Zacarías 11:1-17
11 “Líbano qollunaka, punkunakam jistʼarapjjam,ukhamat ninajj cedro qoqanakam* qʼal nakhantañapataki.
2 ¡Enebro qoqa,* wararim, kuna laykutejj cedro qoqanakajj tinkurjjapjjewa,jachʼa qoqanakas tukjatäpjjarakiwa!
¡Basán oraqenkir roble qoqanaka, wararipjjam,kuna laykutejj walja qoqanakani montejj* tukjatawa!
3 ¡Istʼapjjam! Uywa awatirinakajj wararipjjewa,kuna laykutejj jachʼañchäwipajj tukjatawa.
¡Istʼapjjam! Waynpach leonanakajj wararipjjewa,kuna laykutejj Jordán jawir thiypachan* utjki uka walja alinakajja tukjatäpjjewa.
4 ”Nayan Jehová Diosajajj akham siwa: ‘Khariñatakïki uka ovejanak awatim.+
5 Uka ovejanak alirinakajja uka ovejanak kharsupjjewa,+ ukham lurapjjatapatjja janiw juchanïpkiti. Uka ovejanak aljirinakajj+ akham sapjjewa: “Jehová Diosajj jachʼañchatäpan, kuna laykutejj nayajj qamiriptäwa” sasa. Awatirinakapajj janiw akchʼas jupanakat khuyaptʼayasipkiti’+ sasa.
6 ”Jehová Diosajj akham siwa: ‘Markankir jaqenakatjja janiw mayampis sinttʼaskäti. Taqe jaqenakajj jupanakkamaw dominjasipjjani, reyis jupanakarojj dominarakiniwa. Jupanakajj markjja qʼal tukjapjjani, ukampis janiw nayajj amparanakapat salvkäti’ sasa”.
7 Ukatjja khariñatakïkäna uka ovejanakwa nayajj awatiyäta,+ tama taypit tʼaqesiyatanaka, jumanak laykuw uk lurayätjja. Ukatwa pä thujrunak aptayäta: mä thujrurojja Khuyaptʼayasiña sat sutimpiw uchayäta, maynirusti Mayachtʼatäña+ sat sutimpiw ucharakiyäta, ukatjja tamarojj awatiskakiyätwa.
8 Mä phajjsinakwa nayajj kimsa awatirinak khitanukjjayäta, kuna laykutejj janiw jupanakatakejj paciencianëjjayätti, jupanakas nayat ajjtasipjjänwa.
9 Ukatwa nayajj akham sayäta: “Janiw jupanakarojj jukʼampejj awatjjäti. Jiwañampïski ukajj jiwjjpan, jakäwip aptʼaskani ukajj aptʼaspan, jiltʼirinakajja jupanakkam aychanakap manqʼantasipjjpan” sasa.
10 Khuyaptʼayasiña+ sat sutini thujruj aptasinjja jiskʼa jiskʼwa pʼakjayäta, ukhamatwa taqe markanakamp nayajj lurkayäta uka pactojj tukusjjäna.
11 Uka urunwa pactojj tukusjjäna, ukajj Jehová Diosan yatiyäwipänwa,* ukwa tama taypit tʼaqesiyatäpkäna, mä arunjja nayar uñchʼukinisipkitäna ukanakajj yatipjjäna.
12 Ukatwa nayajj jupanakar akham sayäta: “Jumanakatakitï walïchejja pagoj churapjjeta, janitejj walïkchejja jumanakak katusjjapjjam” sasa. Ukatjja 30 qollqe metalanakwa pagapjjetäna.*+
13 Jehová Diosajj akham sitänwa: “Kawkjantï wali valorani yänakajj* imaski ukar uka qollqenak uchanjjam... wali jukʼa valoranïkiristsa ukhamwa jupanakajj uñjapjjetäna”+ sasa. Nayajj 30 qollqe metalanak katusajja kawkjantï wali valorani yänakajj imaski ukaruw uchayäta, ukasti Jehová Diosan utapankänwa.+
14 Ukatjja maynir thujrujwa nayajj pʼakjayäta, Mayachtʼatäña+ sat sutinïki uka thujrujwa pʼakjayäta, ukhamatwa Judá markampi Israel markampi jilapurjam apasiñajj utjkäna uk pʼakjayäta.+
15 Ukatjja Jehová Diosajj akham sitänwa: “Jichhasti jan kunatak serviri mä awatirin yänakap* katum.+
16 Kuna laykutejj mä awatiriruw nayajj markar khitasinkta. Jupasti jiwirjamäpki uka ovejanakarojj janiw cuidkaniti,+ chhaqat ovej qallunakarojj janiw thaqkaniti,+ usuchjat ovejanakarus janiw qollkaniti, kʼumar ovejanakarojj janirakiw manqʼaykaniti. Jan ukasti likʼi ovejanakan aychapwa manqʼantani,+ sillunakapsa khaksurakiniwa.+
17 ¡Ay kunakïkani nayan awatirijatjja,+ jupajj tamar ananukuri, jan kunatak servir awatiriwa!+
Mä espadaw juparojj amparapatsa kupi nayrapatsa jawqʼatatani.
Amparapajj qʼal wañsjjani,kupi nayrapajj qʼal juyktʼjjarakini”.*
Notanaka
^ Jan ukajja, “arbolanakam”.
^ Jan ukajja, “árbol”.
^ Jan ukajja, “bosquejj”.
^ Variante: “qawaypachan”.
^ Hebreo arunjja, “arupänwa”.
^ Hebreo arunjja, “pestʼarapipjjetäna”.
^ Jan ukajja, “cosasanakajj”.
^ Jan ukajja, “cosasanakap”.
^ Hebreo arunjja, “qʼal chʼamaktʼjjarakini”.
