Mateo 6:1-34
-
JESUSAN QOLLUN YATICHATAPA (1-34)
6 ”Wal amuyasipjjam, janiw jaqenakamp uñjayasiñ laykukejj cheqapar sarnaqapjjañamäkiti,+ ukham sarnaqasajj janiw kuna bendicionsa alajjpachankir Awkimat katoqapkätati.
2 Ukhamasti khuyapayasiñat khitir kun wajjtʼasas* jan trompeta tuktʼasimti, kunjamtï kʼari chuyman* jaqenakajj lurapki ukhama. Jupanakajj jaqenakamp jachʼañchayasiñ laykukiw sinagoganakansa callenakansa ukham lurapjje. Qhanakwa sapjjsma, jupanakajj phoqatpachwa kunatejj waktʼki ukanak katoqjjapjje.
3 Jumatï khuyapayasiñat yaqhanakar kuns wajjtʼäta ukhajja, kuntï kupi amparamajj lurki ukjja, jan chʼeqa amparamajj yatpanti.
4 Jan ukasti khuyapayasiñat yaqhanakar kun wajjtʼasas jamasatak churam. Ukhamatwa jamasat uñjasinktam uka Awkimajj kuttʼayjjarakïtam.+
5 ”Oración lurapjjäta ukhajja, jan kʼari chuymani*+ jaqenakjam lurapjjamti; jupanakajj jaqenakampi uñjayasiñ laykukiw sinagoganakansa jachʼa callenakan esquinanakapansa mayisipjje.+ Qhanakwa sapjjsma, jupanakajj phoqatpachwa kunatejj waktʼki ukanak katoqjjapjje.
6 Jumatejj oración lurañ munäta ukhajja, utamar mantam, punk llawkatasinim, ukat jamasankki uka alajjpachankir Awkimar mayisim.+ Ukhamatwa jamasat uñjasinktam uka Awkimajj bendisïtam.
7 Oración luräta ukhajja, jan pachpa arunakak kutin kutin arsumti, kunjamtï akapachankir jaqenakajj lurapki ukhamjja. Jupanakajj walja arunak arsusas Diosampi istʼayasipkaspa ukhamwa amuyasipjje.
8 Ukhamajj jan jupanakjamäpjjamti, kuntï necesitapkta ukjja janïr mayipktas ukhaw Dios Awkimajj yatjje.+
9 ”Jumanakajj akham sasaw orasipjjañama:+
”‘Alajjpachankir nanakan Awkija, sutimajj+ jachʼañchatäpan.*+
10 Reinomajj*+ jutpan. Munañamajj luratäpan,+ kunjamtï alajjpachan luraski ukhamarak aka oraqens luraspan.*+
11 Jichhürutak tʼantʼa churapjjeta;+
12 manunakajsa* perdonapjjarakita, kunjamtï nanakajj manüpkitu ukanakar* perdonapktjja+ ukhama.
13 Janirak yantʼarus puriyapjjestati,+ jan ukasti Supayat salvapjjeta’+ sasa.
14 ”Jumanakatï mayninakan juchanakap perdonapjjätajja, alajjpachankir Awkimajj perdonapjjarakïtamwa;+
15 jumanakatï mayninakan juchanakap jan perdonapkätajja, janirakiw alajjpachankir Awkimajj juchanakam perdonapkätamti.+
16 ”Ayunapkäta+ ukhajja, jan llakit ajanuni uñnaqapjjamti, kunjamtï kʼari chuymani* jaqenakajj lurapki ukhama. ‘Ayunaskiwa’ sayasiñ laykukiw ukham sintkañ uñnaqapjje.*+ Qhanakwa sapjjsma, jupanakajj phoqatpachwa kunatejj waktʼki ukanak katoqjjapjje.
17 Ukampis jumajj ayunkäta ukhajja, suma olorani aceitempi pʼeqet uchtʼasim, ajansa jareqasirakim;
18 janiw jaqenakamp uñjayasiñ laykukejj ayunañamäkiti, jan ukasti jamasankki uka Awkimatak ayunañamawa. Ukhamatwa jamasan uñjasinktam uka Awkimajj bendisïtam.
19 ”Jan jumanakajj kunatï valoranïki ukanak aka oraqen jukʼamp imkatapjjamti.+ Aka oraqenjja, thuthan thuthantata, saruntata ukhamaw ukanakajj tukusipjje jan ukajj lunthatanakaw mantasin qʼepsupjje.
20 Antisas kunatï valoranïki ukanak alajjpachar imkatapjjam.+ Ukanjja janiw thuthas thuthantkiti,+ ni saruntkisa, janirakiw lunthatanakas mantasin qʼepsupkiti.
21 Kawkinkkitï wali valoraninakamajja, ukankarakiniw chuymamajja.
22 ”Nayrajj cuerpon qhanapawa.+ Ukhamasti nayramatï sumächejja,* taqpach cuerpomaw qhantani;*
23 nayramatï envidiasirïchejja,*+ taqpach cuerpomaw chʼamakarakïni. Ukhamajj juman utjki uka qhanatï chʼamakächi ukhajja, cuerpomajj jukʼamp chʼamakarakïniwa.
24 ”Janiw khitis pä patronar esclavot sirvkaspati. Maynirojj uñisiniwa, maynirusti munasirakiniwa; maynirojj jakʼachasiniwa, maynirusti jiskʼacharakiniwa.+ Janiw jumanakajj Diosampir Qollqempir esclavot servipkasmati.+
25 ”Ukatwa nayajj akham sapjjsma: jan jumanakajj vidanakamat* llakisipjjamti,+ kuns manqʼañäni kuns umañäni sasajja. Janiraki cuerponakamatsa llakisipjjamti, kunampis isisiñäni sasajja.+ ¿Janit vidajj* manqʼat sipansa jukʼamp wakiskirïki, janit cuerpos isit sipansa jukʼamp wakiskirïki?+
26 Jamachʼinakarojj wali amuyump uñtapjjam,+ jupanakajj janiw phawapkisa, ni yawipkisa, janirakiw manqʼsa imañ utanakar apthapipkiti. Jupanakarojj alajjpachankir Awkimaw manqʼayi. ¿Janit jumanakajj uka jamachʼinakat sipansa jukʼamp valoranïpkta?
27 ¿Khitis wal llakisisajj vidap mä jukʼampi* yaptʼasispa?+
28 ¿Kunatsa isit llakisipjjarakta? Kunjamsa lirio panqaranakajj pampanakan jilaski uk sum amuyapjjam, jupanakajj janiw chʼam tukusin trabajipkiti, ni qapupkarakisa.
29 Nayajj sapjjsmawa, janiw ni Salomonas+ wali qamirïkasajj uka panqaranakjam sum isthapiskänti.
30 Uka alinakarojj Diosaw ukha sum isthapiyi. Jichhürojj sumaw alisipki, qharürusti hornor jaqontatäpjjaniwa. Diosar jan taqe chuym confiyir* jaqenaka, ¿janit jumanakarojj ukham isthapiyapkarakïtamjja?
31 Ukhamajja ‘¿kuns manqʼañäni?’, ‘¿kuns umañäni?’ jan ukajj ‘¿kunampis isisiñäni?’+ sasajj janipun llakisipjjamti.+
32 Diosar jan uñtʼir jaqenakakiw* taqe ukanak wal thaqapjje. Ukampis taqe ukanakajj qhawqha wakiskiris jumanakatakejj ukjja alajjpachankir Awkimaw sum yati.
33 ”Ukhamasti Diosan Reinopsa* kunatï Diosatakejj cheqapäki uksa nayraqat thaqasipkakim, Diosasti taqe kunatï jumanakatak wakiski ukanakwa churapjjätam.+
34 Ukhamajj janipun qharürut llakisipjjamti,+ qharürojj yaqha llakinakaw utjarakini. Sapüruw jan walinakajj utji.
Notanaka
^ Jan ukajja, “hipócrita”. Ukajja, jan suma jaqëkasina suma jaqer tuktʼañat parlaski.
^ Jan ukajja, “pobrenakar wajjtʼasas”. “Khuyapayasiñat wajjtʼaña” siski uk glosarion liytʼäta.
^ Jan ukajja, “hipócrita”. Ukajja, jan suma jaqëkasina suma jaqer tuktʼañat parlaski.
^ Jan ukajja, “sagradot uñjatäpan”. Griego arunjja, “santot uñjatäpan”.
^ Jan ukajja, “alajjpachansa aka oraqensa luraspan”.
^ Jan ukajja, “Gobiernomajj”.
^ Jan ukajja, “juchanakajsa”.
^ Jan ukajja, “yaqhanakan juchanakap”.
^ Jan ukajja, “ajanunakapjja qʼala tukusitäkaspas ukham tukuyapjje”.
^ Jan ukajja, “hipócrita”. Ukajja, jan suma jaqëkasina suma jaqer tuktʼañat parlaski.
^ Jan ukajja, “mä toqeruk uñtatächejja”.
^ Jan ukajja, “sum uñjani”.
^ Griego arunjja, “jan walïchejja”. Ukajja, waljanak thaqañat parlaski.
^ Jan ukajja, “almajj”.
^ Jan ukajja, “almamat”.
^ Griego arunjja, “mä codo ukchʼampi”. Apéndice B14 uñjjattʼäta.
^ Jan ukajja, “jukʼa feini; jukʼa iyawsäwini”.
^ Griego arunjja, “Yaqha markankirinakakiw”.
^ Jan ukajja, “Gobiernopa”.
