Cheqañchañajj yatichaña sañwa muni, ukampis castigaña ewjjtʼaña sañwa munaraki. Jehová Diosajja, kunjamtï Jupajj munki ukham adorañasatakiw cheqañchistu (Ro 12:1; Heb 12:10, 11). Awisajja, cheqañchatäsajj usuyassnawa, ukampis katoqasiñäni ukhajja, Jehová Diosamp suma uñjatäñäniwa, wal bendisirakistani (Pr 10:7). Cheqañchirinakasa cheqañchatanakasa, ¿kunsa amtapjjañapa?

Cheqañchirinaka: Jilïr irpirinakasa, awk taykanakasa, yaqhanakasa, Jehová Diosat yateqasis munasiñamp cheqañchañatakiw chʼamachasipjje (Jer 46:28). Maynirutï qhana arunakampi cheqañchañajj wakischejja, wakiski ukarjamapuniw cheqañchasiñapa, ukampis munasiñampiw cheqañchasiñapa (Tit 1:13).

Cheqañchatanaka: Kunanakatsay cheqañchata uñjaskchiñänejja, katoqasiñasawa, jankʼakiw ukarjam sarnaqañasaraki (Pr 3:11, 12). Niyakejjay pantjasirïstanjja, cheqañchatäñasajj wali wakiskiriwa, kunaymanitwa uk katoqaraksna. Kuntï Biblian liytʼktan jan ukajj kuntï tantachäwinakan istʼktan ukampiw cheqañchatäsna. Awisajj inas mä comité judicial toqe cheqañchatäñajj wakisirakchispa. Jiwasatï cheqañchatäsajj istʼasirïñäni, ukarjam sarnaqarakiñäni ukhajja, wiñay jakañwa katoqañäni (Pr 10:17).

“JEHOVÁ DIOSAJJ KHITINAKARUTÏ MUNASKI UKANAKAROJJ CHEQAÑCHIWA” SAT VIDEO UÑTASAJJA, AKA JISKTʼANAKARUW QHANAÑCHTʼÄTA:

• ¿Canon sat jilatajj kunjamas wawatpach jilsuwayi, kunas qhepat pasäna?

• ¿Kunjamsa Jehová Diosajj jilatar cheqañchäna?

• ¿Kunsa Canon jilatan sarnaqäwipat yateqsna?