Jueces 3:1-31
3 Kawkïr israelitanakatejj Canaán oraqena guerran jan nuwasipkäna taqe ukanakar yantʼañatakiw Jehová Diosajj uka oraqenakan jakapjjañapatak yaqhep markanak jaytäna.+
2 (Ukajj jupanakjjar jutir israelitanakajj guerran nuwasiñajj kunjamas uk yatipjjañapatakïnwa, jupanakajj janipuniw uka nayrajj khitimpis nuwasiñ yatipkänti).
3 Aka jaqenakaruw jupajj jaytäna: filisteonakan phesqa apnaqerinakaparu,+ taqpach cananeonakaru, sidonionakaru,+ Líbano+ qollunakan jakir heveonakaru,+ Baal-Hermón qollut Lebó-Hamat+ cheqakama.*
4 Uka markankirinakajj Israel markar yantʼañatakïnwa, ukhamat kawkïr mandamientonaktï Jehová Diosajj Moisés taypi israelitanakan awkinakapar churkäna ukanak phoqapjjaniti janicha uk yatiñataki.+
5 Ukatwa israelitanakajj cananeonaka,+ hititanaka, amorreonaka, perizitanaka, heveonaka ukhamarak jebuseonak taypin jakapjjäna.
6 Israelitanakajj uka markankirinakan phuchanakapwa warmipäñapatak katupjjäna, phuchanakapsti uka markankirinakan yoqanakaparuw churapjjarakïna, ukatjja diosanakaparuw serviñ qalltapjjarakïna.+
7 Israelitanakajj kunatï Jehová Diosatakejj jan walïki ukanakwa lurapjjäna, Jehová Diosapat armtʼasipjjänwa, Baal+ diosanakaru ukhamarak uka markanakan sagrado postenakaruw+ adorapjjäna.*
8 Ukatwa Jehová Diosajj israelitanakatak wal coleräna, Mesopotamia* cheqankir Cusán-Risataim reyin amparaparuw katuyarakïna.* Israelitanakajj kimsaqallqo maranakaw Cusán-Risataim reyir servipjjäna.
9 Kunapachatï israelitanakajj yanaptʼayasiñatak Jehová Diosat artʼasipjjäna+ ukhajja, Jehová Diosajj jupanakar salvañatakejj+ Quenaz chachan Otniel+ yoqaparuw salvirit uttʼayäna, Quenaz chachajj Caleb chachan sullka jilapänwa.
10 Jehová Diosan espiritupaw Otniel chachjjar jutäna,+ jupasti Israel markan juezapäjjänwa. Guerran nuwasiñatak mistkäna ukhajja, Jehová Diosaw jupan amparaparojj Mesopotamia* cheqankir Cusán-Risataim reyir katuyjjäna, ukhamatwa uka reyir atipjäna.
11 Uka qhepatsti 40 maranakaw uka oraqen sumankañajj utjäna. Ukatjja Quenaz chachan Otniel yoqapajj jiwjjänwa.
12 Israelitanakajj mayampiw kunatï Jehová Dios nayraqatan jan walïki uk lurapjjäna.+ Ukatwa Jehová Diosajj Moab+ markan Eglón sat reyiparojj israelitanakat sipans jukʼamp chʼamanir tukuyäna, Jehová Dios nayraqatan kunatï jan walïki ukanak lurapjjatap layku.
13 Ukatsti ammonitanakaru,+ amalequitanakaruw+ jupanak contra saytʼayäna. Jupanakasti Israel marka contra saytʼasisajj palmeranakan marka*+ katuntapjjäna.
14 Israelitanakajj Moab markan Eglón sat reyiparojj 18 maranakaw servipjjäna.+
15 Ukatsti israelitanakajj yanaptʼayasiñatakiw Jehová Diosar artʼasipjjäna,+ Jehová Diosasti jupanakar salvañatakejj+ Guerá chachan Ehúd+ yoqaparuw uttʼayäna, jupasti Benjamín+ tribunkir chʼeqachu*+ chachänwa. Tiempompejj Ehúd chachampiw israelitanakajj Moab markan Eglón reyipajj maykäna uka regalo apayapjjäna.
16 Janïr sarkasasti Ehúd chachajj purapar arini mä espada lurasïna, uka espadasti largorojj niya medio metronïnwa,* isip manqharuw uka espada chintʼasïna, kupi lankhu charaparu.
17 Ukatsti jupajj Moab markan Eglón reyipajj maykäna uka regalo churäna. Eglón chachasti wali likʼipunïnwa.
18 Regalo churasasti Ehúd chachajj uka regalo apiri jaqenakampiw sarjjäna.
19 Guilgal+ cheqaru qalat lurat idolonakan ukar purisajja, Ehúd chachajj kuttʼanisaw reyir akham säna: “Jachʼa rey, jumarojj mä yatiyäwi jamasat yatiyañ munsma” sasa. Reyisti akham sarakïnwa: “¡Mistupjjam, paninik jaytapjjeta!”* sasa. Jupampïsipkäna uka servirinakapasti taqeniw mistjjapjjäna.
20 Ehúd chachajj reyiruw jakʼachasïna, reyisti thayartʼayasiñataki patjja cuartopanwa sapaki qontʼatäskäna. Ehúd chachajj reyirojj akham sänwa: “Dios toqet mä yatiyäwi jumatak apanirapsma” sasa. Ukatwa reyejj tronopat* sartäna.
21 Ehúd chachasti kupi lankhu charapat chʼeqa amparapampi espada apsusajj Eglón chachan purakaparuw jununtäna.
22 Espadajj katuñapamppachaw purakapar chhaqaranttäna, Ehúd chachajj purakat espada jan apsutap laykojja, reyin likʼipajj espadaruw chhaqtayäna, purakapatjja jamaw misturakïna.
23 Ehúd chachajj patjjankir cuartot mistusajj llavempiw uka cuarton punkunakap llawintäna.
24 Ehúd chachajj sarjjäna uka qhepatjja, reyin servirinakapajj jutasaw patjjankir cuarton punkunakap llavemp llawintat uñjapjjäna. Ukatwa jupanakajj akham sapjjäna: “Thayartʼayasiñataki manqhäjj cuartonwa necesidadap luraskpacha” sasa.
25 Jupanakasti suykasajj llakthapisjjapjjänwa, ukampis patjjankir cuarton punkup jan llawirasinjjatap amuyasajja, llavempiw punku jistʼarapjjäna, ¡reyiparusti pampan* jiwata jaqosiskir uñjapjjäna!
26 Ehúd chachasti servirinakan jan jankʼachasipjjañapkamajj escapjjänwa, qalat lurat idolonak+ cheq* pasasajj Seirá cheqaruw sumak purjjäna.
27 Ukar purisasti, Efraín tribun qollunak toqenkir+ oraqenakanwa Ehúd chachajj pututu phustʼasïna,+ israelitanakasti jupamp chikaw qollunakat saraqanipjjäna, jupaw israelitanakarojj pʼeqtʼarakïna.
28 Jupasti akham sasaw jupanakar säna: “Sarapjjañäni, Jehová Diosajj jumanakan amparanakamaruw moabita enemigonakamarojj katuyapjjtam” sasa. Ukatwa jupanakajj jupamp chika sarapjjäna, moabitanakan jan pasapjjañapatakejj Jordán jawir umajj pasañjamäki uksa cheqanak katuntapjjäna, janirakiw khitirus pasayapkänti.
29 Ukapachaw jan ajjsariri, chʼamani 10.000 moabita+ chachanakar jiwarayapjjäna. Janiw ni maynis escapkänti.+
30 Uka urunwa israelitanakajj moabitanakar atipjapjjäna. Ukatsti 80 maranakaw uka oraqen sumankañajj utjäna.+
31 Ehúd chacha qhepatjja Anat chachan Samgar+ yoqapaw israelitanakar salvarakïna, jupasti vacanakar jariytʼañataki fierro puntan lawampiw+ 600 filisteo+ chachanakar jiwarayäna.
Notanaka
^ Jan ukajja, “Hamat cheqar mantañawjkama”.
^ Jan ukajja, “yupaychapjjäna”.
^ Hebreo arunjja, “Aram-Naharaim”.
^ Hebreo arunjja, “aljantarakïna”.
^ Hebreo arunjja, “Aram”.
^ Ukajja, Jericó markawa.
^ Variante: “chʼeqellu”.
^ Hebreo arunjja, “mä codo ukchʼänwa”. Inas mä jiskʼa codot parlaskchi. Apéndice B14 uñjjattʼäta.
^ Hebreo arunjja, “¡Amuktʼapjjam!”.
^ Jan ukajja, “asientopat”.
^ Hebreo arunjja, “oraqen”.
^ Ukajja, “qalanak apsuñ cheq” sasaw jaqokipasirakispa.
