Mateo 4:1-25
4 Ukatsti espíritu santow Jesusarojj wasarar irpäna,+ ukanwa Diablojj+ yantʼäna.
2 Pusi tunka uruy aruma ayunasajja, Jesusajj manqʼat wal awtjayasïna.
3 Yantʼirejj+ jupar jakʼachasisaw akham säna: “Jumatï Diosan wawapästajja, aka qalanak tʼantʼanakar tukuyam” sasa.
4 Uk satajja jupajj akham sarakïnwa: “Qellqatawa: ‘Jaqejj janiw tʼantʼa sapampikejj jakañapäkiti, jan ukasti Jehová* Diosan lakapat mistki taqe uka arunakampi jakañapawa’+ sasa”.
5 Ukjjarusti Diablojj Jerusalén markaruw* irpäna,+ templon perqap patjjaruw saytʼayarakïna,+
6 akham sasa: “Jumatï Diosan wawapästajja, akat jaqoqtam. Qellqatäskiwa: ‘Jupajj angelanakaparuw juman ukar khitanini’, ‘uka angelanakaw amparanakapamp katthapipjjätamjja,* ukhamat kayum qalar jan usuchjasiñamataki’”+ sasa.
7 Jesusasti akham sarakïnwa: “Qellqatarakiwa: ‘Janiw Jehová* Diosamarojj yantʼañamäkiti’”+ sasa.
8 Ukatjja wali jachʼa qollu patjjaruw Diablojj Jesusar irpsurakïna. Aka oraqenkir taqe markanaka, ukhamaraki kunja qamirïpkitejj taqe ukanakwa uñachtʼayarakïna,+
9 akham sasa: “Jumatï qonqortʼasisin mä kutik adoritäta* ukhajja, taqe akanakwa churäma” sasa.
10 Ukjjarusti Jesusajj sarakïnwa: “¡Saram akat Supaya!* Qellqatarakiwa: ‘Jehová* Diosamaruw adorañama,*+ jupa saparukiw serviñama’”+ sasa.
11 Ukatjja Diablojj jaytjjänwa.+ Jesusarojj angelanakaw jutasin yanaptʼapjjäna.+
12 Juanaruw katuntapjje+ sasin parlir istʼäna ukhajja, Galilearuw Jesusajj sarjjäna.+
13 Nazaret markat mistjjasajja, qota jakʼankir Capernaúm+ markar jakiriw sarjjarakïna, uka markajj Zabulón, Neftalí uka cheqanakankiwa.
14 Ukhamat kuntï Isaías profetajj arskäna ukanakan phoqasiñapataki, jupasti akham sänwa:
15 “¡Zabulón oraqe, Neftalí oraqe, qotar* sarir thakinkirinaka, Jordán jawir khurkatankirinaka, yaqha markankirinakan Galileapa!
16 Chʼamakan utjiri markajj mä jachʼa qhanwa uñjäna, jiwañampi chʼamaktʼayat lugaranakan jakirinakjjarusa mä qhanaw+ qhantʼarakïna”+ sasa.
17 Uka tiempot aksaruw Jesusajj akham sas yatiyañ qalltäna: “Arrepentisipjjam, alajjpachankir Reinojj* jakʼankjjewa”+ sasa.
18 Galilea qota jakʼa sarkasajja, pä jila sullkaruw uñjäna: maynisti Simón satänwa, yaqha sutipajj Pedrorakïnwa,+ maynïrejj Andrés satarakïnwa. Jupanakasti chawlla katuñ qänwa* qotar jaqontasipkäna, jupanakajj chawlla katurinakäpjjänwa.+
19 Ukatjja jupanakarojj akham sänwa: “Nayar arkapjjeta, nayasti jaqenak katuri tukuyapjjäma”+ sasa.
20 Ukaratpachaw jupanakajj chawlla katuñ qänanakap* jaytasajj jupar arkapjjäna.+
21 Uka lugarat sartasinjja, yaqha pä jila sullkaruw uñjarakïna, Zebedeon yoqanakaparu: Santiagompiru Juanampiru.+ Jupanakasti awkipamp chikaw boten qänanakap* askichasipkäna, jupanakaruw jawsarakïna.+
22 Jupanakasti ukaratpachaw botempir awkipampir jaytasajj Jesusar arkapjjäna.
23 Ukatsti sinagoganakan*+ yatichasa, Reinon* suma yatiyäwinakap* jaqenakar parlasa, kunayman usuni+ jaqenakar qollasaw Galileypach+ muytäna.
24 Siria markpachanwa jupjjat yatisirakïna. Ukatsti kunayman usunakampi llakinakampi tʼaqesit+ jaqenakaruw jupan ukar apanipjjäna. Demonion mantatanakarusa,+ tʼuku usuninakarusa,+ suchunakarus* ukhamarakiw apanipjjäna. Jupasti taqeniruw qolläna.
25 Ukatwa walja jaqenakajj Galileatsa, Decápolis* toqetsa, Jerusalenatsa, Judeatsa, Jordán jawir khurkatatsa jupar arkapjjäna.
Notanaka
^ Apéndice A5 liytʼäta.
^ Griego arunjja, “sagrado markaruw”.
^ Jan ukajja, “amparanakapjjar apapjjätamjja”.
^ Apéndice A5 liytʼäta.
^ Jan ukajja, “yupaychitäta”.
^ Jan ukajja, “Satanás”.
^ Apéndice A5 liytʼäta.
^ Jan ukajja, “yupaychañama”.
^ Ukajja, Mediterráneo sat lamar qotäpachänwa, yaqhepajj Galilea qotäpachänwa sapjjarakiwa.
^ Jan ukajja, “Gobiernojj”.
^ Jan ukajja, “redwa”.
^ Jan ukajja, “redenakap”.
^ Jan ukajja, “redenakap”.
^ Jan ukajja, “Gobiernon”.
^ Jan ukajja, “evangeliop”.
^ Variante: “suchʼunakarus”.
