Moisesan Leyiparjamajja, divorciasiñ muniri mä chachajj mä documento lurañapäna. Ukhamat janïr divorciaskasajj sum amuytʼasiñapataki. Ukampis Jesusan tiempopanjja, religión pʼeqtʼirinakan yatichäwiparjamajj janiw divorciasiñajj chʼamäkänti. Chachanakajj kuna jiskʼa jan waltʼäwinakatsa divorciasipjjakirïnwa (nwtsty Mr 10:4 textotak nota: “divorcio papel”; nwtsty Mr 10:11 textotak notanaka: “warmipat divorciaski”, “adulterio juchwa warmip contrajj luri”). Ukampis Jesusajja, Jehová Diosaw chacha warmi jakasiñ uñstayi uttʼayaraki sasaw qhan säna (Mr 10:2-12). Casarat chacha warminakajja, ‘mä jañchikïpjjañapawa’, mä arunjja janipuniw jaljtapjjañapäkiti. Adulterio jucha utjani ukhakiw maynejj divorciasispa sasaw Mateo librojj uka toqet parlkasajj qhanañcharaki (Mt 19:9).

Jichhürunakanjja, fariseonakjamarakiw jilaparte jaqenakajj chacha warmi jakasiñar uñjapjje, janiw kunjamtï Jesusajj uñjkäna ukham uñjapkiti. Jan waltʼäwinakan uñjasisajj divorciasjjapjjakiwa. Ukampis cristiano chacha warminakajja, kuntï casaraskasajj Dios nayraqatan arsuwayapki ukamp phoqañataki, ukhamarak Biblian yatichäwinakaparjam jan waltʼäwinak askichañatakiw chʼamachasipjje. Munasiñampi respetomp uñjasiñajj familiaruw mayachtʼi sat video uñtasajja, aka jisktʼanakaruw qhanañchtʼäta:

• ¿Kunjamsa Proverbios 15:1 qellqatan siski ukarjam lurañatak chʼamachasisma, ukham lurañajj kunatsa wali wakiskirïpacha?

• Proverbios 19:11 qellqatajja, ¿kunjamsa familian jan waltʼayasiñanak jan utjañapatakejj yanaptʼiristam?

• Chachamampi jan ukajj warmimampi niya jaljtañampïsksta ukhajja, ¿divorciasiñ amtañat sipansa kunanak jisktʼasiñamas walïspa?

• Mateo 7:12 qellqatajja, ¿kunjamsa mä suma esposöñatakisa jan ukajj mä suma esposäñatakis yanaptʼiristam?