Cristianonakatakejj janiw Moisesan Leyip phoqañajj wakisjjeti. Ukampis Diosajja, wali wakiskir mandamientonakap phoqañas mayiskakistuwa, ukanakajj Diosarusa jaqe masimarusa munasiña siski ukanakawa (Mt 22:37-39). Diosaru ukhamarak jaqe masisar munasiñatakejja, wal chʼamachasiñasaw wakisi. Ukhamajj ¿kunsa ukatakejj lurañasa? Biblia sapüru liyiñasawa, uka toqetwa lupʼiñasaraki, ukhamatwa Diosajj kunjamasa qhawqha munasirisa uk amuyañäni (Sl 27:4). Ukham lurañäni ukhajja, Diosarojj jukʼampiw munasiñäni. Ukatjja jupjamarakiw amuyañäni. Ukaw Diosan mandamientonakap phoqañatakisa, mayninakar munasiñatakis yanaptʼistani (Jn 13:34, 35; 1Jn 5:3). Jichhajja, kunanakas Biblia liykasajj wali sum amuytʼañatak yanaptʼistaspa uk kimsa toqet yatjjatañäni:

• Ukanksnas ukham amuytʼañasa. Ukatakejja taqpach amuyumpiw yatjjatañasa. Ukanksnas ukhamwa amuytʼañasa. Uñjksnas ukhamwa amuytʼañasa, kunanakas istʼasi, kunanakas thujstʼani (qʼaptʼani) ukanakwa amuytʼañasa. Kunjamas liyktan uka jaqenakajj jikjjatasipjjpachäna ukwa amuytʼañasaraki.

• Walja toqenakatwa Biblia liytʼsna. Jachʼatwa liytʼsna, jan ukajj grabacionanakwa istʼaraksna. Janiw Biblia qalltat tukuykam liyiñajj wakiskapuniti. Bibliajj parlki uka jaqenakata, jan ukajj yaqha toqenakatwa liytʼaraksna. Sañäni, Jesusan sarnaqäwipat yatjjatañatakejja, Diosan Arupat yatjjatañataki yanaptʼa sat folleton 4, ukat 16 jaljanakap liytʼsna. Maysa toqetjja, sapürutak Bibliat apstʼat textojj utjki ukan taqpach capitulop liytʼaraksna. Jan ukasti, Bibliajj kunjamtï qellqaskäna ukarjamaw liytʼaraksna.

• Kuntï liyktan uk sum amuyañasawa. Walja capitulonak liytʼañat sipansa mä capítulo liytʼañajj jukʼamp sumawa, ukhamatwa kuntï liytʼktan uk sum amuytʼañäni ukhamarak lupʼiñäni. Kuna toqenakatsa parlaski uk sum amuytʼañataki ukat yatjjatañatakiw chʼamachasiñasa. Mapanakampi ukat Biblian diccionariopampiw yanaptʼayassna. Ukatjja kuntï jan sum amuytan ukanakat yatjjatañasawa, qhawqha tiempotï Biblia liytʼktan ukha tiemporakiw ukjjat lupʼiñasa.