Job 42:1-17
42 Ukatsti Job chachajj akham sasaw Jehová Diosar jaysäna:
2 “Jichhaw yatta, jumajj taqe kun lurasma,kuntï jumajj amtkta uk phoqapuntawa.+
3 Jumajj akham sistawa: ‘¿Khitis aka jaqejj nayan amtanakaj jan yatiñamp qʼewjirejja?’+ sasa.
Cheqas nayajj jan amuytʼasisaw parlayäta,kunanakatï nayatak wali musparkañäki, kunanaktï jan amuytʼkayäta ukanakata.+
4 Jumajj akham sayätawa: ‘Mirä amp sum istʼita, nayaw parläjja.
Nayaw jumar jisktʼäma, jumasti jaysarakitätawa’+ sasa.
5 Jiñchunakajajj jumat parlir istʼapjjänwa,ukampis jichhajj pachpa nayranakajampiw jumar uñjsmajja.
6 Ukatwa nayajj ukanak arsutajat arrepentista,+uk uñachtʼayañatakejj laqʼa patjjana qhella patjjan qontʼasirakta”+ sasa.
7 Kunapachatï Jehová Diosajj Job chachamp parlañ tukuyjjäna ukhajja, Elifaz sat temanita chacharojj akham sasaw Jehová Diosajj säna:
“Jumatakis juman pä amigonakamatakis wali coleratapunïtwa,+ janiw jumanakajj nayjjat kunatï cheqäki uk parlapktati,+ kunjamtï Job servirijajj parlki ukhama.
8 Ukhamajj paqallqo toronakampi paqallqo orqo ovejanakampi Job servirijan ukar sarapjjam, ukatsti nakhantayat sacrificio juchanakamat loqtapjjam. Job servirijajj jumanakatakiw oración lurarakini.+ Nayasti jupan mayitaparojj istʼapunïwa, janirakiw jumanakarojj jan amuytʼasirïpjjatamat phenqʼachapkämati, jumanakajj janiw nayjjat kunatï cheqäki uk parlapktati, kunjamtï Job servirijajj parlki ukhama” sasa.
9 Ukhamasti Elifaz sat temanita chachasa, Bildad sat suhita chachasa, Zofar sat naamatita chachasa, kuntï Jehová Diosajj jupanakar siskäna ukanak luririw sarapjjäna. Jehová Diosasti, Job chachan oración lurataparojj istʼarakïnwa.
10 Job chachajj amigonakapatak oración lurarapïna uka qhepatsti,+ Jehová Diosajj Job chachan tʼaqesiñap chhaqtayjjänwa,+ wasitat jupar qamiriptayjjarakïna. Jehová Diosajj kunatï Job chachan nayrajj utjkäna ukanakat sipans mä ukhamp churjjäna.+
11 Taqe jilanakapasa, kullakanakapasa, taqe nayra amigonakapas+ Job chachan ukaruw jutapjjäna, jupampiw utapan manqtʼasipjjarakïna. Jupanakajj Job chachat sinttʼasipjjänwa, kuna jan waltʼäwinaktï Jehová Diosajj pasañapatak jupar jaytkäna taqe ukanakats chuymachtʼapjjarakïnwa. Sapa mayniw Job chacharojj qollqempi mä qori anillompi regalapjjäna.
12 Ukhamaw Jehová Diosajj Job chachan vidaparojj nayra maranakapat sipans qhepa maranakap bendisïna.+ Job chachajj 14.000 ovejanakani, 6.000 camellonakani, 2.000 vacanakani,* 1.000 asnonakani* ukhamäjjänwa.+
13 Ukhamarus yaqha paqallqo yoqanakanëjjänwa, yaqha kimsa phuchanakampi.+
14 Nayrïrejj Jemimá satänwa, payïristi Quesías satänwa, kimsïristi Querén-Hapuc satarakïnwa.
15 Taqe uka oraqensti janiw Job chachan phuchanakapjam wali suma uñnaqtʼani warminakajj utjkänti, Job tatapajj jilanakapamp chikaw mä herencia churarakïna.
16 Taqe ukanak qhepatsti, Job chachajj 140 maranakampiw jakäna, wawanakaparusa, allchhinakaparusa, allchhinakapan allchhinakaparus uñjawärakïnwa.
17 Qheparusti Job chachajj jiwjjänwa, walja maranak wali sum jakasisaw jiwjjarakïna.
