Kunjamsa Jehová Diosajj oracionanakar jaysirïna ukaw Biblian qellqata. Diosan servirinakapajja, problemanakapat Jehová Diosajj llakisitapa, jupanakar yanaptʼatap uñjasajja, jukʼampiw jupar confiyapjjäna. Ukhamajja, kunansa yanaptʼatäñ muntan uk qhanwa Jehová Diosar mayisiñasa, kunjamsa jupajj oracionanakasar jaysistu uksa amuyasiñasarakiwa. Jehová Diosajja, janiw kunjamtï suykayätan ukhampun oracionasar jayskistaspati, kuntï jan suykayätan uksa lurarakispawa (2Co 12:7-9; Ef 3:20). Kunjamsa Jehová Diosajj oracionanakasar jaysistu ukanakat mä qhawqha uñjañäni.

• Jan walinakar saykatañasatakejj chʼamwa churistu, jan sinti llakisiñataki, jupar jukʼamp confiyañatakiw yanaptʼarakistu (Flp 4:13).

• Suma amtanakar puriñasatakejj yatiñanïñwa churistu (Snt 1:5).

• Lurañ munañatakisa, phoqañatakis chʼamwa churistu (Flp 2:13).

• Llakitäktan ukhajja, jan sinti llakisiñatakiw yanaptʼistu (Flp 4:6, 7).

• Mayninakampiw chʼamañchtʼayistu, chuymachtʼayarakistu (1Jn 3:17, 18).

• Mayninakatak orarapktan ukanakaruw yanaptʼi (Hch 12:5, 11).

JEHOVÁ DIOSAJJ ‘ORACIONANAK ISTʼIRIWA’ SAT VIDEO UÑTASAJJA, AKA JISKTʼANAKARUW QHANAÑCHTʼÄTA:

• ¿Shimizu sat jilatan experienciapajj kunjamsa usutäpki ukanakarojj chʼamañchtʼi?

• ¿Kunjamsa Shimizu jilatjam lursna?