Job 16:1-22
16 Job chachajj akham sarakïnwa:
2 “Nayasti nayrajj ukhamanak istʼarakiyätwa.
Ukampis ¡taqe jumanakajj chuymachtʼañat sipans jukʼamp llakisiyapjjestajja!+
3 ¿Chʼusa arunakajj tukusjjaniti?
Elifaz, ¿kunatsa nayarojj ukham parlista?
4 Nayajj jumanakjamaw parlarakirista.
Jumanakatï nayjam tʼaqesipjjasmajja,nayajj kunaymaninak jumanak contrajj parlirista,pʼeqejsa jumanakatakejj khiwisiristwa.+
5 Ukampis janiw uk lurkiristti, antisas lakajampiw jumanakarojj chʼamañchtʼapjjerisma,nayan suma arunakajajj chuymachtʼapjjeristamwa.+
6 Nayatï parläjja, llakijajj janiw tʼakurkaniti.+
Nayatï jan parlkäjja, llakijajj janirakiw minustʼkaniti.
7 Ukampis jichhajj jan chʼamaniruw Diosajj tukuyitu.+
Jupajj taqe utajankirinakaruw* qʼal tukji.
8 Ukhamarus jumajj* katuntistawa, ukajj mä testigoruw tukuraki.
Nayan wali tʼukhätajasti,* kunjamtï mä testigojj qhanañchañatak saytʼki ukhamarakiw naya contra saytʼasin qhanañchi.
9 Jupan colerasiñapajj jiskʼa jiskʼaw tukjitu, jupajj nayatak wali chuyma ustʼatawa,+naya contraw laka chʼakhanakap tʼurusi.
Naya contra saytʼirejj uñisiñampiw uñtanitu.+
10 Jaqenakajj naya contraw lakanakap wali jachʼa ansatatapjje,+uñisiñampiw ajanut tʼajjllintapjjetu.
Naya contrajj waljaniw jupanakajj tantachtʼasipjje.+
11 Diosajj waynitunakan amparaparuw katuyitu,jan wali jaqenakan amparanakaparuw nuktʼitu.+
12 Nayajj janiw kunats llakiskayätti, ukampis jupaw nayarojj tukjitu.+
Jupajj kunka qhepäjjat katuntasaw usuchjitu,jupajj nayampiw katjasiraki.
13 Jupan flechtʼañatak arco apnaqerinakapajj nayaruw muyuntapjjetu.+
Jupajj riñonanakaj passuyitu,+ janirakiw sinttʼaskituti.
Jupajj oraqeruw vesiculajan umap warti.
14 Jupasti nayarojj mä perqarjamaw kutin kutin qʼasjitu.
Jupajj guerran nuwasiri jaqjamaw naya toqer jankʼak juti.
15 Nayasti jañchejj imtʼasiñatakejj llakisiñ isi* chʼuktʼasta,+nayajj sinti jan walinkapuntwa, janirakiw chʼamanïkti, ukatwa laqʼan qontʼatäskta.+
16 Jachkäwejj ajanujas wila colorakëjjewa,+wali llakitätaj laykojj nayranakajajj tʼojjoranttatawa,*
17 ukampis janiw amparanakajajj khitirus usuchkiti,oración luratajas taqe chuymarakiwa.
18 Oraqe, ¡jan wilaj imantamti!+
¡Naya laykojj arnaqasiskakpan!
19 Ukampis jichhajja, nayan testigojajj alajjpachanakankaskiwa,khititejj naya toqet qhanañchkaspa ukajj wali alto lugaranakankiwa.
20 Amigonakajajj phenqʼachapjjetuwa,+ukañkamasti nayranakajajj Dios nayraqatanwa jacharaki.*+
21 Mä jaqempitaki Diosampitakejj cheqaparjam amtañaw utjañapa,kunjamtï mä chachampitaki jaqe masipampitakejj mä amtajj utjki ukhama.+
22 Mä qhawqha maranakakiw nayan utj-jjetu,ukatsti nayajj sarjjäwa, janirakiw kuttʼanjjäti.+
Notanaka
^ Jan ukajja, “nayamp tantachaski ukanakaruw”.
^ “Jumajj” sasinjja, Diosatwa parlaski.
^ Variante: “tajjätajasti”.
^ “Llakisiñ isi” siski uk glosarion liytʼäta.
^ Jan ukajja, “jiwañ chʼiwiniwa”.
^ Ukajja, “jan ikiniw Diosar uñtapjje” sasaw jaqokipasirakispa.
