Proverbios 19:1-29
19 Pobre jaqëña ukhamarak taqpach chuymampi servisa sarnaqañaw jukʼamp sumajja,+jan amuytʼasiri ukhamarak kʼarinak parlir jaqëñat sipansa.+
2 Mä jaqejj jan yatiñanïki ukhajj janiw walïkiti,+jan amuytʼasis kuns lurir jaqejja juchachasiskiwa.
3 Mä jaqerojja jan amuytʼasirïtapaw jan wali thaknam irpi,ukatsti chuymapajj Jehová Dios contraw colerasi.
4 Walja utjirinïñajja walja amigonakaruw irpani,ukampis pobre jaqejja amigopans jaytanukutäniwa.+
5 Falso testigojja kunjamatsa castigatapunïniwa,+khititï sapa kuti lak jistʼaras kʼariski ukajja janiw escapkaniti.+
6 Waljaniw marka apnaqerin* suma uñjatäñ thaqapjje,taqeniw regalonak churir jaqen amigopajja.
7 Pobre jaqerutï taqpach jilanakapajj uñisipjjchejja,+¡jukʼampiw amigonakapajj jupar jaytanukupjjani!+
Pobre jaqejj ruwtʼasisaw jupanakan qhepap sari, ukampis janiw khitis jupar jayskiti.
8 Khititï amuytʼasirïñ jikjjatki ukajja jakañ vidaparojj munasiwa,+khititï amuytʼasirïtap uñachtʼayki ukajja nayraruw sartani.*+
9 Falso testigojja kunjamatsa castigatapunïniwa,khititï sapa kuti lak jistʼaras kʼariski ukajja jiwaniwa.+
10 Taqe kunani wali suma jakañajja janiw jan amuytʼasir jaqetakïkiti,¡jukʼampiw mä servirirojj principenakar apnaqañajj jan waktʼkiti!+
11 Mä jaqerojja suma amuytʼasirïtapaw jan jankʼak colerasiñapatakejj jarktʼi,+juchanak ukhamak pasayatapajj wali sumawa.+
12 Reyin colerasitapajja mä leonan* wararitapjamawa,+ukampis reyimp suma uñjatäñajja pastor purjjatir sullar uñtasitawa.
13 Jan amuytʼasir wawajja jan waltʼäwinakwa awkipatakejj apani,+jiskhisiri* mä esposajja jan saytʼasa uma chʼaqer techor uñtasitawa.+
14 Utasa utjirinakasa awk taykatwa herenciat katoqasi,ukampis amuytʼasir mä esposajja Jehová Diosatwa juti.+
15 Mä jayra jaqejja wal iktʼasi,jayra jaqejja manqʼat awtjataw sarnaqani.+
16 Khititï mandamientonak phoqki ukajja jakaskakiniwa,+thakipajj kunarus purtʼasiyani uk jan yäqer jaqejja jiwaniwa.+
17 Khititï yanaptʼa munir jaqet khuyaptʼayaski ukajja Jehová Diosaruw maytʼaski,+ukham luratapatjja Diosajj jupar kuttʼayjjaniwa.*+
18 Cheqañchañajj wakiski ukhajja wawamarojj cheqañcham,+janitï cheqañchkätajja jumaw wawaman jiwatapat juchanïyäta.+
19 Wali colerir jaqejja castigatäniwa,jumatï jan wali luratanakapat jupar jarkʼaqañ munäta ukhajja, kutin kutin jarkʼaqañamaw wakisini.+
20 Ewjjtʼatajj istʼasim, cheqañchatajj katoqasim,+ukhamat jutïrin yatiñani jaqer tukuñamataki.+
21 Jaqen chuymapanjja walja amtanakaw utji,ukampis Jehová Diosan amtapaw* phoqasini.+
22 Mä jaqen munasirïtapasa jan jaytjasirïtapasa wali munkañawa,+kʼari jaqëñat sipansa pobre jaqëñaw jukʼamp sumajja.
23 Jehová Diosar ajjsarañajja jakañar irpiriwa,+khititï Diosar ajjsarki ukajja, jan waltʼäwir jan ajjsarasaw sum samartʼasini.+
24 Mä jayra jaqejja manqʼäwin utjki uka fuenter amparap loqantkchisa,janiw manqʼjja lakapar apantaskiti.+
25 Burlasir jaqer nuwjam,+ ukhamat jan experienciani jaqejj amuytʼasir jaqëñapataki,+amuytʼasir jaqer cheqañcham, ukhamat jukʼamp yatiñani jaqëñapataki.+
26 Awkipar tʼaqesiyiri ukhamarak mamapar alisnukur wawajja,familiaparuw mä phenqʼa uñjayi, jiskʼachayarakiwa.+
27 Nayan wawaja, janitï cheqañchatajj istʼaskäta ukhajja,yatiñampi arsut arunakatjja saranukütawa.
28 Jan kunatak servir testigojja kunatï cheqapäki ukatjja burlasiwa,+jan wali jaqenakajja jan walinak lurasajj kusisipjjewa.+
29 Burlasir jaqenakajja castigatäpjjaniwa,+jan amuytʼasir jaqenakajja nuwjatäpjjaniwa.+
Notanaka
^ Jan ukajja, “wajjtʼasir jaqen”.
^ Hebreo arunjja, “kunatï sumäki ukwa jikjjatani”.
^ Jan ukajja, “waynpach mä leonan”.
^ Jan ukajja, “kʼumisiri; quejasiri”.
^ Jan ukajja, “pagjjaniwa”.
^ Jan ukajja, “ewjjtʼapaw”.
