Ezequiel 28:1-26
28 Mä kutimpiw Jehová Diosajj parlitäna, akham sasa:
2 “Jaqen yoqapa. Tiro markan apnaqeriparojj akham sätawa: ‘Taqe Kunjjar Munañani Jehová Dios Tatitojj akham siwa:
“Chuymamajj jachʼa jachʼaw tukjje,+ ukatwa jumajj akham saskaktajja: ‘Nayajj mä diosätwa.
Mä diosan tronopanwa lamar qota taypin qontʼasta’+ sasa.
Ukampis mä jaqekïtawa, janiw mä diosäktati,chuymaman diosätam amuyasksta ukasa.
3 Jumajj Danielat sipans jukʼamp yatiñanïkasmas ukham amuyastajja.+
Jumatakejj janiw kuna imantat secretos utjkiti.
4 Yatiñanïtamata ukhamarak amuytʼirïtamatwa qamiripttajja.
Wali valoraninak imañ cheqanakamaruw qorsa qollqsa imkatasktajja.+
5 Negocio lurañ sum yatitam laykuw jumajj walja utjirinakam jiltaytajja,+qamirïtam laykuw chuymamajj jachʼa jachʼa tukjje”’.
6 ”‘Ukatwa Taqe Kunjjar Munañani Jehová Dios Tatitojj akham arsu:
“Niyakejjay chuymaman diosäkasmas ukham amuyasstajja,
7 juma contrajj extranjero jaqenak apanëjja, yaqha markanakan sinti jan sinttʼasiri jaqenakap apanëjja.+
Kuna sumanaktï yatiñamampi jikjjatkta ukanak contraw jupanakajj espadanakap apsupjjani,kunja jachʼañchatäktatï uks qʼañuchapjjaniwa.+
8 Sepulturaruw saraqayapjjätam,tʼaqesiyasaw lamar qota taypin jiwayapjjätam.+
9 Ukhampachasa, ¿jiwaykätam ukarojj ‘nayajj mä diosätwa’ sätati?
Qʼañuchapkätam ukanakan amparapan mä jaqekïyätawa, janiw mä diosäkätati”’.
10 ‘Jumajj jan circuncidat* jaqenakjamaw extranjero jaqenakan amparapampi jiwayat uñjasïta,naya pachpaw uk arsta’, siw Taqe Kunjjar Munañani Jehová Dios Tatitojja”.
11 Mä kutimpiw Jehová Diosajj parlitäna, akham sasa:
12 “Jaqen yoqapa, mä llakkañ canción Tiro markan reyipjjat cantam. Juparojj akham sarakim: ‘Taqe Kunjjar Munañani Jehová Dios Tatitojj akham siwa:
“Jumajj wali perfectopunïyätawa,yatiñampi phoqtʼatäyätawa,+ suma uñnaqtʼanïtamas sumapunïnwa.+
13 Edén sat Diosan jardinapankayätawa,taqe kasta suma qalanakampi kʼachachtʼatäyätawa:
rubí,* topacio, jaspe, crisólito, ónice, jade, zafiro, turquesa,+ esmeralda sat suma qalanakampi.
Uchatäkayäta uka sapa mayni qalajja qorir kʼiñintatänwa.
Jumar lurkayäsma uka urunwa taqe ukanakajj wakichtʼatäjjäna.
14 Nayajj jarkʼaqeri,* ajllita querubinjamaw uchsma,jumajj Diosan sagrado qollupankayätawa,+ nina aqkiri qalanak taypin sarnaqayätajja.
15 Jumajj luratäkayäta uka urut aksarojj jan pantjasisaw sarnaqayätajja,jan cheqaparjam sarnaqañ qalltkayäta ukapachkama.+
16 Walja negocionak luratam+ laykuwnuwasiñanakampi phoqantatätajja, jucha lurañ qalltaraktajja.+
Ukatwa Diosan qollupat mä jiskʼachatarjam alisnuküma, tukjarakïmawa.+
Ay jarkʼaqer* querubín, janiw jumajj nina aqkiri qalanak taypin sarnaqjjätati.
17 Suma uñnaqtʼanïtam laykuw chuymamajj jachʼa jachʼa tukjje.+
Jachʼañchasitam laykuw yatiñamajj aynachtʼi.+
Oraqeruw jaqoqäma.+
Reyinak nayraqatan mä uñtasiñaruw tukuyäma, ukhamat jupanakajj jan walir purtʼasitam uñjapjjañapataki.
18 Sinti jan wali juchanakamampi, engañompi negocionak luratamampiw sagrado lugaranakam jiskʼachtajja.
Juma taypin nina aqtayäjja, uka ninaw nakhantätam.+
Taqe khitinakatï uñchʼukisipktam ukanakan uñjkataw jumarojj oraqen qhellar tukuyäma.
19 Taqe khitinakatï markanak taypin uñtʼapkayätam ukanakajj wali musparataw uñchʼukipjjätam.+
Jumajj mä akatjamatwa wali ajjsarkañ tukjat uñjasïta.
Wiñayatakiw jumajj tukusïta”’”.+
20 Mä kutimpiw Jehová Diosajj parlitäna, akham sasa:
21 “Jaqen yoqapa, Sidón+ marka toqer uñtam, jupa contrajj profecía arunak arsum.
22 Akham sätawa: ‘Taqe Kunjjar Munañani Jehová Dios Tatitojj akham siwa:
“Ay Sidón marka, nayajj juma conträtwa, juma taypin jachʼañchatäyäwa.
Kunapachatï nayajj juchañchkäma, juma taypi santor tukuyatäkarakï ukhaw jaqenakajj Jehová Diosätaj yatipjjani.
23 Jupan ukarojj usunak* apanëjja, callenakapan wilaw jalani.
Taqe ladot jupa contra espada apayankä ukhajja, waljaniw jupa taypin jiwayatäpjjani.
Jupanakasti Jehová Diosätaj yatipjjani.+
24 ”’”Ukatjja israelitanakajj janiw ustʼayasir chʼapinakampi muyuntatäjjaniti,+ khitinakatï jiskʼachañampi uñjapki ukanakampi. Jaqenakajj Taqe Kunjjar Munañani Jehová Dios Tatitütaj yatipjjani”’.
25 ”‘Taqe Kunjjar Munañani Jehová Dios Tatitojj akham siwa: “Anatatatäpki uka markanakat israelitanakar wasitat tantachtʼkä ukhajja,+ yaqha markanakan uñjkataw jupanak taypin santo Diosat uñjatäyäjja.+ Jupanakasti Jacob servirijar churkayäta+ uka oraqenwa jakapjjani.+
26 Ukanwa jupanakajj wali seguro jakapjjani,+ utanakwa lurasipjjani, uvasanak ayrusipjjani.*+ Jupanak jakʼankapki jupanakar jiskʼachapki ukanakar juchañchkä ukhaw jupanakajj wali seguro jakapjjani.+ Jupanakasti Jehová Diosätaj yatipjjani”’”.
Notanaka
^ “Circuncisión” siski uk glosarion liytʼäta.
^ “Suma qalanaka” siski uk glosarion liytʼäta.
^ Hebreo arunjja, “imjjatiri”.
^ Hebreo arunjja, “imjjatir”.
^ Hebreo arunjja, “pestenak”.
^ Variante: “mallkisipjjani”.
