38 YATICHÄWI

¿Jakäwijan kuns luräxa?

“Yatiqañ utar sarkasax janiw jutïri urunakat llakisirïkti. Ukampis niya tukuyañampïxayät ukhakiw kunjamas jakasïxa sasa llakthapista, irnaqañ tuqitsa ukat qullqi tuqitsa.” (Alex)

WALI jaysa auto thaknam sarañamäkaspa ukham amuytʼañäni. Nayraqatxa kawknam sarañas wakisispa ukxa mä mapa uñxattʼasax amuytʼasismaxa. Chiqansa, kunjamas jutïrin jakasïta uk amtañax niya ukhamarakiwa. Michael sat mä waynax mä Betel utan irnaqi, ukat akham siwa: “Jakäwinxa kunayman lurañanakaw utji” sasa. Ukampis jan pantjasiñatakixa, ¿kun lurañas wakisispa? “Mayniw kun lurañsa sum amtxañapa” sasaw Michael waynax saraki.

Kawkir puriñäkaspas ukhamwa kun lurañsa amtañama. Jan amuytʼasisa kawks sarakisma ukhaxa, janiw kawkirus purkasmati. Ukhamasti kawkir puriñatakisa, mä arunxa kun lurañatakisa mä mapa uñxattʼasinsa amuytʼaskasma ukham lurañamawa. Ukhamatwa Proverbios 4:26 qillqatan siski ukarjam sarnaqäta, ukanxa akham siwa: “Sum amuyasim kawkharutix taktʼtax uka chiqxa” sasa.

Jutïr maranakanxa, wali wakiskirinakat mä amtar puriñaw wakisini, Diosar yupaychañ tuqitsa irnaqañ tuqitsa  ukat jaqichasin jan ukax familianïñ tuqitsa mä amtar puriñaw wakisini. Ukatakix kunsa jakäwin munta ukwa wali sum amuytʼasiñama. Ukampis mä wakiskiriw jakäwin utji, janipuniw uk armañamäkiti.

“Diosamat amtasim”

Chiqpachapuni kusisita sum jakasiñ munsta ukhaxa, Salomón sat nayra apnaqirin arunakap istʼañamawa, jupax akham sänwa: “[Wayn tawaqükasin] jumar irnuqir Diosamat amtasim” sasa (Eclesiastés 12:1). Mä arunxa, jakäwiman kun lurañ amtkasasa, kunatix Diosar kusisiyki ukwa nayraqat thaqhañama.

¿Kunatsa? Akham sasaw Apocalipsis 4:11 jiskʼa tʼaqax qhanañchi: “Tata, nanakan Diosaxa, jumax askïtawa jachʼañchäwi, gloria, ukhamarak munañanïña katuqañatakixa. Jumaw taqi kuns ina chʼusat lurtaxa, munañamatarakwa taqi kunas jakaskaraki, juman uskutarakiwa” sasa. Jïsa, alaxpachansa aka Uraqinsa taqiniw Diosar manütanxa. “Jakañsa, samañsa, taqi kunanaksa” Jupaw churtamxa,  ukhamaxa, ¿janit jumax yuspärkta? (Hechos 17:25.) Ukhamasti, Jupatak kun lurañsa munpachätawa.

Ukhamwa Jehová Diosan Qhanañchiripa walja wayn tawaqunakax lurasipki. Wal Jehová Diosar yuspärapxi ukat sapürjamaw jupataki irnaqapxi. Jumax kuns lurarakisma uk amuytʼañäni.

Precursor regularjamaw irnaqtʼasma. Ukhamatwa walja tiempo jaqinakar yatiyir sarasma. Ukhamatarakwa jukʼat jukʼata Bibliat yaqhanakar sum yatichañsa yatiqarakisma.

Kawkintï yanapax munaski ukharuw sarasma. Kawkintï Diosan Apnaqäwipat yatiyirinakax wal munaski ukharuw sarasma. Jan ukax yaqha aruni jilat kullakanakax tantachasipki ukarus yaqha aru yatiqasax sararakismawa, ukat yaqha markar kunaw sarasma. *

Misionerjam saraña. Jumaxa wali wakichtʼat precursorjam irnaqtʼasksta, chʼamas utjaskarakchi ukat kʼumaräsksta ukhaxa, yaqha markan Diosan arunakapat yatiyir sarañamatakiw mä wakichäwi katuqasma, ukhamatwa wali kusisit sum jakasiñ jikxatasma.

Betel utan irnaqaña. Jehová Diosan Qhanañchirinakapan sucursalapan yanaptʼiriw  sarasma, yaqhipa markanakanxa, Bibliat apstʼat qillqatanakwa lurapxi ukat yaqha markanakar apayapxi.

Yaqha markan irnaqtʼir khitataw sararakisma. Kawkintix Tantachasiñ Utanaka, Jachʼa Tantachasiñ Utanaka ukat sucursalanak lurasiski uka markanakaruw yanaptʼir sarasma.

Escuela de Entrenamiento Ministerial ukar saraña. Sapakïsksta ukat irpir chuymanjam jan ukax jupanakan yanapiripjam irnaqtʼasksta ukat Diosan Aruparjam sum sarnaqasksta ukhaxa, kunjamas mä tamax apnaqasiñapa uka tuqitwa mä wakichäwi katuqasma, ukat sum arstʼañ tuqitsa ukhamaraki. Ukat tukuyxäta ukhaxa, yaqha markan yanaptʼañamatak kunaw irpapxiristamxa.

Jumax kuns luräta

Diosatak sapürjam irnaqtʼañax wali askiwa, walja bendicionanakwa katuqasma. Ukampis nayraqatxa sum amuytʼasiñamawa. Akhamwa jisktʼasisma: “¿Kunatï jakañataki munaski ukanaka kunjamat jikxatañsa yatti?” sasa.

Kelly sat mä tawaqux precursoräñ munäna ukat uka amtaniw mä irnaqäwi thaqhäna. Ukat “kunanakatix munaski ukanak altʼasiñatakikiw mä irnaqäwi jikxatta, ukhamat sapürjam Diosataki irnaqañajataki” sasaw säna.

 Ukatwa yatiqañ utar sarkasax may lurañ yatiqatayna, ukhamatwa uka amtapa phuqañatakix yanaptʼasitayna. Ukat akham sasaw wali kʼuchiki saraki: “Taqi kunat sipansa, nayax sapürjam Diosatak irnaqañ wal qalltañ munirïta. Uk lurasax janipuniw amtasktti” sasa.

Yaqhanakampi yanaptʼayasiñamarakiwa

Jan uñtʼat yaqha chiqanakan saraskasma ukhaxa, kawkir puriñatakis jisktʼasismawa. Ukat jakäwin kun lurañ amtkasas ukham jisktʼasiñaw wakisirakispa. Mä arunxa, yaqhanakaruw jisktʼasisma. Ukat kunapachatï maynix suma iwxanakar istʼi ukhaxa, ‘sumakiw amtanakapax phuqasi’ (Proverbios 20:18, NM).

Nayraqatxa awk taykamaruw jisktʼasisma. Ukampis Diosan kamachinakaparjam sarnaqir ukat amuytʼasir jilat  kullakanakaw sum amuytʼayarakiristamxa. Betel utan irnaqtʼir Roberto sat mä waynax akham siwa: “Tamasankir jan ukax jakʼa tamanakankir jilïr jilat kullakanakax kunjamas sarnaqapxi uk amuyañasawa” sasa.

Ukampis taqinit sipansa Jehová Diosaw suma amtanakar puriñamsa ukat wali kusisit jakasiñamsa muni. Ukhamasti juparuw mayisiñama, jupaw ‘kunäkitix munañapaxa uk amuyañaru’ yanaptʼätamxa, jutïrin sum jakasiñamataki (Efesios 5:17). Kunjamtï Proverbios 3:5, 6 jiskʼa tʼaqax siski ukhampun lurañamaxa, ukanxa akham siwa: “Tatitur taqi chuymamampi katuyasim; juman chʼikhi kankañamarukix jan alkatasimti. Taqi luräwinakamanxa Tatitutxa amtasipunim, ukatsti jupax chiqa thakinjamwa irpaskätam” sasa.

Jukʼamp yatxattʼañatakixa Los jóvenes preguntan... ¿Qué haré con mi vida?, siski uka video uñjasma, DVD uka discox kimsa tunkatsa jila arunakatwa utji

[Qhanañchäwi]

BIBLIAX KAMSISA

“Yantʼapxarakita, nayaw jumanakaru alaxpach ventananak jistʼaranisina walja bendicionanak apayanipxäma jilarkiriraki.” (Malaquías 3:10)

AKHAM LURASMAXA

Khitis Diosar sapürjam walja tiempo luqtaski ukampiw parltʼasma. Kunatsa ukham lurañ amtpacha ukat kuna bendicionanaksa katuqpacha ukanak jisktʼañamawa.

¿YATIYÄTATI?

Kunjamatix radios televisionas luzampi aqtixa, ukhamarakiw cristianonakax Diosar luqtañatakix qullan ajayutakïtanxa (Hechos 1:8).

¡AKANAK LURÄ!

Jukʼampiw yatiyir sarañ muntxa, ukatwa akïr jilatar jan ukax kullakar jisktʼasï ․․․․․

Awkijarus jan ukax taykajarusa, ¿kuns aka tuqit jisktʼañ muntxa? ․․․․․

JUMASTI, ¿KAMSASMASA?

● ¿Jumax kun lurañatakis khusäta?

● ¿Kunjamatsa ukampix Jehová Diosar yupaychasma?

● Aka yatichäwinxa Diosar sapürjam luqtañ tuqitxa walja amtanakatwa parlasiwayi, ukampis ¿jumax kawkïrsa munasma?

[313 janan qhanañchäwipa]

“Awk taykajax wal muspharayitu. Yatiqaskañwa wali sum sarnaqapxi, qullqit pistʼatas walja maranakaw taqi chuyma Diosar luqtasipki, ukampis sapürjam Diosatak irnaqañajatakiw wal chʼamachapxirïtu.” (Jarrod)

 [314 janan recuadropa]

Wakichasiñatak jananaka

¿Jichhax kuns luräxa?

Kawkïrsa jumax lurañ munasma ukwa chimptʼäta. Ukat chʼusawjaruw jumax kunjamtï jikxataskta ukxa qillqtʼasisma, jan ukax yaqha amtanaksa qillqtʼasirakismawa.

Yatiyir sarañataki

□ Jukʼampwa sapa phaxsin irnaqañ munta ․․․․․ horanakaw yatiyir saräxa

□ Sapa phaxsiw ․․․․․ qillqatanak jaqinakar churäxa

□ Iyawsäwijxa Bibliampiw qhanañchäxa

□ Sapa phaxsiw ․․․․․ yatiqañ munirinakan ukarux kuttʼäxa

□ Bibliat mayniruw yatichäxa

Yaqhanaka: ․․․․․

Bibliat yatiqañataki

□ Sapüruw ․․․․․ jananak Bibliat liyïxa

□ Taqi tantachäwinakatakiw wakichasïxa

□ Aka tuqinakatwa Bibliat jukʼamp yatxattʼañ muntxa: ․․․․․

Tama taypin nayrar sartañataki

□ Mä kutis sapa tantachäwin arstʼapunïwa

□ Mä jilïr jilatampi jan ukax kullakampiw parltʼasiñ munta jukʼamp jupar uñtʼañataki

□ Chuymankipstat jan ukax usuntat jilat kullakaruw tumptʼir sarañ muntxa

Yaqhanaka: ․․․․․

¿Kuna urusa akanak qillqtʼastxa? ․․․․․

Kunjamakis aka amtanakampix phuqaskta uk yatiñatakix sapa suxta phaxsiw ak uñxattʼäta. Ukat wakisini ukhax yaqhanakwa qillqtʼasisma jan ukax pachparuw mayjtʼayasma.

[312 janan fotopa]

Chʼam jan ina chʼusar aptʼasiñatakix mä amtanïñamawa