Job 32:1-22
32 Ukhamajj niyakejjay Job chachajj cheqap jaqëtapat jan payachaskchïnjja,*+ uka kimsa chachanakajj janiw juparojj jukʼamp jaysjjapjjänti.
2 Ukampis Ram chachan familiapat jutirïkäna, Barakel sat buzita+ chachan yoqapäkarakïna uka Elihú sat chachajj walpun colertʼasïna. Diosat sipans Job chachas razonanïkaspa ukham uñachtʼayañ munatapatwa Elihú chachajj Job chachatak wal coleräna.+
3 Job chachan kimsa amigonakapatakis walpun colertʼasirakïna, kuna laykutejj jan kun kamsirjamäsajj Diosas juchanïkaspa ukhamwa jupanakajj parlapjjäna.+
4 Jupat sipans jilïr jaqenakäpjjatap laykusti, Elihú chachajj Job chachar jaysañatakejj suytʼaskänwa.+
5 Elihú chachajj uka kimsa chachanakan jan kun kamsirjamäpjjatap uñjasajj jukʼampiw colerasïna.
6 Ukatwa Barakel sat buzita chachan Elihú sat yoqapajj akham sasin parlañ qalltäna:
“Nayajj waynakïsktwa,*jumanakajj jilïr jaqenakäpjjtawa.+
Ukatwa jumanakar respetasajj jan kuns kamskayätti,+janirakiw kuntï nayajj yatkta ukanak sapkayäsmati.
7 Nayajj akham amuytʼasiyäta: ‘Jilïr jaqenakay parlapjjpan,walja maranakanïpki ukanakay yatiñjjat parlapjjpan’ sasa.
8 Ukampis Diosan espiritupäki,Taqe Chʼamani Diosan samanapäkaraki, ukaw jaqenakarojj amuytʼasirïñ churi.+
9 Jaqenakajj janiw walja maranïpjjatap* laykukejj yatiñanïpkiti,janirakiw jilïr jaqëpjjatap laykojj kunatï cheqapäki ukanak amuyapkiti.+
10 Ukatwa akham sista: ‘Istʼita,kuntï nayajj yatkta uk jumar sarakïma’ sasa.
11 Nayajj jumanakan parlapjjañam suyaskayäta,amuyunakam istʼaskarakiyäta,+ukañkamasti jumanakajj kuns parlapjjäta ukanak amuytʼasipkayätajja.+
12 Nayajj wali amuyumpiw istʼasipkayäsmajja,ukampirus jumanakat janiw ni maynis Job chachan pantjasitap uñachtʼayañ puedipkayätati,*janirakiw arsutanakaparus jaysañ puedipkayätati.
13 Ukhamasti jan jumanakajj akham sapjjamti: ‘Nanakaw yatiñ jikjjatapjjta,Diosaw juparojj cheqañchi, janiw mä jaqejja’ sasa.
14 Job chachan arunakapajj janiw naya conträkänti,ukhamajj janiw juparojj jumanakan arsutanakamamp jayskäti.
15 Jupanakajj inakiw musparjjapjje, janiw kamsasas jaysirjamäjjapjjeti,janirakiw kuns arsurjamäjjapjjeti.
16 Nayajj suytʼaraktwa, ukampis jupanakajj janiw jukʼamp parljjapjjeti.
Jupanakajj ukhamakiw akankasipki, janirakiw kamsasas jaysapkiti.
17 Ukhamajj nayaw jaysarakëjja,kuntï nayajj yatkta uk arsurakëjja,
18 nayanjja walja arsuñanakaw utjitu,naya manqhankki uka espíritu santow nayan arsuñajatak obliguitu.
19 Naya manqhansti jan kunas mistkir wali llupantat vinor uñtasitätwa,niya phallañampïki uka machaq vino wayaqar uñtasita.+
20 ¡Nayan samartʼañajatakejj arstʼayapjjakitaya!
Jaysañatakejj lakajs jistʼaräwa.
21 Janiw khiti toqetsa saytʼaskäti,+ni khiti jaqerus jachʼañchkäti.*
22 Janiw yaqhanakar kunjam jachʼañchañs yatkti,nayatï uk luriristjja, Luririjajj jankʼakiw chhaqtayitaspa.
Notanaka
^ Jan ukajja, “niyakejjay Job chachajj jupa pachpatak cheqap jaqëchïnjja”.
^ Hebreo arunjja, “urunakajan jiskʼakïsktwa”.
^ Jan ukajja, “walja urunïpjjatap”.
^ Jan ukajja, “janiw ni maynis Job chachar cheqañchañ puedipkayätati”.
^ Jan ukajja, “ni khitir jachʼañchir arsa arskäti”.
