¿Khitinakas Jehová Diosan munañap lurasipki? sat folletojja, sapa semana Bibliat yatichañ janïr qalltkasa jan ukajj yatichañ tukuyataru yateqerimpi yatjjatañatakiw wakichtʼasiwayi.* Folleton 1-4 yatichäwkamajja, Jehová Diosan Testigonakapajj khitinakäpjjesa ukwa qhanañchi; 5-14 yatichäwkamasti, jupanakajj kunanaksa lurapjje uka toqetwa parli, 15-28 yatichäwkamajja, Diosan markapajj kunanaksa luraski ukwa qhanañcharaki. Uka folletojj qalltat tukuykama yatjjatañatakiw wakichtʼasiwayi, ukampis yateqeritï mä yatichäwit yatjjatañ munani ukhajja, uka yatichäwitwa nayraqat yatjjatasispa. Folleton yatichäwinakapajj mä janankakiwa, ukhamajj phesqa jan ukajj tunka minutonakanwa sapa yatichäwit yatjjatasispa.

• Sapa yatichäwin pʼeqeñchäwipajj kamsisa ukwa nayraqat jisktʼäta.

• Folleton yatichäwinakapatjja, qalltat tukuykama jan ukajj jukʼat jukʼatwa liytʼapjjäta.

• Kuntï liytʼapkäta uka toqet parlakiptʼasajja, sapa yatichäwi tukuyan utjki uka jisktʼanakata ukat fotonakatwa yatjjatapjjäta. Kawknïr textonaksa liytʼapjjäta ukat qhanañchtʼapjjäta ukjja jumaw ajlliñama. Chʼiyartʼayat jiskʼa pʼeqeñchäwinakajja, kunjamsa titulon jisktʼapar qhanañchi uk sum yateqerir amuytʼayäta.

• “Jukʼamp yatjjatañamataki” sat recuadrotï yatichäwin utjchi ukhajja, liytʼapjjañamawa ukat ukarjam lurañapatakiw yateqerir chʼamañchtʼañama.