Job 34:1-37
34 Ukhamasti Elihú chachajj akham saskakïnwa:
2 “Yatiñan jaqenaka, arunakaj istʼapjjeta;jumanakajj amuytʼani jaqenakäpjjtawa, istʼapjjeta.
3 Jiñchusti arunak amuytʼiwa,kunjamtï lajjrajj manqʼanak malltʼki ukhama.
4 Kunatï cheqapäki uk jiwas pachpa amtañäni,kunatï sumäki uk jiwasanak pachpa amtarakiñäni.
5 Kuna laykutejj Job chachajj akham siwa: ‘Nayajj razonanïtwa,+ukampis Diosajj janiw cheqaparjam uñjkituti.+
6 ¿Kunatï juiciojan amtasiñapäki uka toqet kʼarinak parlañajäspati?
Nayajj janis kuna juchsa lurkstjja, heridajajj janiw jakthapkiti’+ sasa.
7 ¿Job chachar uñtasit yaqha chachajj utjaspati?
¿Jupjamajj umar uñtasit insultonak umirejj utjaspati?
8 Jupajj jan wali luririnakampiw chikachasi,jan wali jaqenakampiw sarnaqe.+
9 Akham satap layku: ‘Mä jaqejj Diosar kusisiyañ munasajja,janiw kunsa jikjjatkiti’+ sasa.
10 Ukhamajj istʼapjjeta, amuytʼasir* jaqenaka:
¡Janipuniw kunäkipansa cheqpach Diosajj kunatï jan walïki uk lurkaspati!+
¡Janipuniw kunäkipansa Taqe Chʼamani Diosajj kunatï jan cheqapäki uk lurkaspati!+
11 Kuna laykutejj lurataparjamaw jaqerojj kuttʼayani,+kuntï sarnaqatapampejj jikjjatkani ukampiw pagani.
12 Cheqpachansa Diosajj janiw jan wal lurkiti,+Taqe Chʼamani Diosajj janiw kunatï cheqapäki uk qʼewjkiti.+
13 ¿Khitis Diosarojj aka oraqjjar uñjañapatak uchi?
¿Khitis juparojj taqpach mundjjar* uttʼayi?
14 Jupatï jaqenak contra saytʼaspa,jupatï espiritupsa samanapsa jupanakat apaqaspa ukhajja,+
15 taqpach jaqenakaw jiwarapjjaspa,jaqenakajj laqʼaruw kuttʼjjapjjaspa.+
16 Ukhamajj jumatï amuytʼasirïstajja, ak istʼam,kuntï nayajj sisksma uk wali amuyump istʼita.
17 ¿Kunatï cheqapäki ukar uñisirejj apnaqañ puedispati?
Jan ukajj ¿cheqap jaqëki uka munañan jaqeruch juchañchasma?
18 ¿Mä reyirojj ‘jan kunatak servirïtawa’ sasmati?
Jan ukajj ¿pʼeqtʼirinakaruch ‘jan wali jaqenakäpjjtawa’ sasin sasma?+
19 Diosajj janiw principenak toqet saytʼaskiti,janirakiw qamirirojj pobret sipans jukʼamp sum uñjkiti,+taqe jupanakajj jupan luratäpjjatap layku.+
20 Jaqenakajj mä akatjamatak jiwarapjje,+ chika arumaru,+jupanakajj wal khatatipjje, chhaqtjjapjjarakiwa.
Munañani jaqenakas chhaqtjjapjjewa, ukampis janiw jaqenakan amparanakapampejja.+
21 Kuna laykutejj Diosan nayranakapajj jaqen thakinakap sum uñji,+taqe kuntï jupajj lurki ukanaks uñjarakiwa.
22 Janiw chʼamakansa ni wali chʼamak chʼiwinsajan wali luririnakajj imantasipkaspati.+
23 Diosajj janiw ni mä jaqetakis mä fecha uchkiti,ukhamat jupa nayraqatan mä juicion uñstañapataki.
24 Jupajj jan kun yatjjatasaw munañani jaqenakar tukji,yaqhanakaruw jupanak lantejj ucharaki.+
25 Jupajj kuntï lurasipki uk yatiwa,+arumaruw jupanakarojj atipji, tukjarakiwa.+
26 Jupanakarojj jan walinak lurapjjatap laykuw nuwanti,taqenin uñjkata,+
27 jupar arkañat kuteqtapjjatap layku,+janirak mandamientonakapat ni maysa phoqapjjatap layku.+
28 Uka jan wali jaqenakajj pobrenakaruw yanaptʼayasiñatak jachʼat arnaqasiyapjje,ukhamatwa jupajj jan yanapirinïpki ukanakar istʼi.+
29 Kunapachatï Diosajj amuktʼi ukhajj ¿khitirak jupar juchañchaspasti?
Ajanup imantasi ukhajj ¿khitirak jupar uñjaspasti?
Mä markatsa imantasiskpan jan ukajj mä jaqetsa imantasiskpan, igualakïskaniwa:
30 mä jan wali jaqejj* janiw apnaqkaspati,+ni markarus sipitanakar puriykaspati.
31 ¿Maynejj Diosar akham saspati:
‘Nayajj janiw kuna jan wals lurkti, ukampis castigataw uñjasta,+
32 kuntï nayajj jan yatkta ukay yatichtʼita,nayatï jan wal lurstjja, janiw mayampis uk lurjjäti’ sasa?
33 Kuntï jupajj Juezjamajj amtki uk janis jumajj munkstajja, ¿jupajj amuyumarjamat jumar kuttʼayañapäspa?
Jumaw uk amtjjañama, janiw nayajja,ukhamajj kuntï jumajj wali sum yatkta ukay awistʼita.
34 Amuytʼani* jaqenakajj sapjjetaniwa,kawkïr yatiñani jaqetejj istʼkitani ukajj akham sitaniwa:
35 ‘Job chachajj jan yatisaw parli,+arunakapajj jan suma amuytʼasirïtap uñachtʼayi’ sasa.
36 ¡Job chachajj* phoqatpach yantʼatäpan,jan wali jaqenak kikpa jaysatap layku!
37 Jucha lurataparojj kutkatasiñampiw jupajj yaptʼasi.+
¡Jupajj jiskʼachasaw nanak nayraqatan amparanakap tʼajjllisi!
¡Jukʼamp arunakampiw cheqpach Dios contrajj parlaraki!”.+
Notanaka
^ Hebreo arunjja, “chuymani”.
^ Jan ukajja, “oraqen jakirinakjjar”.
^ Jan ukajja, “mä apostatajj”.
^ Hebreo arunjja, “Chuymani”.
^ Ukajja, “Tatay, Job chachajj” sasaw jaqokipasirakispa.
