25 YATICHÄWI

¿Awkijampiki jan ukax taykajampiki kʼuchiki jakasiristti?

“Kunapachatï awk taykamamp jakkta ukhaxa, cuartonïta ukat sapa kutirakiw issa alarapipxtamxa. Ukampis nayax mamajampikiw jakta, pachpa utanwa utjasiñajätxa ukat janirakiw kawkir istï munktxa uks alarapkituti. Mamajax ‘janiw qullqix utjkiti, pistʼakipuniwa’ siwa. Jupax irnaqaski ukhaxa, nayax utan walja lurañanakanïtwa janiw mayninakjamäkti, mä uywatäkirists ukham amuyasta.” (Shalonda, 13 marani)

CHIQPACHANSA, mä munasiri awkimp ukat mä munasir taykamp jakañapuniw khusaxa. Kunattix paninitakix wawanakar  yatichañas uñjañas yanaptʼañas janiw sinti chʼamäkiti. “Mayni sapat sipansa paniniw jukʼamp askixa, ukhamatwa jukʼamp luratas utjaraki” siw Bibliaxa (Eclesiastés 4:9).

Ukham jakasir familianakaxa chhaqtaskiwa, ukax wali llakkañawa. Amuytʼañataki, Estados Unidos markan yatxatäwinakax siwa: ‘Janïr 18 mara phuqkasaw taqpach wawanakatxa, niya chikataw ukham jan awkini jan ukax jan taykani jakapxpachäni’ sasa.

Ukhamäkchisa, yaqhip wayn tawaqunakax ukham awkimpiki jan ukax taykampik jakasipxi ukanakax wal phinqʼachasipxi. Yaqhipanakasti, jan waltʼäwinak utjipanxa, wali llakitaw uñjasipxaraki. Jumatï ukham tatamampiki jan ukax mamamampiki jakasta ukhaxa, ¿kuna jan waltʼäwinsa uñjasta? Kuna jan waltʼäwir saykatañas jumatakix wali chʼamax uk aka chiqar qillqtʼasïta.

․․․․․

Ukhamäkipansa, jan awkiman jan ukax jan taykaman munasiñap katuqkasaxa, janiw llakimp aynachtʼat wiñayatak qhiparkätati. Chiqpachansa, kunjamsa jan waltʼäwimar uñjta ukarjamäxaniwa. Proverbios 15:15 qillqatanxa siwa: “Khititix llakitäki ukatakix taqi urunakasa jan walikamakiwa; khititix kusisitäki ukatakisti jan tukuskiri kusisiñawa”. Ukhamasti, jan waltʼäwin uñjaskasasa, kunjamsa uñjta ukarjamaw jikxatasïta. Jan llakimp atipjayasiñamatakix kuns lurasma uk uñjañäni.

Jan wali amuyunakampix jan atipjayasimti

Qalltañatakixa, yaqhanakan jan wali parlatanakapampix jan apayasimti. Amuytʼañamataki, awisax yatichirinakaw awkimpiki jan ukax taykampik jakasir wayn tawaqunakatx jan walinak parlapxi. ‘Jan suma familianïtapatwa ukham jan wal sarnaqapxi’ sasaw sapxi. Ukampisa, ¿chiqapunit jumaru ukat familiamar uñtʼi, jan ukax kuntï ukham familianakat yaqhipanakax parlapxi ukakch parli?

 Biblianxa walja chiqanakanwa wajcha (iñu) wawanakat parli, ukat janipuniw jan walinak jupanakat parlkiti. Jan ukasti, ukham jan awkini jan ukax jan taykani wayn tawaqunakatx Jehová Diosax wal sintisi. *

Maysa tuqitxa, yaqhipanakax jan chuym ustʼayasiñamatakiw uka tuqit parlañx axsarayasipxi. Inas jan chuym ustʼayañamatakix awki, jaqichasiña, jaljtaña jan ukax jiwaña uka arunak jan parlapkchi. Ukatï jumar jan waltʼaykstam ukhaxa, jan uka tuqit llakisiñapatakix sum amuytʼasisaw arsutamamp amuytʼayañama. Tony sat 14 maran waynitux janiw awkiparux uñtʼkataynati, jupax siwa: ‘Yaqhipax janïr uka arunak arskasax amuktʼxapxiwa’ sasa. ¿Kuns jupax luri? Jupax jan arsuñ munapki uka arunak arsusaw parlaskaki. “Janiw phinqʼaskti uk yatipxañapwa munta”, sasaw qhanañchi.

Kunjamäñapäkanti uka tuqit armasma

Chiqpachansa, awkimampi taykamampi divorciasipxchixa jan ukax jiwxchi ukhaxa, llakita ukat janis kunas utjkaspa ukhamwa jikxatasiñjamaxa. Ukampisa tiempompix uka mayjtʼäwir yatinuqtañamawa. Bibliax akham sasaw iwxtʼi: “Janipun jisktʼasimti, ‘¿kunatsa nayra maranakax ancha sumäna?’” sasa (Eclesiastés 7:10). Sara sat tawaqitat parltʼañäni. 10 maranïkana ukhaw awk taykapax jaljtapxatayna. Jichhax 13 maranïsinxa akham sasaw iwxtʼi: “‘Awk taykajamp jakiriskayäta ukhax taqi kunanïristwa’, sasin jan llakisimti. Jan waltʼäwima utjchi ukhaxa janiw awkimampik jan ukax taykamampik jakkta ukatäkiti. ‘Khitinakatix awk taykampi jakapxi jupanakax taqi kunanïpxiw’ sasax janirak ukham amuykamti” sasa.  ¡Ukha suma iwxtʼaxä! Chiqas suma familianakasa, ukham jan waltʼäwinakan jikxatasipxarakiwa.

Kunjamas mä familiax uk sumpach amuytʼañatakixa, remonakani mä botëkaspas ukham sañäni. Taqpach remerinakax ukankaspa ukhax wali askipunïspawa. Ukhamasti, kunapachatï awkisa jan ukax taykasa mä familian jan utankki ukhaxa, mä remeris jan ukankkaspa ukhamawa, ukhamasti ukankirinakaw saraskakiñatakix jukʼamp chʼamachasipxañapa. ¿Ukampix familiaw jan waliru sarani sañt munpacha? Janiwa, taqinitï kuntï lurapxañapaki uk lurañataki chʼamachasipxani ukhaxa, puriñkam nayrar sartaskakiniwa.

¿Kuntï lurañamäki uk lurasktati?

Kunjamsa familiamarux yanaptʼasma ukatakix kimsa tuqit iwxtʼapxäma.

Jan añch qullq gastaykamti. Awkimpiki jan ukax taykampiki jakasipxi uka familianakaxa, qullqit wal llakisipxi. ¿Jumax kunjamsa yanaptʼasma? Tony sat waynitut  parlaskayätan ukaxa, siwa: “Escuelankir masinakajax sapa kutiw awk taykapar jila alani isinaka ukat zapatonak mayipxi, janitï kuntï munapki uk churki ukhaxa, janiw yatiqirix sarapkiti. Nayax janisay jila alani isiniktsa, qʼuma isimpipuniw sarta ukat utjitu uka isinaks janiw thantskti. Mamajax kunti lurañapaki uk lurañatakix wal chʼamachasi ukat nayax janiw llakisiyañ munkti” sasa. Jumax kuntï lurañamäki uk lurasax apóstol Pablotwa yatiqasiskta, jupax akham sänwa: “Nayax yattwa kunatix utjkitu ukampix kusisitäñaxa. Yatiraktwa kunjämäkitix pobresan jakañäkis ukxa, ukhamarak yatiraktwa taqi phuqtʼat jakañsa” sasa (Filipenses 4:11, 12).

Ukat kuntï utan utjtam ukanakxa jan ina chʼusar tukjkamti, ukhamatwa qullqi tuqit yanaptʼarakisma (Juan 6:12). Rodney sat waynax siwa: “Kuntï utan utjki ukanak jan pʼakjañataki jan ukax jan chhaqayañatak sumpun apnaqta, kunattix yaqha alañatakis jan ukax askichañatakisa qullqiw munasi. Jan khitis radio ischʼukki jan ukax televisión unchʼukki ukhax jiwtʼaytwa, luz jiwtʼayaraktwa, ukhamatwa jan luzat jilxattañapatakix yanaptʼta”.

Yanaptʼämach sasmawa. Sapaki uywapki uka awkisa jan ukax taykasa, janiw wawanakapar añcha lurañanak mayipkiti awisaxa janiw ni utan lurañanaksa lurayapkiti. Jan sint llakisipxañapatakiw jan kun lurayasa munañapar sarnaqayapxi. Inas akham sapxchispa: “Wali llakitäsipkiwa, janiw kuns lurayañ munkti...” sasa.

 Ukhamtï utaman pasaskchixa, inas awkimarusa jan ukax taykamarusa ukham llaktʼat uñjasax taqi kun mayiñ munchisma. Ukampisa, uk lurañ munasax jukʼampikiw llakisiyäta. ¿Yanaptʼäma sasin janit siskasma? Kuntï Tony sat waynitux lurki uk sum amuytʼma. “Mamajax mä hospitalanwa irnaqi ukat unifome uchasiñapawa—siwa—, ukhamasti nayaw uka isip plancharapta”. ¿Uk janit warminakak lurañapäki? Tonyx siwa: “Yaqhipax ukham sapxiwa, ukampis nayax yanaptʼañatakiw uk lurta” sasa.

Yuspärasirïñamawa. Ukham yanaptʼasasa, awkimarusa jan ukax taykamarusa yuspärasinwa chuym qhanartʼayasma. Mä warmix akham sasaw qillqatayna: “Jurnal irnaqasaxa, awisax arumanakax wali llakita jan ukax colerata ukhamaw utar purta. Ukhapuniw mesax wali suma  waktʼayata ukat phuchajax phayaskir uñjta”. Ukat saskakiwa, “ukatxa yuqajaw jutasin qhumantarakitu”. ¿Kunjamsa uka pasatatxa jikxataspacha? “Wal chuym qhanartʼayapxitu ukat kʼuchikiw jikxatasta.”

Uka kimsa iwxtʼäwinakatxa, ¿kawkir phuqañatakis jukʼampi chʼamachasiñama? ․․․․․

Ukham awkimampiki jan ukax taykamampiki jakasaxa, khuyapayasiri, munasiri ukat phuqiri jaqïñamatakiw yanaptʼätamxa. Ukampis janiw ukakïkiti. Jesusax akham sasaw qhanañchäna: “Katuqirit sipansa jukʼamp kusisiñaniw khititï churki ukaxa” (Hechos 20:35). Jumatakix ‘churañax’ familiamar yanaptʼañ sañ muni. Jumatï uk lurätaxa, wali kusisitaw jakasïta.

Ukampisa, awisax awk taykamaruw jumamp chik jakasiñap muntaxa. Ukhamäkchisa, nayrar sartañ yatiqäta. Ukwa Sonia sat tawaqux yatiqatayna. “Tatajax jiwkäna ukhaxa, ‘sapa mayniw sum jakasiñataki chʼamachtʼasiñapa’ sasaw maynix situ, uka arunakax wal muspharayitu ukat janiw ukham jan walin uñjasitajat añch llakisiñajakiti, ukwa amuytʼayitu” sasaw jupax amtasi. Jumax ukham amuyarakismawa. Janipun ak armasimti: kusisit jakañatakixa janiw kunjamansa jikxatasta ukatäkiti, jan ukasti kunjamsa jan waltʼäwinakamarux saykatta ukarjamaruw llakitasa kusisitasa jikxatasïta.

JUKʼAMPI YATXATAÑATAKIX MAYÏR LIBRON 4 YATICHÄWIP UÑXATÄTA

[Qhanañchäwi]

BIBLIAX KAMSISA

“Janiraki khitis thaqpati jupatakiki askïkis ukxa, jan ukasti kunatix mayninakataki askïki uka thaqarakpan.” (Filipenses 2:4)

AKHAM LURASMAXA

Awkimasa jan ukax taykamasa jan lurirjamäkta ukanak mayitap amuyasïta ukhaxa, wali respetompiw akanak sasma:

● Kunanaksa sapa maynix lurañapäki uk papelar qillqtʼas qhanaruw usktʼasiñapa.

● Ukat wakiskchi ukhaxa, kuntï sapa maynix lurirjamächi ukarjamaw luräwinakapxa amtayañapa.

¿YATIYÄTATI?

Awk taykani jakapki ukat jan kuns lurapki uka wayn tawaqunakat sipansa, utan lurañanakax jumarux suma amuytʼasirïñamatakiw yanaptʼätamxa.

¡AKANAK LURÄ!

Jan wali amtäwinakajaruxa akanak lurasaw atipjä: ․․․․․

Yaqhip jaqinakatï chuymaj jan ustʼayañataki parlañ axsarapxatap amuyä ukhaxa, ak lurä: ․․․․․

Awkijarus jan ukax taykajarusa, ¿kuns aka tuqit jisktʼañ muntxa? ․․․․․

JUMASTI, ¿KAMSASMASA?

● ¿Kunatsa yaqhip jaqinakax jan awkini jan ukax jan taykani wayn tawaqunakat jan walinak parlapxi?

● ¿Awkimas jan ukax taykamas utan lurañatak kunatsa yanapa jan maykpachätamxa?

● Kuntï jumatak lurapki ukanakatxa, ¿kunjamsa awkimarus jan ukax taykamarus yuspärasma?

[211 janan qhanañchäwipa]

“Awkijampi taykajamp jaljtapxi ukhatxa, mamajampix jukʼampwa parlapxta; jichhax sum apasipxta.” (Melanie)

[210, 211 jananakan fotopa]

Jan awkini jan ukax jan taykani familiaxa remonakan jan mä remerin botëkaspas ukhamawa. Taqiniw chʼamachasipxañapa, ukampis sapa maynitï yanaptʼäni ukhaxa, kawkharutï puripxañapäki ukarux puripxaniwa