Jesusan tiempopansa Galilean jakkasma ukham amuytʼañäni. Tabernáculo Fiesta (fiesta de las Cabañas) amtiriw Jerusalenar sartajja. Taqe cheqat jutir jaqenakarakiw jumamp chika Jerusalén markankapjje. Jichhasti Jehová Diosar mä ofrenda loqtañ muntajja. Walja jaqenakaw utji, ukatwa Templor mä cabra apañajj wali chʼamajja. Templor purta ukhajja, waljaniw Diosar sacrificio loqtañ munapjje. Jichhasti sacerdotenakar cabra churañajj jumaruw waktʼtamjja. Ukhaw mä jilatajj juma conträtap amtastajja. Inas jupajj templonkaskarakchi, jan ukajj yaqha cheqankaskchi. Jesusajj kunsa lurañama uk wali sum ewjjtʼäna (Mateo 5:24 liytʼäta). Sumankthapiñatakejja, ¿kunsa jumasa, jilatamas lurapjjañama? Kunsa lurasma uk aka cheqan señaltʼasim.

¿KUN LURAÑAMASA?

• Jilataman chuymap ustʼayatam jumajj amuyasta, ukhakiw parlir sarañama.

• Janis ukhamäkchejja, jilatapuniw juchani sasaw amuytajja.

• Jilatamajj kunatsa chuyma ustʼayasi uk janis sum amuykstajja. pacienciampiw istʼañama. Taqe chuymaw perdón mayisiñamaraki.

¿KUNSA JILATAMAJJ LURAÑAPA?

• Kuntï jumajj lurkta uk yaqha jilatanakar parlañapa, ukhamat jupa toqet saytʼasipjjañapataki.

• Kunja chuyma ustʼatas jikjjatasi uk jumar sañapa, ukhamat jumapun juchanïskatam amuyasiñamataki.

• Jilatamajja, jupampi parlir saratamat humilde chuymanïtap uñachtʼayañapa, ukatjja taqe chuymaw jumar perdonañaparaki.

Jichhürunakanjja, janis Diosar animalanak sacrificiot loqtañajj wakisjjchejja, ¿kunsa Jesusajj uka uñachtʼäwimpi yatichäna?