Awk taykjamajja, ¿kuna suma regalsa wawanakamar churapjjasma? Jupanakajj walja askinakwa munapjje, sañäni: munasiña, suma yatichäwi ukat jupanakat llakisipjjañamsa munapjjarakiwa. Ukampis Jehová Diosat kuna suma aski yatichäwinakatï Biblian jikjjataski ukwa wawanakamar churapjjasma (Juan 17:3). Jïsa, uka yatiñaw jiskʼa wawanakamarojj Jehová Diosar munasiñataki ukat taqe chuyma Jupar serviñatakis yanaptʼarakini (Mateo 21:16).

Wawanakar ‘mä qawqha yatichäwinak yatichañaw jukʼamp sumajja’ sasaw walja awk taykanakajj sapjje. Ukatpï jumanakatak Bibliat yateqañajataki sat qellqata wakichañajj wali kusiskañajja. Ukat aka qellqatamp wawanakamar yatichañajj janiw chʼamäkaniti, kunattejj sapa yatichäwinakapaw qhana arunakamp qellqatajja. Fotonakasa ukat Bibliat liytʼañatak jiskʼa tʼaqanakasa, kimsa marani jan ukajj minus maranïpki ukanakatakjam wakichtʼatawa. Ukat kunanaksa awk taykanakajj lurapjjaspa ukas utjarakiwa. Bibliat yateqañajataki sat qellqatajj wawanakar yatichañatakiwa, janiw jupanakan aleq anatasiñapatakïkiti. Antisas awk taykanakan wawanakapamp sum parltʼasipjjañapatak wakichtʼatawa.

Ukhamajj cheqa yatichäwinak ‘wawanakamar’ yatichañatakejj aka qellqatajj wal yanaptʼapjjätam (2 Timoteo 3:14, 15).

Jilatanakama,

Jehová Diosan Qhanañchirinakapan Oraqpachan Jilïr Irpirinakapa