Jueces 8:1-35
8 Efraín tribunkiri chachanakajj akham sasaw Gedeonar sapjjäna: “¿Kuns lurapjjesta? ¿Kunatsa madianitanak contra nuwasir sarkta ukhajj jan jawsapkista?”+ sasa. Ukhamaw jupanakajj toqenoqapjjäna.+
2 Gedeonasti jupanakarojj akham sänwa: “¿Janit jumanakajj nayat sipans jukʼamp lurapkta? ¿Janit Efraín+ tribun uvas pallthapitapajj Abí-Ézer+ chachan cosecha apthapitapat sipansa jukʼamp sumäki?
3 Jumanakan amparamaruw Diosajj Madián oraqen Oreb, Zeeb+ principenakap katuyapjjtamjja, ukhamajj ¿janit jumanakajj nayat sipans jukʼamp lurapkta?” sasa. Ukham säna ukhajja jupanakajj colerap apjtayasipjjänwa.
4 Ukatsti Gedeonajj Jordán jawirar purisaw uka jawira paskatäna. Jupasa jupamp chikäpkäna uka 300 soldadonakasa qaritäpjjänwa, ukampis enemigonakapar arktasipkakïnwa.
5 Sucot markar purisajja, ukan jakirinakarojj akham sänwa: “Mirä amp suma, nayamp chik jutir jaqenakar tʼantʼa churapjjam, jupanakajj qaritäpjjewa, nayasti madianitanakan Zébah, Zalmuná reyinakaparuw arktaskta” sasa.
6 Ukampis Sucot markankir principenakajj akham sapjjänwa: “¿Kunatsa nanakajj ejercitomar tʼantʼa churapjjäjja? ¿Jumajj niyat Zébah, Zalmuná reyinakar katjta?” sasa.
7 Ukatjja Gedeonajj akham sänwa: “Ukham sapjjatamatjja, Jehová Diosajj Zébah, Zalmuná reyinakar amparajar katuykitani ukhajja, nayajj wasara pampan utjki uka chʼapinakampiw asutʼipjjäma”+ sasa.
8 Uka cheqatsti jupajj Penuel markaruw makatäna, ukanjja uka kikparak mayïna, Penuel markan jakirinakasti Sucot markan jakirinakjamarakiw sapjjäna.
9 Ukatwa Penuel markankir chachanakarojj akham sarakïna: “Atipjasin kuttʼankä ukhajja, qʼal aka torre tʼunthapëjja”+ sasa.
10 Zébah, Zalmuná reyinakajj ejercitonakapampiw Carcor cheqankasipkäna, taqpachanejj niya 15.000 soldadonakänwa. Inti jalsu toqenkiri+ ejercitopat ukhanikiw jiltʼjjapjjäna, espadanakampi armantata 120.000 chachanakan jiwapjjatap layku.
11 Gedeón chachajj carpan jakirinakan thakipäki uka thak makataskakïnwa, Nóbah, Jogbehá+ toqet inti jalsu toqeru, ukatsti enemigonakapan campamentoparuw atacapjjäna, ukankirinakasti janiw nuwasiñatak wakichtʼatäpkänti.
12 Zébah, Zalmuná sat pä reyinakajj escapapkäna ukhajja, Gedeonajj uka madianita reyinakar arktasaw katjäna, ukatwa campamentonkirinakajj taqeni wal ajjsarayasipjjäna.
13 Joás chachan Gedeón yoqapajja, Heres cheqar makatki uka thakwa guerrat kuttʼanjjäna.
14 Thak jutkasajja Sucot markankir mä waynaruw katuntasin wal jiskhintäna. Waynasti Sucot markankir principenakana ukhamarak ancianonakan sutinakapwa qellqtʼarapïna, 77 chachanakan sutinakapa.
15 Ukatjja Gedeonajj Sucot markankirinakan ukaruw saräna, jupanakarusti akham sänwa: “Akajjaya Zébah, Zalmuná reyinakajja, jupanak kawsaw akham sasin sawkasipjjestajja: ‘¿Niyat Zébah, Zalmuná reyinakar katjta, ukhamat nanakajj qarita ejercitomar tʼantʼa churapjjañajataki?’+ sasa”.
16 Markankir ancianonakar katusajja, wasara pampan jilir chʼapinakampi ukhamarak chʼapini ramanakampiw Sucot markankir chachanakarojj cheqañchäna.+
17 Ukatjja Gedeonajj Penuel+ markan torrep tʼunthapïnwa, uka markankir chachanakarojj jiwayänwa.
18 Jupajj akham sasaw Zébah, Zalmuná reyinakar jisktʼäna: “¿Kuna kasta chachanaksa Tabor qollun jiwayapjjta?” sasa. Jupanakajj akham sapjjänwa: “Jupanakajj jumjamänwa, sapa maynejj mä reyin yoqapar uñtasitänwa” sasa.
19 Ukatwa Gedeonajj jupanakar akham säna: “Jupanakajj jilanakajänwa, mamajan yoqanakapa. Kunjamtï Jehová Diosajj cheqpachapun jakkir Diosäkejja, mä juramentompiw arsta, jumanakatï jupanakar jan jiwayapkasmänjja, janirakiw jumanakar jiwayañajj wakiskaspati” sasa.
20 Ukatjja Jéter sat jilïri yoqaparojj akham sänwa: “Jum jiwarayam” sasa. Ukampis waynajj janiw espadap ayskänti, waynäskatap laykojj ajjsarayasïnwa.
21 Ukatwa Zébah, Zalmuná reyinakajj akham sapjjäna: “Juma pachpa jiwayapjjeta. Chʼamaparjamaw maynejj chachätap uñachtʼayi” sasa. Ukatwa Gedeonajj Zébah, Zalmuná+ reyinakar jiwayäna. Ukatjja uka reyinakan camellonakapan kunkapar uchatäkäna uka adornonak apasïna, uka adornonakajj phajjsir uñtatänwa.
22 Uka qhepatsti israelit chachanakajj akham sasaw Gedeonar sapjjäna: “Jumaw madianitanakan+ amparapat salvapjjestajja, ukhamajj jumay nanakar apnaqapjjeta, yoqamasa allchhimasa ukhamaraki” sasa.
23 Ukampis Gedeonajj akham sasaw jupanakar säna: “Janiw nayajj jumanakar apnaqapkämati, ni yoqajas apnaqapkätamti. Jehová Diosaw jumanakar apnaqapjjätam”+ sasa.
24 Gedeonajj saskakïnwa: “May jumanakar mayipjjäma: sapa mayni jumanakatjja, kunanaktï katuntapkta ukanakat nasar uchasiñ mä anillo churapjjeta” sasa. (Atipjatanakajj ismaelitanakänwa, ukatwa nasar uchasiñ qori anillojj jupanakan utjäna).+
25 Jupanakajj sapjjarakïnwa: “Nanakajj churapjjämawa” sasa. Ukatwa jupanakajj mä isi janatatapjjäna, ukjjaruw sapa maynejj kunanaktï katuntapkäna ukanakat nasar uchasiñ mä anillo uchapjjäna.
26 Nasar uchasiñ qori anillonak maykäna ukanakajj 19 kilo qorinakaw* taqpachajj pesäna, ukatsti phajjsir uñtasit adornonakasa, aretenakasa, madianita reyinakajj uchatäpkäna uka morado tʼarwat lurat isinakapasa, camellonakan collaranakapas utjarakïnwa.+
27 Gedeonasti ukanakat mä efod*+ isi lurasajj Ofrá+ markapanwa uñachtʼayäna. Ukansti taqe israelitanakaw uka efod isir adorasin* sarnaqapjjäna,*+ ukajj Gedeonatakisa familiapatakisa mä trampar uñtasitänwa.+
28 Ukhamwa israelitanakajj madianitanakar+ atipjapjjäna, janirakiw madianitanakajj israelitanak contrajj wasitat saytʼasjjapjjänti.* Gedeonan urunakapanjja, 40 maranakaw uka oraqen sumankañajj utjäna.+
29 Joás chachan Jerubaal*+ yoqapajj utaparuw kuttʼjjäna, ukanwa jakarakïna.
30 Gedeonajj 70 yoqanakanïnwa, walja warminakanïtap layku.
31 Siquem markankir concubina warmipampejj mä wawanirakïnwa, juparusti Abimélec+ suti uchäna.
32 Joás chachan Gedeón yoqapajj walja maranak kusisit jakasajj jiwjjänwa, ukatsti abí-ezritanakan+ Ofrá oraqepanwa Joás awkipan sepulturapar imtʼjjapjjäna.
33 Gedeón chachajj jiwjjäna uka qhepatjja, israelitanakajj wasitat Baal diosanakar adorañ*+ qalltapjjäna,* ukatsti Baal-Berit diosaruw diosapat uttʼayasipjjäna.+
34 Israelitanakajj janiw Jehová Diosapat amtasipkänti,+ jupanak jakʼan jakiri taqe enemigonakapan amparapat jupaw salväna.+
35 Janirakiw Jerubaal chachana, mä arunjja Gedeón chachan familiaparojj munasiñampi* uñjapkänti, jupajj israelitanak layku sumanak lurkchïna ukasa.+
Notanaka
^ Hebreo arunjja, “1.700 qori siclonakaw”. Apéndice B14 uñjjattʼäta.
^ Jan ukajja, “taqe israelitanakaw yaqha diosanakampi prostitución jucha lurapjjäna”.
^ Jan ukajja, “yupaychasin”.
^ “Efod” siski uk glosarion liytʼäta. Apéndice B5 uñjjattʼarakïta.
^ Hebreo arunjja, “pʼeq waytjjapjjänti”.
^ Jerubaal sasinjja, Gedeón chachat parlaski.
^ Jan ukajja, “yupaychañ”.
^ Jan ukajja, “jankʼakiw israelitanakajj mayamp Baal diosanakampi prostitución jucha lurapjjäna”.
^ Jan ukajja, “munasiñampi jan jaytjasiñampi”.
