KUNATSA UK LURAÑAJJ WAKISI. Jaqenakajj Diosan sutipwa salvasiñatakejj artʼasipjjañapa (Ro 10:13, 14). Ukampis janiw Bibliat taqe yateqerinakajj Jehová Diosan leyinakap istʼañ munapkiti. Ukhamajj tiempos jan ina chʼusar aptʼañatakejja, khitinakatï Jehová Diosan chuymap kusisiyañ layku cambiañ munapki ukanakarukiw yatichjjañasa. Ukatwa Bibliat mä yateqeritï mä qhawqha tiempot janipun nayrar sartkchi ukhajj jaytjjañasa. Jehová Diosajj markapar irpanki ukanakaruw antisas jukʼamp yanaptʼañasa (Jn 6:44). Ukampis yateqeritï qhepat Diosatakjam sarnaqjjani, ‘wiñay jakañatak suma chuymanëjjarakini’ ukhajja, mayampiw Bibliat yatichjjsna (Hch 13:48).

KUNJAMSA UK LURSNA

• Bibliat yatjjatañ munatapatjja, ‘walik ukham lurtajja’ sasaw chʼamañchtʼañasa (1Ti 2:4).

• Yateqaski ukarjam sarnaqañajj kunatsa wali wakiskiri ukwa amtayañasa (Lu 6:46-49).

• Bibliajj phawir jaqet parlki uka uñachtʼäwitwa munasiñampi parltʼañasa. Ukatjja, kunas nayrar sartañatakejj jarkʼi uka toqet lupʼiñapatakiw chʼamañchtʼañasaraki (Mt 13:18-23).

• Kunatsa jupar jan yatichjjañäni uk wali amuyumpiw sañasa.

• ‘Awisajj visitir jutaskäwa, jawsasinkarakïmawa. Kuntï Bibliajj siski ukarjam sarnaqañatak chʼamachasïta ukhajja, mayampiw Bibliat yatjjatsna’ sasaw sañasa.

VIDEO UÑTASAJJA, AKA JISKTʼANAKARUW QHANAÑCHTʼÄTA:

• ¿Bibliat yateqerin nayrar jan sartaskatapajj kunanakansa amuyasïna?

• Kunanakansa Bibliat yateqerejj cambiañapa ukjja, ¿kunjamsa jilatajj amuyañapatak yanaptʼäna?

• ¿Kunjamsa jilatajj Bibliat yateqerirojj ‘jutïrin Bibliat mayamp yateqaskaksnawa’ sasin qhanañchtʼäna?