Job 31:1-40
31 ”Nayajj mä pacto nayranakajamp lurta.+
Ukhamajj ¿kunjamarak nayajj mä virgen tawaqor jan wali amtamp uñchʼukiriststi?+
2 ¿Kunarak alajjpachankir Diosat katoqeriststi?
¿Kuna herenciarak wali altonkir Taqe Chʼamani Diosat katoqeriststi?
3 ¿Janit jan wal lurki ukarojj jan waltʼäwejj suyki?
¿Janit jan waltʼayapki ukanakarojj jan waltʼäwejj suykaraki?+
4 ¿Janit Diosajj thakinakaj uñjki?+
¿Janit taktʼatanakajsa jakʼat uñjkaraki?
5 ¿Mä kutis nayajj kʼaristti?*
¿Khitiruch mä kutis engañtjja?+
6 Diosajj phoqat balanzampi pestʼitpan,+ukatsti jupajj taqpach chuymamp servitaj amuyani.+
7 Kayunakajatï thakit saranukchi,+chuymajas nayranakajampi apayaschi,+amparanakajas qʼañuchatäjjarakchi ukhajja,
8 kuntï nayajj phawantkä uk yaqhanak manqʼaspan,+kuntï ayruntkä* ukajj jikʼiratäpan.*
9 Chuymajatï yaqha warmimp lunthatatächi,+jaqe masijan punkupan suyjjataraksta ukhajja,+
10 esposajajj yaqha chachatak grano ñutʼjpan,yaqha chachanakarak jupampejj ikintaspan.*+
11 Kuna laykutejj ukasti jan phenqʼani jan walinak lurañäspawa,ukham pantjasiñajj juezanakamp castigatäñaw wakisispa.+
12 Ukajj qʼal nakhantiri qʼal tukjiri* ninar uñtasitäspawa,+taqe kunanakatï nayankki ukanak saphitpach nakhantarakispa.
13 Nayatï sirvientejarusa sirvientajarusa jan cheqaparjam uñjksta,kunapachatï naya contra quejasipjjäna ukhajja,
14 Diosajj nayatak saytʼkani ukhajj ¿kunsa luräjja?
Nayar cuenta maykitani ukhajj ¿kamsasas jaysäjja?+
15 ¿Janit mamajan matrizapan lurkitäna uka Diosajj jupanakar lurkarakïna?+
¿Janit pachpa Diosajj janïr naskayätan ukhajj lurkistänjja?*+
16 Nayatï kuntejj pobrenakajj munapkäna uk jan churañ munkchiyäta,+jan ukajj nayatï viudanakan nayranakap llakit uñnaqaychiyäta,+
17 nayatï manqʼaj sapak manqʼaschiyäta,wajcha wawanakar* jan wajjtʼasa+
18 (kuna laykutejj waynitüskayäta ukhatpachaw wajcha wawajj* nayas tatapäkirista ukham nayamp jiläna,jiskʼa wawatpachwa* nayajj viudar* yanaptʼayäta),
19 maynirutï jan isinïtap layku thayatjam jiwaskir uñjchiyäta,jan ukajj mä pobre jaqer jan kunampi imjjatasiñanïtap uñjchiyäta,+
20 nayatejj ovejajan tʼarwap jan jupar churkchiyäta,ukhamat juntʼurtʼasisajj nayar bendisiñapataki,+
21 nayatï mä wajcha wawar* ampar moqochtʼasis amenazchiyäta,+kunapachatï jupajj markan punkupan nayampi yanaptʼayasiñ munäna ukhajja,*+
22 amparajajj kallachijat* jalaqtpan,amparajajj mujllitpach* pʼakispan.
23 Cheqpachansa nayajj Diosampi jan waltʼayatäñ wal ajjsarayäta,janirakiw kʼajkir qhanap nayraqatan saytʼirjamäkayätti.
24 Nayatï qorir confiyaschiyäta,jan ukajj nayatï ‘¡jumaruw nayajj confiyassma!’+ sasin suma qorir sischiyäta,
25 nayatï wali qamirïsin kusischiyäta,+nayajj jikjjataskta uka walja utjirinakajana,+
26 nayatï intin* qhanatap uñjchiyäta,jan ukajj nayatï alajjpachan wali musparkañ phajjsin onjjtatap uñjchiyäta,+
27 chuymajajj engañjarakchitu,lakajajj ukanakar adorañatak* amparaj jampʼattʼarakchi ukhajja,+
28 ukham pantjasiñajj juezanakampi castigatäñaw wakisispa,ukajj cheqpach Diosar jan uñtʼir tukuñampi sasispawa.
29 ¿Mä kutis enemigojan tukjatäñapat kusistti?+
Jan ukajj ¿jan walin uñjasitapatcha kusistjja?
30 Janipuniw nayajj lakajar juchachasiykti,ni jupar maldisisasa ni jiwañap munasasa.+
31 ¿Janit utajankir chachanakajj‘¿khitis Job chachan manqʼapampejj* jan sistʼaskäna?’ sasin sapki?+
32 Janiw ni mä jan uñtʼatas* arumajj anqan ikkänti,+nayajj viajir jaqetakis punkuj llawirirïtwa.
33 ¿Nayajj yaqha chachanakjamat juchanakaj mä kutis imtʼastjja?+
¿Isijan bolsilloparuch pantjasitaj imtʼastjja?
34 ¿Walja jaqenakaruch ajjsartjja?
Jan ukajj ¿yaqha familianakamp phenqʼachatäñach ajjsarayitu,ukhamat nayan amuktʼañajataki, anqar mistuñs ajjsarañajataki?
35 ¡Maynikis nayar istʼitaspa!+
Nayajj sutijampiw kuntï siskta uk firmjjatirista.*
¡Taqe Chʼamani Diosajj jaysitpan!+
¡Nayar juchañchkitu ukajj mä documentorukis juchañchatanakaj qellqtʼasapäna!
36 Kallachij patjjaruw uk apirista,mä coronar uñtat pʼeqej patjjar uchasirista.
37 Sapa taktʼatajatwa Diosarojj cuenta churirista,mä principjamaw juparojj confianzampi jakʼachasirista.
38 Oraqejatï naya contra arnaqaschi,taqe sukanakapas juntuk jachapjjarakchi,
39 nayatï achunakap jan kun pagas manqʼsta,+jan ukajj nayatï uka oraqen dueñonakapar llakisiysta ukhajja,+
40 nayatakejj trigo jilañat sipans chʼapinak jilarapitpan,cebada lantejj thujsa qoranak jilarapitpan”.
Akjaruw Job chachan arunakapajj tukusjje.
Notanaka
^ Ukajja, “¿Mä kutis kʼarisiri jaqenakamp sarnaqtti?” sasaw jaqokipasirakispa.
^ Variante: “mallkintkä”.
^ Jan ukajja, “nayat jutir wawanakajj apsutäpjjpan”.
^ Hebreo arunjja, “yaqha chachanakarak jupa patjjan qonqortʼasipjjpan”.
^ Hebreo arunjja, “qʼal tukjañkam manqʼantiri”.
^ Hebreo arunjja, “¿Janit jupa pachpajj matrizan lurkistänjja?”.
^ Variante: “iñu wawanakar”.
^ Variante: “iñu wawajj”. Hebreo arunjja, “jupajj”.
^ Hebreo arunjja, “jupar”.
^ Hebreo arunjja, “mamajan matrizapatpachwa”.
^ Variante: “iñu wawar”.
^ Ukajja, “kunapachatï nayajj markan punkupan apoyonïtaj uñjayäta ukhajja” sasaw jaqokipasirakispa.
^ Hebreo arunjja, “omoplatojat”.
^ Jan ukajja, “chʼakha moqojj jaljtki ukhatpach; patjjankir chʼakhatpach”.
^ Hebreo arunjja, “qhanan”.
^ Jan ukajja, “yupaychañatak”.
^ Hebreo arunjja, “aychapampejj”.
^ Jan ukajja, “mä extranjeros”.
^ Jan ukajja, “Akäskiw firmajajja”.
