KUNATSA UK LURAÑAJJ WAKISI. Apóstol Pablojj jilat kullakanakar chʼamañchtʼañatakejj 14 cartanakwa qellqäna, 1 Corintios cartajj ukanakat maynïriwa. Carta qellqañajj akanakanwa yanaptʼaspa: qellqki ukajja sumwa arunakap ajlltʼaspa, carta katoqeristi walja kutiw liytʼarakispa. Cartampejj familiaranakasaru, uñtʼatanakaru, jan jikjjatañjamäki ukanakaruw yatiysna. Sañäni, jukʼamp yatjjatañ munapki ukanakaru, jayan jakasipki ukanakaru. Mä jan uñtʼataru carta qellqkasajja, ¿kunsa amtañasapuni?

KUNJAMSA UK LURSNA

• Kunjamtï maynirojj parltʼksna ukham arunakampiw qellqtʼañasa. Khitïtansa, kunatsa qellqtan uk qhanwa qellqtʼañasa. Ukjjarusti, inas mä jisktʼa qellqtʼsna ukat Internetan jw.org cheqajj utjkistu uk qellqtʼaraksna. Kunjamsa jaqenakar pachpa utapan Bibliat yatichtan ukanakatwa qhanañchtʼsna. Bibliat yatichañatak qellqatanakajj utjkistu ukanakat mä yatichäwipan pʼeqeñchäwipwa qellqtʼaraksna. Cartamp chikajja, Internetar jw.org cheqar mantañatak tarjeta, tantachäwinakatak invitaciona jan ukajj mä tratadwa ucharaksna.

• Jukʼa arunakampikiw qellqañasa. Wali jachʼa qellqsna ukhajja, janiw liytʼañ tukuykaspati (“Yateqasiñatak carta” siski ukwa uñjjattʼäta).

• Carta qellqatajj janiw pantjatäñapäkiti, fácil liytʼkayäñapawa, munasiñampi, respetompi qellqtʼatäñaparakiwa.