Job 38:1-41
38 Ukatjja Jehová Diosajj mä jachʼa thaya+ taypiw Job chacharojj jaysäna, akham sasa:
2 “¿Khitis aka jaqejj nayan amtanakaj qʼewjiri,jan yatiñamp parlirejja?+
3 Mirä amp suma, mä chʼaman chachjamay wakichtʼasim,nayaw jumar jisktʼäma, jumasti jaysarakitätawa.
4 ¿Jumajj kawkinkayätasa nayajj oraqen cimientonakap uchkayäta ukapachajja?+
Jumatï amuytʼanïstajja, jaysitaya.
5 Jumatï yatstajja, ¿khitis oraqen medidanakap uttʼayäna?
Jan ukajj ¿khitis mediñatak mä pitamp* oraq midtʼänjja?
6 ¿Oraqen columnanakapajj kunjjar uttʼayatasa?
Jan ukajj ¿khitis oraqen esquin jachʼa qalap uchänjja,+
7 kunapachatï willjta warawaranakajj+ taqeni wali kusisit arnaqasipkäna,Diosan taqe wawanakapajj*+ jachʼañchañatak jachʼat arnaqasipjjäna ukapachajja?
8 ¿Khitis lamar qotarojj punkunakamp llawintäna,+kunapachatï matrizat chʼamamp mistkäna,
9 nayajj qenayanakamp isthapiykayäta,chʼamak qenayanakamp kʼiruntkayäta,*
10 qorpap uttʼaykayäta,trancanakapsa punkunakapsa lugarapar uchkayäta,+
11 ‘aka cheqkamaw purisma, janiw jukʼamp khurirojja,juman jachʼa oladanakamajj aka cheqkamaw purini’+ sasin nayajj siskayäta ukapachajja?
12 ¿Mä kutis* jumajj alwarojj ordentati,jan ukajj qhantatiruch lugarap uñtʼayta,+
13 ukhamat oraqen thiyanakap* katuñapataki,jan wali jaqenakarus oraqet thalanukuñapataki?+
14 Kunjamtï mä moldejj ñeqʼer mayjtʼayki ukhamarakiw qhanajj oraqer mayjtʼayi,taqe kunanakatï oraqen utjki ukanakajj isin adornopjamaw qhan uñsti.
15 Ukampis jan wali jaqenakan qhanapajj jupanakat apaqatawa,janirakiw jaqenakarojj jukʼamp usuchjjapjjaspati.*
16 ¿Jumajj lamar qotan uma jalsunakapkamat saraqta?
Jan ukajj ¿wali manqha umanakcha sum uñakipta?+
17 ¿Jiwañan punkunakap+ jumarojj uñachtʼayapjjtamti?
Jan ukajj ¿wali chʼamakan punkunakapcha* uñjta?+
18 ¿Oraqejj qhawqha jachʼasa uk sumti amuyta?+
Jumatï taqe ukanak yatstajja, qhanañchitaya.
19 ¿Kawkjansa qhanajj jaki?+
¿Kawkjas chʼamakan lugarapajja,
20 ukhamat jumajj lugarapar apañamataki,utapar apki uka thakinaks yatiñamataki?
21 ¿Jumajj uka tiemponti nasjjayäta?
¿Maranakamajj* waljati?
¿Ukatti jumajj uk yatta?
22 ¿Jumajj khunu imañ utanakar manttati,+jan ukajj chhijchhi imañ utanakcha uñjta?+
23 Nayajj tʼaqesiña tiempotakiw ukanak wakichta,kunürutï nuwasiñasa guerrasa utjkani uka urutaki.+
24 ¿Kawkja cheqatsa qhanajj* saratati?
¿Kawkja cheqatsa inti jalsu toqet jutir thayajj oraqjjar thaytʼani?+
25 ¿Khitis alajjpachankir walja umanakatakejj mä canal jistʼari?
¿Khitis qʼejjo qʼejjotakis chʼiyar qenayatakis mä thaki luraraki?+
26 ¿Khitis kawkjantï jan khiti jaqes jakki uka cheqarojj jall purintayi,kawkjantï jaqenakajj jan utjki uka wasararu?+
27 ¿Khitis qʼala tukjatäki uka chʼusa oraqerojj chʼaranji,pastonaks jilayaraki?+
28 ¿Jallojj awkiniti?+
Jan ukajj ¿khitich sullan awkipajja?+
29 ¿Khitis chhullunkhayan mamapajja?
¿Khitis alajjpachat jutki uka chhullunkrantat sullar luri?+
30 ¿Khitis umarojj qalanakampis imjjatkaspa ukham imjjati,wali manqha umanakan patjjaps chhullunktʼayi?+
31 ¿Kimá* sat warawaranakan pitanakap* chintʼasmati?
Jan ukajj ¿Kesil* sat warawaranakan pitanakapcha jararasma?+
32 ¿Jumajj horasaparut warawaranakarojj* mistuyasma?
Jan ukajj ¿Ash* sat warawaranakaruch wawanakapamp chik irpasma?
33 ¿Alajjpachanak apnaqki uka leyinak jumajj uñtʼtati?+
Jan ukajj ¿ukanakan* munañapcha oraqjjar uttʼayasma?
34 ¿Jumajj qenayanakkamat arum puriyasma,ukhamat jumjjarojj jallun wal purintañapataki?+
35 ¿Jumajj lliju llijunak khitasmati?
¿Kuttʼanisajj ‘¡akankasipktwa!’ sapjjätamti?
36 ¿Khitis qenayanak taypin* yatiñ uchi?+
Jan ukajj ¿khitich alajjpacharojj* amuytʼasirïñ churi?+
37 ¿Khitis qenayanak jaktʼañatakejj wali yatiñanejja?
Jan ukajj ¿khitich alajjpachankir uma wakullanak wartaspa?+
38 ¿Khitis laqʼarojj ñeqʼer tukuyaspa,khulanakarus jupanakkam mayachthapispa?
39 ¿Jumajj mä leonan manqʼañapatakejj kuns katjasmati?
Jan ukajj ¿chʼamani leonanakaruch sistʼasiñkam manqʼayasma?+
40 Kunapachatï leonanakajj imantasiñ lugaranakapan kʼumtʼatäsipki,jan ukajj mä akatjamat katjañatak jiptʼatäsipki ukhajja, ¿jupanakar manqʼayasmati?
41 ¿Khitis cuervo jamachʼirojj manqʼa churi,+kunapachatï chhiwchhinakapajj yanaptʼayasiñatak Diosar artʼasipjje,jan manqʼañ utjipans uks aks muyupjje ukapachajja?
Notanaka
^ Variante: “kawuyamp”.
^ Jan ukajja, “angelanakapajj”.
^ Variante: “kʼiluntkayäta”.
^ Hebreo arunjja, “Juman urunakaman”.
^ Variante: “qawayanakap”.
^ Hebreo arunjja, “aytat amparanakapajj pʼakjatawa”.
^ Hebreo arunjja, “jiwañan chʼiwipcha”.
^ Hebreo arunjja, “Urunakamajj”.
^ Ukajja, “lliju llijojj” sasaw jaqokipasirakispa.
^ Variante: “kawuyanakap”.
^ Ukajja, inas Orión sat constelacionat parlaskchi.
^ Ukajja, inas Tauro sat constelacionankki uka Pléyades sat warawaranakapat parlaskchi. Kimá, Kesil sutinakajj grup grupo warawaranakan sutinakapawa, oraqetpach uñtatajj animalanakaru ukhamarak kunaymaninakar uñtasitanakaw uñjasispa.
^ Jan ukajja, “mä constelacionarojj”. Hebreo arunjja, “Mazarot constelacionarojj”.
^ Ukajja, inas Osa Mayor sat constelacionat parlaskchi.
^ Ukajja, “Diosan” sasaw jaqokipasirakispa.
^ Ukajja, “Khitis jaqerojj” sasaw jaqokipasirakispa.
^ Ukajja, “amuyurojj” sasaw jaqokipasirakispa.
