Jueces 16:1-31
16 Mä kutejja Gaza markaruw Sansón chachajj saräna, ukansti mä prostituta warmiruw uñjäna, jupan utaparuw mantäna.
2 Ukatjja Gaza markankirinakarojj akham sasaw yatiyapjjäna: “Sansón chachaw akanki” sasa. Ukatwa kawkjankkäntï jupajj uka lugar muyuntapjjäna, mä akatjamat katjañatakejj markan punkupanwa arum paqar imantasipjjarakïna. Jupanakajj arum paqaraw pachpankapjjäna, jupanakkamaw akham sasipjjarakïna: “Qhanjtankani ukhaw jupar jiwayañäni” sasa.
3 Ukampis Sansonajj chika arumkamaw ukan iktʼäna. Chika arumar sartasasti, markan punkupsa, punkun pä postenakapsa trancamppach kallsüna. Kallachipjjar qʼepjjarusasti Hebrón marka uñkatasinkki uka qollu patjjaruw qʼeptʼat makatarakïna.
4 Uka qhepatsti Sansonajj Sorec sat vallenkir Dalila sutini warmitwa wal enamorasïna.+
5 Ukatwa filisteonakan apnaqerinakapajj uka warmin ukar sarapjjäna, warmirusti akham sapjjänwa: “Kunas juparojj wali chʼamanir tukuyi, kunjamatsa jupar katuntsna, ñachʼantsna,* munañasar apnaqaraksna uk yatiñatakejj engañomp jupar arsuyam.+ Ukham luratamatjja, sapa mayniw 1.100 qollqe metalanak churapjjäma” sasa.
6 Ukatjja Dalilajj akham sasaw Sansonar säna: “Mirä amp suma, sitaya, ¿kawkitsa chʼamamajj juti? ¿Jumar atipjañatakejj kunampis ñachʼantapjjeristam?”* sasa.
7 Sansonajj jupar sarakïnwa: “Jan wañsuta paqallqo machaq lazonakampitejj* ñachʼantapjjetaspa* ukhajja, janiw wali chʼamanëjjeristti, mayni chachanakjamakëjjeristwa” sasa.
8 Ukatwa filisteonakan apnaqerinakapajj jan wañsuta paqallqo machaq lazonak warmin ukar apapjjäna, ukanakampiw Dalilajj Sansonar ñachʼantarakïna.*
9 Jupanakasti mä akatjamat Sansonar katuntañatakiw Dalilan yaqha cuartopan imantasipjjäna, warmisti akham sasaw artʼarakïna: “¡Sansón, filisteonakaw akankapjje!” sasa. Ukatjja mayak jupajj lazonak tʼaqaräna, kunjamtï mä lino hilojj ninar jakʼachatajj mayak nakhantki ukhama.+ Kunjamatsa jupajj wali chʼamanïna ukajj janirakiw yatiskänti.
10 Ukatjja Dalilajj akham sasaw Sansonar säna: “Jumajj burlasistawa, janiw cheq parlkistati. Mirä amp suma, jichhajj sitaya, ¿kunampis ñachʼantapjjerisma?”* sasa.
11 Jupasti sarakïnwa: “Trabajiñatak jan aptatäki uka machaq pitanakampitejj* ñachʼantapjjetasmajja,* janiw wali chʼamanëjjeristti, mayni chachanakjamakëjjeristwa” sasa.
12 Ukatwa Dalilajj machaq pitanak* aptasin Sansonar ñachʼantäna,* ukatjja akham sasaw artʼarakïna: “¡Sansón, filisteonakaw akankapjje!” sasa. (Ukañkamasti filisteonakan apnaqerinakapajj warmin yaqha cuartopanwa imantasisipkäna). Ukhamaruw Sansonajj ñachʼantatäkäna uka pitanak mä hilökaspas ukhamak tʼaqaräna.+
13 Uka pasatatjja Dalilajj akham sasaw Sansonar sarakïna: “Jumajj burlasiskakistawa, janiw cheq parlkistati.+ Sitaya, ¿kunampis ñachʼantapjjerisma?”* sasa. Jupasti sarakïnwa: “Mä telarar uchat chʼankhapampiw paqallqo kʼananakaj kʼantʼitasma” sasa.
14 Ukatwa Sansonan kʼananakap mä chʼakurump leqʼentasajj akham sasin Dalilajj artʼäna: “¡Sansón, filisteonakaw akankapjje!” sasa. Ukhamaruw jupajj ikit sartasin telaran chʼakurup waysüna, chʼankhanaksa tʼaqaräna.
15 Jichhasti Dalilajj akham sasaw sarakïna: “Jumajj janiw nayar confiykistati. ¿Kunjamarak ‘nayajj munassmawa’+ sasin sitasmasti? Aka kimsa kutiw burlasistajja, janirakiw kawkitsa jachʼa chʼamamajj juti uk awiskistati”+ sasa.
16 Dalilajj urut urutjamaw jupar arsuyañ munasajj colerayäna, Sansonajj janirakiw aguantirjamäjjänti.+
17 Ukatwa jupajj warmir confiyasajj akham säna: “Janiw kunapachas nayajj ñikʼut khuchurayasirïkti, nayajj nasïwitpach* Diosan nazareopätwa.+ Ñikʼutajtï khuchurapjjetaspajja, janiw chʼamanëjjeristti, mayni chachanakjamakiw tukjjerista” sasa.
18 Sansonajj juparu confiyatap amuyasajja, jankʼakiw Dalilajj filisteonakan apnaqerinakapar jawsayäna,+ akham sasa: “Jichhakuch jutapjjam, jupajj nayaruw confiyitu” sasa. Ukatwa filisteonakan apnaqerinakapajj warmin ukar makatanisajj qollq apanipjjäna.
19 Dalilajj jarphipjjaruw Sansonar ikjayäna. Ukatjja mä chachar jawsasaw paqallqo kʼananakap khuchurayäna. Sansonan chʼamapajj chhaqtaskatap laykojja, warmejj jupar atipjänwa.
20 Ukatjja warmejj akham sasaw artʼäna: “¡Sansón, filisteonakaw akankapjje!” sasa. Sansonasti ikit sartasajj akham sänwa: “Nayajj mayürunakjamaw escapäjja”+ sasa. Ukampis Sansonajj Jehová Diosan jupar jaytjatap janiw amuyaskänti.
21 Ukatwa filisteonakajj Sansonar katuntasin nayranakap apsupjjäna. Ukatjja Gaza markar apaqanisaw cobret lurat cadenanakamp chinuntapjjäna, juparojj carcelan mä molino qala muyuyañapatakiw uchapjjäna.
22 Ukampis ñikʼut mururatatjja, ñikʼutapajj wasitat jilantjjäna.+
23 Filisteonakan apnaqerinakapajja, fiesta lurañataki ukhamarak Dagón+ sat diosapar sacrificionak loqtañatakiw tantachtʼasipjjäna, jupanakajj akham sasipkänwa: “¡Sansón enemigosarojj diosasaw amparasar katuyistu!” sasa.
24 Markankirinakajj idolopar uñjapjjäna ukhajja, diosaparojj akham sasaw jachʼañchapjjäna: “Enemigosarojj diosasaw amparasar katuyistu, Sansonajj markasaruw qʼal tukjäna,+ jiwasanakat waljaniruw jiwarayarakïna”+ sasa.
25 Wali kusisitäpjjatap laykojja, jupanakajj akham sapjjänwa: “¡Sansón chachar irptanipjjam, jupat larusiñataki!” sasa. Ukatwa Sansonar carcelat irptanisajj jupat larusipjjäna, columnanak taypiruw saytʼayapjjarakïna.
26 Ukatjja amparapat katuri wayniturojj akham sasaw Sansonajj säna: “Utar katjjäsir columnanakay llamktʼayita, ukaruw apoytʼasiñ munta” sasa.
27 (Uka utajj chachanakampi warminakampi phoqantatänwa. Filisteonakan taqe apnaqerinakapas ukankapjjänwa, techo patjjansti niya 3.000 chachanakampi warminakampiw utjäna, jupanakajj Sansonaruw jaqenak laruyaskir uñchʼukisipkäna).
28 Sansón+ chachasti Jehová Diosaruw akham sasin ruwtʼasïna: “Taqe Kunjjar Munañani Jehová Dios Tata, nayat amtasikimaya, mirä amp suma, chʼam churakitaya,+ mirä amp suma, jichha mä kutimpiki, Diosajay, mä nayrajataksay filisteonakat vengasëjja”+ sasa.
29 Ukatjja Sansonajj uka uta katjjäsir pä columnanak taypiruw saytʼasïna, kupi amparap mä toqeru chʼeqa amparap maysa toqer loqatatasasti purap columnanakaruw apoytʼasïna.
30 Sansonajj akham sasaw artʼasirakïna: “¡Filisteonakajj nayamp chikay jiwarpan!” sasa. Ukatjja taqe chʼamapampiw columnanak nuktʼäna, uka utasti filisteonakan apnaqerinakapjjaru ukhamarak ukankir taqe jaqenakjjaruw alljjattäna.+ Ukhamatwa jupajj jakkäna uka urunakat sipansa, jiwkäna uka urojj walja jaqenakar jiwarayäna.+
31 Uka qhepatjja jilanakapaw tatapan taqe familiapamp chikajj jiwat cuerpop aptaniñatak saraqapjjäna. Jupanakasti apkatanisajj Manóah+ sat tatapan sepulturaparuw imtʼjjapjjäna, Zorá,+ Estaol sat markanak taypina. Sansonajj 20 maranakaw Israelan juezapäna.+
Notanaka
^ Variante: “chʼoqantsna”.
^ Variante: “chʼoqantapjjeristam”.
^ Jan ukajja, “Flechtʼañatak arcor uchaski uka paqallqo jan wañsut ankunakampitejj”.
^ Variante: “chʼoqantapjjetaspa”.
^ Variante: “chʼoqantarakïna”.
^ Variante: “chʼoqantapjjerisma”.
^ Variante: “kawuyanakampitejj”.
^ Variante: “chʼoqantapjjetasmajja”.
^ Variante: “kawuyanak”.
^ Variante: “chʼoqantäna”.
^ Variante: “chʼoqantapjjerisma”.
^ Hebreo arunjja, “mamajan matrizapatpach”.
