Ezequiel 24:1-27
24 Llätunkïri maräjjänwa,* tunkïri phajjsit tunka urunakaw saraqjjarakïna, ukhaw Jehová Diosajj mä kutimpi parlitäna, akham sasa:
2 “Jaqen yoqapa, jichhürojj aka urun fechap* qellqantam. Jichhüruw Babilonia markan reyipajj Jerusalén contra nuwasiñ qallti.+
3 Mä uñachtʼäwimp kutkatasir jaqenakat parlam. Jupanakat akham sarakim:
”‘Taqe Kunjjar Munañani Jehová Dios Tatitojj akham siwa:
“Phuku* ninar uchasajj umamp warantarakim.+
4 Phukurusti jiskʼa aychanak ucham,+ taqe suma jiskʼa aychanakampi,lankhu charampi, paletillampi. Suma chʼakhanakampi phoqantarakim.
5 Ovej tamatjja mä suma oveja katum,+ ukatsti phuku aynacharojj lawanak muytpachar montontʼarakim.
Uka jiskʼa aychanak walljjtayam, phukunkir chʼakhanaks phayarakim”’.
6 ”Ukhamasti Taqe Kunjjar Munañani Jehová Dios Tatitojj akham siwa:
‘¡Ay wila wartañampi phoqantat marka,+ saruntat phuku, sarunakapat jan qʼomachat phuku!
Chʼus jaytañkam mayat may uka jiskʼa aychanak apsum,+ jan ajlliras taqpach apsum.
7 Aka markan wila wartatapajj aka marka taypinkaskakiwa,+ jupajj mä qʼara qarqa* patjjaruw wil wartäna.
Janiw oraqer wartkänti, ukhamat laqʼampi imjjatatäñapataki.+
8 Nayan wal colerasitaj sartayañatakisa vengasiñatakisa,qʼara llijkir qarqaruw* wilap uchta,ukhamat jan imjjatatäñapataki’.+
9 ”Ukhamasti Taqe Kunjjar Munañani Jehová Dios Tatitojj akham siwa:
‘¡Ay wila wartir marka!+
Nayajj lawanak jachʼa montón montontʼäjja.
10 Lawanak montontʼam, nina naktayam.
Aych sum qhatiyam, caldo wartam, chʼakhanakajj nakhantpan.
11 Parintañapatakejj nina sankʼa patjjar chʼusa phuk ucham,cobrejj nina sankʼar tukuñapataki.
Qʼañupajj uka manqhanwa umatatani,+ sarupsti ninaw nakhantani.
12 Ukajj inamay chʼama tukuñakiwa, qariñakiwa,sinti saruntatawa, janiw ukajj apsuñjamäkiti.+
Ukhamajj ¡saruntat phuk ninar jaqjjatam!’.
13 ”‘Ajjtaskañ qʼañu juchanak luratam kawsajj qʼañüyätawa.+ Jumarojj qʼomachañ munayäsma, ukampis janiw qʼañumat qʼomachañjamäkayätati. Kunapachatï juma contra wal colerasitajajj tʼakurjjani ukhakiw qʼomachatäjjäta.+
14 Naya Jehová Diosaw uk arsta, ukasti phoqasiniwa. Jan qhepar kuttʼasa, jan sinttʼasisa, jan chuym usuyasisaw uk luräjja.+ Jupanakajj sarnaqatamarjama, luratamarjamaw jumar juzgapjjätam’, siw Taqe Kunjjar Munañani Jehová Dios Tatitojja”.
15 Mä kutimpiw Jehová Diosajj parlitäna, akham sasa:
16 “Jaqen yoqapa, munat esposamarojj mä akatjamatwa apaqäma.+ Jan jumajj llakisimti,* jan jachamti, ni jachaqtʼasimsa.
17 Chuyma manqhaman llakisim, maynin jiwatapat llakisiñ costumbrenakajj utjki uk jan luramti.+ Turbantempi chʼoqantasim,+ wiskhump*+ uchasim. Jan jumajj lakam imtʼasimti,*+ yaqhanakajj manqʼañamatak tʼantʼa apanirapipktam uks jan manqʼamti”+ sasa.
18 Alwa toqerojj markaruw nayajj parlayäta, jaypʼu toqerusti esposajajj jiwjjänwa. Ukatwa qhepür alwajj kunjamtï nayar mayiskitäna ukham lurayäta.
19 Markajj akham sitänwa: “¿Kuntï jumajj lurkta ukajj kunans nanakar afectapjjetani uk janit sapkitäta?”.
20 Nayasti jupanakarojj akham sayätwa: “Jehová Diosajj akham sasaw parlitäna:
21 ‘Israelitanakarojj akham sätawa: “Taqe Kunjjar Munañani Jehová Dios Tatitojj akham siwa: ‘Nayajj temploj jiskʼachañampïsktwa,+ kawkïr lugarattï jumanakajj wal jachʼañchasipkta, munasipkta, kawkïr lugararutï chuymanakamajj wayuski ukaru. Markamamp jan sarir yoqanakamasa phuchanakamasa espadamp jiwayatäpjjaniwa.+
22 Ukapachaw jumanakajj kunjamtï nayajj lurkta ukham lurapjjäta. Janiw lakanakam* imtʼasipkätati, janirakiw yaqhanakajj apanirapipkätam uka tʼantʼsa manqʼapkätati.+
23 Pʼeqenakamarojj turbantemp uchatäsipkakïtawa, kayunakamarojj wiskhunakamp* uchatäsipkakïtawa. Janiw jiwatanakat llakisipkätati ni jachapkätasa. Jan ukasti pantjasitanakamat qaritäpjjätawa,+ jumanakkam uñkattʼasisaw ayqopjjäta.
24 Ezequielajj jumanakatak mä señalawa.+ Kunjamtï jupajj lurki ukham lurapjjäta. Ukanakajj pasani ukhaw jumanakajj Taqe Kunjjar Munañani Jehová Dios Tatitütaj yatipjjäta’”’”.
25 “Jaqen yoqapa, kunürutï jupanakar imantasiñ lugarap aparkä, kawkïr suma lugarattï jupanakajj wal kusisipki, munasipki, chuymanakapas wayuski uka lugar aparkä, yoqanakapsa phuchanakapsa aparkä uka uruw+
26 khititï escapkani ukajj jumar yatiyätam.+
27 Uka urunwa jumajj wasitat parljjäta, escapkani ukampiw parläta, janiw amutöjjätati.+ Jupanakatakejj mä señaläyätawa, jupanakasti Jehová Diosätaj yatipjjani”.
Notanaka
^ Ukajja, Joaquín reyimpi, Ezequielampi ukhamarak yaqha judionakamp yaqha markar apatäjjapjjäna uka llätunka maranakat parlaski (Ezequiel 1:2 texto liytʼäta).
^ Hebreo arunjja, “urun sutip”.
^ Jan ukajja, “Jachʼa lakan phuku”.
^ Variante: “jaqhe”.
^ Variante: “jaqheruw”.
^ Jan ukajja, “Jan jumajj pechom leqʼesimti”.
^ Variante: “jiskhump”.
^ Jan ukajja, “sunkham imtʼasimti”.
^ Jan ukajja, “sunkhanakam”.
^ Variante: “jiskhunakamp”.
