Salmos 125:1-5
Markar makatkasin cantañatak mä canción.
125 Khitinakatï Jehová Diosar confiyapki ukanakajja,+Sion Qollur uñtasitäpjjewa, jupanakajj janiw uksar aksar thaljatäpkaspati,jan ukasti wiñayatak saytʼatäpjjewa.+
2 Kunjamtï qollunakajj Jerusalén markar muyuntapkejja,+ukhamarakiw Jehová Diosajj markapar muyunti,+jichhat uksarusa wiñayatakisa.
3 Jan wali jaqejja* janiw cheqap sarnaqer jaqerojj apnaqkaniti,+ukhamat cheqap sarnaqer jaqenakajj kunatï jan walïki ukar jan kuttʼapjjañapataki.+
4 Jehová Dios Tata, khitinakatï suma jaqenakäpki ukanakatakejj kunatï sumäki uk luram,+cheqap chuymanïpki ukanakatakejj kunatï sumäki uk luram.+
5 Khitinakatï qʼewinukut thakinakapar saranukupki ukanakarojja,Jehová Diosajj jan walinak luririnakamp chikaw tukjani.+
Israel markanjja sumankañay utjpan.
Notanaka
^ Hebreo arunjja, “Jan walin thujrupajja”.
