Ezequiel 19:1-14
-
Israelan pʼeqtʼirinakapat mä llakkañ canción (1-14)
19 “Israelan pʼeqtʼirinakapat mä llakkañ canción cantam.
2 Jumajj akham sañamawa:
‘¿Taykamajj kunänsa? Leonanak taypinkir mä leonänwa.
Jupajj chʼamani wayna leonanakampiw ikintasïna, león qallunakaparuw uywarakïna.
3 Jupajj león qallunakapat mayniruw uywäna, uka qallojj chʼamani wayna leonaruw tuküna.+
Jupajj kuntï katjkäna uk jiskʼa jiskʼa tukjañ yateqäna,jaqenaks manqʼantarakïnwa.
4 Markanakajj jupjjat parlir istʼapjjäna, mä pʼiyan jupar katjapjjäna,ukatjja nasapat fierro ganchonakamp uchasaw Egipto oraqer apapjjäna.+
5 Tayka leonajj suyänwa, ukampis qallupan jan mayamp kutinjjañätap amuyasïna ukhajja,qallunakapat yaqhar katusaw chʼamani wayna leonar tukuyarakïna.
6 Uka leonasti leonanak taypinwa uks aks muynaqäna, ukatsti chʼamani wayna leonaruw tukurakïna.
Jupajj kuntï katjkäna uk jiskʼa jiskʼa tukjañ yateqäna, jaqenaks manqʼantarakïnwa.+
7 Jupajj jaqenakan jachʼa torrenakap taypinwa uks aks sarnaqäna, markanakaps tukjarakïnwa,wararitapajj taqe uka chʼusa oraqenwa istʼasïna.+
8 Uka jakʼankir provincianakankir markanakaw jupa contra jutapjjäna, ukhamat mä qänampi* jupjjar jaqjjatañataki,juparojj mä pʼiyanwa katjapjjäna.
9 Nasapat fierro ganchonakamp uchasaw mä jaular apantapjjäna, Babilonia markan reyipan ukaruw apjjapjjarakïna.
Ukanwa juparojj llawintapjjäna, ukhamat wararitapajj Israelan qollunakapan jan wasitat istʼasiñapataki.
10 Mamamajj umanak jakʼan ayruntat mä uvas alir uñtasitänwa.*+
Umajj wal utjatap laykojja, achoqänwa, ramanakapas waljarakïnwa.
11 Uka uvas alitjja chʼollqhe ramanakaw jilaräna, gobernantenakan cetronakapatakejj wali sumänwa.
Jupasti jilsünwa, uka jakʼankir qoqanakan* ramanakapat sipans jukʼamp altoruw jilsüna.
Wali altötap laykusa walja ramanakanïtap laykus taqenin uñjatänwa.
12 Ukampis wali colerasiñamp jikʼinukutänwa,+ pampar liwtatarakïnwa,inti jalsu toqet thaytʼanir thayaw achup wañsuyäna,chʼollqhe ramanakapajj apaqatänwa, wañsjjänwa,+ ninaw uka ramanakap nakhantjjarakïna.+
13 Jichhasti uka uvas alejj wasaran ayruntatäjjewa,*jan umani, mä waña oraqena.+
14 Ninaw ramanakapat aqatatäna, jilsunir ramanakapsa achunakapsa nakhantjjänwa.
Janiw ni mä chʼollqhe ramas jupan jiltʼkänti, janirakiw gobernañatak kuna cetros utj-jjänti.+
”’Akajj mä llakkañ cancionawa, taqenin uñtʼat llakkañ cancionarakïniwa’”.
Notanaka
^ Jan ukajja, “redempi”.
^ Hebreo arunjja, “Mamamajj wilaman mä uvas alir uñtasitänwa”.
^ Jan ukajja, “arbolanakan”.
^ Variante: “mallkintatäjjewa”.
