Jehová Diosatakejj matrimoniojj wali sagradowa. Casadonakajj jan jaljtas jakasipjjaspa ukwa mayiraki (Mt 19:5, 6). Diosan markapanjja, kusisita jakasiri walja chacha warminakaw utji. Ukampis taqeniw pantjasirïtanjja, ukatwa problemanakajj utjakipuninejja. ‘Jaljtä jan ukajj divorsiasï ukhaw problemanakajj tukusini’ sasin amuyañajj janiw walïkiti. ¿Kunjamatsa cristianonakajj matrimoniop jan walinakat jarkʼaqapjjaspa?

Phesqa ewjjtʼanak uñjapjjañäni:

1. Yaqhanakar jan wali amtampi uñchʼukiñasa, qʼañu jucha lurañanakani videonak uñchʼukiñasa janiw walïkiti. Ukanakaw matrimonior jan waltʼayi (Mt 5:28; 2Pe 2:14).

2. Jehová Diosar jukʼamp jakʼachasiñatak chʼamachasipjjam. Kunjamtï Jehová Diosajj munki ukarjam matrimonion jakasiñatak chʼamachasipjjarakim (Sl 97:10).

3. Diosajj churkistu uka machaq jaqëñamp isthapisisipkakim, kunatï esposomarusa jan ukajj esposamarusa kusisiykaspa ukanak lurañatak chʼamachasipjjarakim (Col 3:8-10, 12-14).

4. Esposomampi jan ukajj esposamampi parltʼasipjjapunim, wali respetompi uñjasipjjarakim (Col 4:6).

5. Chacha warmjam ikthapisin munasiñ uñachtʼayasipjjapunim (1Co 7:3, 4; 10:24).

Cristianonakajj respetompi matrimonior uñjapki ukhajja, Jehová Diosar respetapjjatapwa uñachtʼayasipki, jupïpanwa matrimoniojj utji.

“TʼIJUÑANJJA AGUANTAS TʼIJUSIPKAKIÑÄNI”: REGLAMENTORJAM TʼIJUPJJAÑÄNI SAT VIDEO UÑTASAJJA, AKA JISKTʼANAKARUW QHANAÑCHTʼÄTA:

• Chacha warmejj qalltan sumas jakasipkchejja, ¿kuna jan walinakas utjaspa?

• Matrimonion munasiñajj tukusjjchi ukhasa ¿kunjamsa Biblian wiñay yatichäwinakapajj jupanakar yanaptʼaspa?

• ¿Kamsasas Jehová Diosajj casadonakar ewjjtʼi?

• Kusisita jakasiñatakejj ¿kunsa chacha warminakajj lurapjjañapa?