KUNATSA UK LURAÑAJJ WAKISI. Bibliat yateqerisatï wakichtʼasini ukhajja, kuntï yatichkañäni uk amuyañajj janiw jupatakejj chʼamäkaniti ni armkarakinisa. Ukarakiw Diosar jukʼamp serviñapatak yanaptʼani. Bautisasjjani uka qhepatsa, tantachäwitakisa predikañatakis wakichtʼasiñapawa, ukhamat Diosar taqe chuyma serviñapataki (Mt 25:13). Ukhamasti sapa kuti sum wakichtʼasiñ yateqani ukhajja, wal yanaptʼani. Ukhamajj qalltatpachaw yateqerisarojj sum wakichtʼasiñapatak yanaptʼañasa.

KUNJAMSA UK LURSNA:

• Jumaw nayraqat wakichtʼasiñama (Ro 2:21). Kunjamsa yateqerimar yanaptʼasma uk amuytʼasaw sapa kuti wakichtʼasiñama (km 11/15 pág. 3). Kunjamsa jumajj wakichtʼasta ukwa libroman uñachtʼayañama.

• Wakichtʼasiñapatak chʼamañchtʼam. Sapa kuti Bibliat yatjjatapjjsta ukhajja, yateqaskakiñatakejj kunatsa wakichtʼasiñapa ukwa qhanañchtʼasma. Kuna horasarus tiempo apstʼasispa ukwa sarakisma. Yaqhep jilat kullakanakajja, yateqeriparojj libropwa maytʼapjje, ukhamat kunjamsa wakichtʼasiñajj yanaptʼi uk amuyañapataki. Wakichtʼasini ukhajja, walik ukham lurtajja sasaw chʼamañchtʼañama.

• Kunjamsa wakichtʼasispa uk yatichäta. Yaqhep jilat kullakanakajja, Bibliat nayrïr kutinakan yatichkasaw yateqeriparojj mä yatichäwi wakichtʼasiñapatak yanaptʼapjje.