlkta ukajj janiw cheqäkiti. Jumakiw ukanak pachpa chuymaman amuyasin parlasktajja” sasa.
9 Jupanakasti nanakar ajjsarayañ munasaw akham sapjjetäna: “Jupanakajj wali aynachtʼataw uñjasipjjani,* janirakiw trabajs tukuyapkaniti”+ sasa. Ukampis akham sasaw mayista: “Dios Tata, jan ajjsarañatak yanaptʼita”*+ sasa.
10 Ukatjja Mehetabel chachan allchhipäkäna Delayá chachan yoqapäkarakïna uka Semaya chachan utaparuw nayajj sarta, uka tiemponsti jupajj janiw utapat mistuñapäkänti. Jupasti akham sänwa: “Cheqpach Diosan utapan jikisiñatakiy mä fecha amtañäni, templo manqhar mantasasti templon punkunakapampiw llawintasiniñäni, kuna laykutejj jumar jiwayiriw jutapjjani. Jupanakajj arum toqeruw jumar jiwayir jutapjjani” sasa.
11 Ukampis nayajj akham sistwa: “¿Naya gobernadoran escapañajajj wakisispati? ¿Kunjamarak nayjam chachajj templor mantasin jakaskakispasti?+ ¡Janiw mantkäti!” sasa.
12 Ukatsti nayajj ak amuyasta: jupajj janiw Diosan khitanitäkataynati, antisas Tobías chachampi Sanbalat+ chachampiw nayar engañjañapatakejj jupar qollq churapjjatayna.
13 Nayar ajjsarayañataki nayar juchachasiyañatakiw jupar pagapjjatayna, ukhamat nayan sutij qʼañuchapjjañapataki, nayjjats jan walinak parlapjjañapataki.
14 Nayan Diosaja, Tobías+ chachatsa, Sanbalat chachatsa, kunanaktï jupanakajj lurapki ukanakatsa amtasikimaya. Noadías sat profetisa warmitsa mayni profetanakatsa amtasikimaya, jupanakajj walja kutiw ajjsarayañ munapjjetäna.
15 Ukampis uka murallajj elul* phajjsit 25 urunak saraqkäna ukhaw tukuyasjjäna, 52 urunakana.
16 Kunapachatï nanakan taqe enemigonakajajj uk yatipjjäna, uka jakʼankir taqe markanakas ukanak uñjapjjarakïna ukhajja, jupanakajj wali phenqʼachataw uñjasipjjäna,*+ ukatsti jupanakajj uka trabajojj nanakan Diosajan yanaptʼapampi lurasitapwa amuyapjjäna.
17 Uka urunakanjja, Judá markan pʼeqtʼirinakapajj+ walja cartanakwa Tobías chachar apayapjjäna, Tobías chachasti jupanakarojj jaysarakïnwa.
18 Judá markankirinakatjja waljaniw Tobías chachamp sumankañatakejj mä juramento lurapjjäna, kuna laykutejj Tobiasajj Secanías chachan tollqapänwa, Secanías chachajj Ará+ chachan yoqapänwa. Ukhamarus Tobías chachan Jehohanán sat yoqapajj Mesulam chachan phuchapampiw casarasïna, Mesulam+ chachajj Berekías chachan yoqapänwa.
19 Jupanakasti sapa kutiw Tobías chachat sumanak parlapjjetäna, kuntï nayajj arskayäta ukanaks jupar yatiyapjjarakïnwa. Ukatjja Tobías chachajj cartanakwa nayar ajjsarayañatak apayanitäna.+
Notanaka
^ Hebreo arunjja, “amparanakaj chʼamañchtʼita”.
^ Hebreo arunjja, “Jupanakajj amparanakap ayaqapjjani”.
^ Apéndice B15 uñjjattʼäta.
^ Hebreo arunjja, “jupanakajj pachpa nayranakapatakiw wal aynachtʼapjjäna”.
