Casarasiñ urutak waktʼaykasajja, casarasir cristianonakajj walja amtanakaruw puripjjañapa. Inas jupanakajj jakasipki uka cheqankir jaqenakjam walja qollqe gastapjjañapatak chʼamañchat uñjasipjjchispa. Kunjamsa casarasipjjaspa ukatak yanaptʼañ munasajja, inas familianakapasa amigonakapas amuyuparjam lurayañ munapjjchispa. Casarasirinakajj qhepat jan arrepentisipjjañapatakisa chuymapan sumak jikjjatasipjjañapatakis ¿Biblian kawkïr wiñay yatichäwinakapas casarasiñ urup waktʼayañatak yanaptʼaspa?

CASARASIÑAJJ JEHOVÁ DIOSARUW JACHʼAÑCHAÑAPA SAT VIDEO UÑTASAJJA, AKA JISKTʼANAKARUW QHANAÑCHTʼÄTA:

• ¿Kunjamsa Nicompir Julianampirojj Biblian aka wiñay yatichäwinakapajj yanaptʼäna?

  • 1Co 10:31

  • 1Jn 2:15, 16

  • Gál 5:19-21

  • 1Ti 2:9

• ¿Kunatsa casarasirinakajj experienciani mä jilatar ‘casarasïwipan pʼeqtʼañapatak’ uttʼayapjjañapa? (Jn 2:9, 10).

• ¿Kunas Nicompir Julianampirojj suma amtanakar puriñatak yanaptʼäna?

• Casarasiñ urusa fiestas kunjamänisa ukjja, ¿khitis amtañapa? (w06-S 15/10 pág. 25 párr. 10).