Davidajj taqe chuymaw Jehová Diosar confiyäna ukatwa Goliatar atipjäna (1Sa 17:45). Jehová Diosajj taqe amigonakap laykuw chʼamap uñachtʼayañ muni (2Cr 16:9). Jiwasar confiyañat sipansa Jehová Diosar confiyatas uñachtʼayañatakejja, ¿kunsa lursna? Uk kimsa toqet uñjañäni.

• Orasiñasapuniwa. Diosarojj janiw pantjasitanakasat perdón mayisiñatakikejj orasiñasäkiti, jan ukasti jan walinakar jan purtʼasiñatak yanaptʼañapatakis orasiñasarakiwa (Mt 6:12, 13). Jehová Diosarojj janiw kuntï amtktan ukar yanaptʼañapatakikejj orasiñasäkiti, jan ukasti janïr mä amtar purkasaw yanaptʼap mayisiñasa (Snt 1:5).

• Biblia liytʼañasapuniwa, yatjjatañasarakiwa. Sapüruw Biblia liytʼañasa (Sl 1:2). Biblian qellqatäki uka chacha warminakatwa lupʼiñasa, kunsa jupanakat yateqtan uksa amuytʼañasarakiwa ukatsti ukarjama lurañatakiw chʼamachasiñasa (Snt 1:23-25). Predikir sarañatakejj wakichtʼasiñasawa, janiw yatktan ukarukejj confiyasiñasäkiti. Tantachäwinakan sum yateqañatakejja kuntï yatjjatkañäni uk janïräkipanwa wakichtʼasiñasa.

• Jehová Diosan markapar istʼañasapuniwa. Jehová Diosan markapajj ewjjtʼanak apski uk yatjjatañasawa, ukarjamaw lurañasaraki (Nú 9:17). Ancianonakan ewjjtʼanakaparus istʼañasarakiwa (Heb 13:17).

¡ARKNAQAT UÑJASISAJJ JAN AJJSARAPJJAMTI! SAT VIDEO UÑTASAJJA, AKA JISKTʼANAKARUW QHANAÑCHTʼÄTA:

• ¿Jilat kullakanakarojj kunas ajjsarayäna?

• ¿Kunas jan ajjsarjjañatakejj jupanakar yanaptʼäna?