KUNATSA UK LURAÑAJJ WAKISI: Diosampi askit uñjatäñatakejja, yateqerinakajj Juparuw jakäwip katuyasipjjañapa ukat bautisasipjjañaparaki (1Pe 3:21). Khitinakatï arsutanakaparjam sarnaqapki ukanakarojja, jan walinakatwa Diosajj imaraki (Sl 91:1, 2). Cristianonakajj Jehová Diosaruw jakäwis katuyastanjja, janiw mä jaqerusa ni mä trabajorusa ni mä organizacionarusa. Ukhamasti, yateqerinakajj Diosar respetañataki ukat munasiñatakiw chʼamachasipjjañapa (Ro 14:7, 8).

KUNJAMSA UK LURSNA:

• Bibliat yatjjatkasajja, kunsa Jehová Diosat yatichistu sasaw yateqerir jisktʼañasa. Biblia sapüru liyiñasa ukat jan inaktʼasa Diosar mayisiñas kunja askisa ukwa qhanañchtʼañasaraki (1Te 5:17; Snt 4:8).

• Diosar jakäwip katuyasiñapataki ukat bautisasiñapatakiw yateqerisar chʼamañchtʼañasa. Maysa toqetjja, tantachäwinakan arstʼapjjañapataki ukhamarak vecinonakaparu, amigonakaparu Diosan arunakap parlapjjañapatakiw chʼamañchtʼañasa. Ukampis ak amtañasawa, Jehová Diosajj janiw munkir jan munkir Jupar servipjjañap munkiti. Ukhamajja, yateqerisaw uk amtjjañapa (Dt 30:19, 20).

• Jehová Diosatakjam sarnaqañapatakiw chʼamachtʼañasa ukhamat bautisasiñapataki (Pr 27:11). Niyakejjay yateqerisan luratanakapasa, sarnaqäwipasa nayrajj mayjachïnjja, ukanak jaytañajj jupatak chʼamakïspawa. Ukhamajj ukanak jaytañataki ukat suma luräwinak lurañapatakiw yanaptʼañasa (Ef 4:22-24). “Bibliat yatjjatasaw nayra jakäwinakapjja jaytawayapjje” sat yatichäwejj Yatiyañataki revistan mistki uka toqetwa jupanakamp parltʼaraksna.

• Jehová Diosar servisajja, kunjamas jikjjatastan uksa saraksnawa (Isa 48:17, 18).