Ezequiel 27:1-36
-
Mä llakkañ cancionaw cantasi, Tiro markajj mä barcor uñtat umar jalantatap layku (1-36)
27 Mä kutimpiw Jehová Diosajj parlitäna, akham sasa:
2 “Jaqen yoqapa, jumajj Tiro markjjat mä llakkañ canción cantam.+
3 Tiro markarojj akham sätawa:
‘Lamar qotar mantañäkis ukan jakiri,walja islanakan jakir jaqenakamp negocio luriri,Taqe Kunjjar Munañani Jehová Dios Tatitojj akham siwa:
“Tiro marka, juma pachpaw akham sistajja: ‘Nayan suma uñnaqtʼanïtajajj sumapuniwa’+ sasa.
4 Oraqenakamajj lamar qota taypinkiwa,constructoranakamaw wali suma uñnaqtʼanïñamatak yanaptʼapjjtam.
5 Taqe tablanakamjja Senir+ cheqankir enebro maderatwa lurapjjäna,Líbano qollunakankir cedro maderatwa barcon velo uchañ lawap lurarapipjjayätamjja.
6 Remonakamjja Basán toqenkir roble maderapatwa lurapjjäna,barcon nayräjjapajj Kitim+ islankiri ciprés qoqan* maderapampi luratänwa, ukarojj marfilamp kʼiñintatänwa.
7 Velomajj Egipto markankir wali qhana coloranakani lino telat luratänwa,imjjatañatak toldonakamajj azul hilompi Elisá+ sat islanakankir morado chʼankhampi luratänwa.
8 Sidón ukhamarak Arvad+ markanakan jakirinakaw juman remonak apnaqerinakamänjja.
Ay Tiro marka, barco apnaqañan wali yatjjattʼat jaqenakamaw marineronakamänjja.+
9 Guebal+ markankir experienciani wali yatjjattʼat* chachanakaw barcor jan um mantañapatakejj ansjtatanak taptʼapjjerïna.+
Lamar qotankir taqe barconakasa barco apnaqerinakapasa juman ukaruw jutapjjerïna, ukhamat mercaderianakamp negocio lurañataki.
10 Persia markankiri ukhamarak Lud, Put+ sat oraqenakankir chachanakaw juman ejercitomankänjja, jupanakaw guerran nuwasir jaqenakamänjja.
Jumaruw escudonakapsa casconakapsa warktʼasipjjäna, jumarojj jachʼañchapjjayätamwa.
11 Ejercitomankapkäna uka Arvad markankir chachanakaw murallanakam patjjar muytpachar saytʼasipjjäna,jan ajjsarir chachanakaw torrenakam uñjapjjäna.
Murallanakamarojj muytpacharuw escudonak warktʼapjjäna,wali suma uñnaqtʼanïtamjja jukʼamp sumaruw tukuyapjjäna.
12 ”’”Walja utjirinakanïtam laykojj Tarsis+ toqenkirinakajj jumampiw negocio lurapjjerïna.+ Mercaderianakamampiw qollqe, hierro, estaño, plomo sat metalanak cambiapjjäna.+
13 Javán, Tubal,+ Mesec+ markanakajj jumampiw negociapjjerïna. Mercaderianakamampiw esclavonaksa+ cobret luratanaksa cambiapjjerïna.
14 Togarmá+ chachat jutirinakajj mercaderianakamampiw caballonaksa mulanaksa cambiapjjerïna.
15 Dedán+ markankir jaqenakajj jumampiw negocio lurapjjerïna. Jumajj walja islanakatwa comerciantenak contratayätajja, marfilampi+ ébano qoqan* maderapamp regalot* katoqayätajja.
16 Edom markajj juman walja mercaderianakanïtam laykojj jumampiw negocio lurirïna. Mercaderianakam lantejj turquesa* qalampi, morado chʼankhampi, kunayman coloranakamp bordat telanakampi, suma telanakampi, lamar qotankir coralanakampi,* rubí sat qalanakamp churapjjayätamjja.
17 ”’”Judá oraqesa Israel oraqes jumampiw negocio lurapjjerïna, juman mercaderianakam lantejj Minit+ markankir trigompi, suma manqʼanakampi, miskʼimpi,+ aceitempi, bálsamo+ aceitempi churapjjayätamjja.+
18 ”’”Damasco+ markajj walja mercaderianakanïtam laykusa taqpach wali valoraninakam laykusa jumampiw negocio lurirïna. Uka lantejj Helbón cheqankir vinompi Sahar lugarankir tʼarwampi churapjjayätamjja.
19 Uzal toqenkir Vedán, Javán sat markanakajja, mercaderianakam lantejj hierrot luratanakampi, casia* maderampi, cañampi* churapjjayätamjja.
20 Dedán+ markajj animalanakan jikhanipar uchañatak karunanakampiw jumamp negocio lurirïna.
21 Árabe jaqenakampiru Quedar+ markan taqe pʼeqtʼirinakapampiruw contratayätajja, jupanakajj corderonaka, orqo ovejanaka, cabranaka alapjjerïna aljapjjarakirïna.+
22 Saba,* Raamá+ markanakankir comerciantenakajj jumampiw negocio lurapjjerïna, mercaderianakam lantejj taqe kasta suma perfumenakampi suma qalanakampi qorimpi churapjjayätamjja.+
23 Harán,+ Cané, Edén+ markanakasa, Saba,*+ Asur,+ Kilmad markanakankir comerciantenakas jumampiw negocio lurapjjerïna.
24 Jupanakajj qhatumanwa suma isinakampi, azul materialat lurat kunayman coloranakamp bordat mantonakampi, taqe kasta coloranakani alfombranakampi negocio lurapjjerïna, taqe ukanakasti pitanakampi* suma ñachʼantatänwa.*
25 Tarsis barconakaw+ mercaderianakam apapjjäna.
Ukatwa jumajj lamar qota taypejj phoqtʼata suma cargantata* sarayätajja.
26 Remonak apnaqerinakamajj wali thayampi jallumpi utjir lamar qotanakaruw apayätamjja,inti jalsu toqet thaytʼanir thayaw lamar qota taypin tukjtamjja.
27 Juman wali valoraninakamasa, kunanakatï utjktam ukanakasa, mercaderianakamasa, barco apnaqerinakamasa, marinero jaqenakamasa,barcor jan um mantañapatak ansjtatanak taptʼirinakasa, mercaderianakamamp negocio luririnakasa,+ guerran nuwasiri taqe jaqenakasa,+juma taypin utjki taqe ukanakajja,taqeniw jumajj jaqoskäta uka urojj lamar qota taypin chhaqaranttapjjani.+
28 Marineronakamajj arnaqasipjjani ukhajja, lamar qota jakʼankir oraqenakas khatatipjjaniwa.
29 Taqe remonak apnaqerinakasa, marineronakasa, lamar qotankir jaqenakasa,barconakap jaytanukupjjani, waña oraqenwa quedasipjjani.
30 Wali jachʼatwa arnaqasipjjani, jumatjamaw wal jachapjjani,+ukañkamajj laqʼampiw pʼeqenakapat willjjatasipjjani, qhellanwa suntʼipjjarakini.
31 Pʼeqenakap afeitasipjjani llakisiñ isimpiw* isthapisipjjani,wal wararisaw jumatjam wal jachapjjani.
32 Ukham wararisajja, mä llakkañ canción kutin kutin jumatjam akham sasin cantapjjani:
‘¿Tiro markar uñtasit lamar qota taypin amuktʼiri mä markajj utjiti?+
33 Kunapachatï mercaderianakamajj lamar qotat purinïna ukhajja, walja markanakaruw kusisiyayätajja.+
Juman wali valoraninakamasa mercaderianakamasa oraqenkir reyinakaruw qamiriptayäna.+
34 Jichhasti jumajj lamar qota taypinwa tukjat uñjastajja, wali manqha umanakana.+
Taqe mercaderianakamasa jaqenakamasa jumamp chikaw umar chhaqaranttapjje.+
35 Islanakan taqe jakirinakaw musparat jumar uñchʼukipjjätam,+reyinakapas wali ajjsarayasiñat khatatipjjani,+ wali llakitäpjjatapajj ajanunakapan amuyasini.
36 Markanakan comerciantenakapajj kunatï jumar pasktam ukat khuyusipjjaniwa.
Jumajj mä akatjamatwa qʼala tukjat uñjasïta.
Wiñayatakiw jumajj tukusïta’”’”.+
Notanaka
^ Jan ukajja, “arbolan”.
^ Hebreo arunjja, “jilïri”.
^ Jan ukajja, “arbolan”.
^ Jan ukajja, “impuestot”.
^ “Suma qalanaka” siski uk glosarion liytʼäta.
^ Ukajja, mä suma olorani cañawa.
^ Ukajja, yaqha kasta canelawa.
^ Jan ukajja, “Seba”.
^ Jan ukajja, “Seba”.
^ Variante: “kawuyanakampi”.
^ Variante: “chʼoqantatänwa”.
^ Ukajja, “jachʼañchtʼasisa” sasaw jaqokipasirakispa.
^ “Llakisiñ isi” siski uk glosarion liytʼäta.
