Munasiñaw familiarojj mayachtʼatäñapatak yanaptʼi. Janitï munasiñajj utjkaspajja maynit maynikam yanaptʼasiñajj wali chʼamäspawa. ¿Kunjamsa esposonakasa esposanakasa awk taykanakasa munasiñ uñachtʼayapjjaspa?

Munasiri mä esposojja, esposapajj kunjamäskisa, kunsa amuyi, kunanaksa muni ukanakat llakisiñapawa (Ef 5:28, 29). Jupaw familiarojj kunanakatï jakañatak wakiski ukanak churañapa. Jehová Diosar servipjjañapatakis yanaptʼañaparakiwa, Familiampi Bibliat Yatjjataña arumat janiw armasiñapäkiti (1Ti 5:8). Mä suma esposasti, esposoparojj istʼañapawa, “respetompiw” uñjañaparaki (Ef 5:22, 33; 1Pe 3:1-6). Panpachaniw taqe chuyma perdonasiñatak jankʼakïpjjañapa (Ef 4:32). Suma awk taykanakajja, taqe wawanakaparuw sum uñjapjjañapa, Jehová Diosar munasipjjañapatakis yanaptʼapjjañaparakiwa (Dt 6:6, 7; Ef 6:4). ¿Kunas wawanakamarojj escuelan llakisiyi? Jan walinak lurañatak obligata uñjasipki ukhajj ¿kunsa jupanakajj lurapjje? Familia taypin munasiñajj utjani ukhajja, taqeniw sum jakasipjjani.

FAMILIAN MUNASIÑ UÑACHTʼAYAÑÄNI SAT VIDEO UÑTASAJJA, AKA JISKTʼANAKARUW QHANAÑCHTʼÄTA:

• ¿Kunjamsa mä suma esposojj wali muñasiñampi esposapar uñji?

• ¿Kunjamsa mä suma esposajj esposopar taqe chuym respetatap uñachtʼayi?

• ¿Kunjamsa awk taykanakajj wawanakapar Diosat yatichapjje?