¿Jamasat uñtʼatanïñax kunatsa jan walïki?
2 YATICHÄWI
¿Jamasat uñtʼatanïñax kunatsa jan walïki?
Nataliax janiw kamachtʼañsa yatkänti. Kunattix Hugo sat yatiqir masipawa sapa kuti arxayatayna. Nataliax akham siwa: “Suma uñnaqtʼanïnwa, ukat amiganakajax janiw ukham yaqha wayn jikxatkätati sasaw sapxiritäna. Walja tawaq masinakajaw jupar wal munapxirïna, ukampis Hugox janiw jupanakar yäqirïkänti... Nayarukiw uñchʼukiskirïtäna”.
Ukhamasti, Hugox nayampiskañäni sasaw Nataliarux satayna. Ukat jupasti Jehová Diosan Qhanañchiripätwa ukat tataj mamajas janiw yaqha yuqallampix mistuykitaspati sasaw satayna. Ukampis Hugox akham sarakitayna: “¿Janit jamasat mistksna?” sasa.
SUMA uñnaqtʼan tawaqu jan ukax suma uñnaqtʼan wayna ukham siristam ukhaxa, ¿kamsasmasa? Nataliax iyaw sataynawa. “Jehová Diosar munasiñapatakix nayaw yanaptʼäxa” sasaw taqi chuyma amtatayna. Ukampis ¿kamachataynasa? Mä jukʼaruw uk yatiñäni. Nayraqatxa, kunatsa yaqhip wayn tawaqunakax jamasat mistsupxi uk yatxatañäni.
Kunatsa jan arsupki
Kunayman amuyunakaw utji, ukatwa yaqhip wayn tawaqunakax jan awk taykapar yatiyasax panin mistsupxi. David sat mä waynax siwa: “Maynimp uñtʼasiñ munta sataxa, janiw awk taykax walikiw siskaniti uk yatisinwa jan yatiyapkiti” sasa. Jane sat tawaqux sarakiwa: “Awk taykar jan jaysañ laykukiw uk lurtaxa. Sintiw wawarjam uñjxapxtamxa ukat jan yatiyasaxa kuntï amtktax uk lurtaxa” sasa.
Jupamp mistsutamatxa, ¿kuna razonanakatsa awk taykar jan yatiykarakismaxa? Uka tuqit aka chiqar qillqtʼasïta.
․․․․․
Chiqpachansa, wawanakax awk taykapar istʼapxañapaw siw Bibliaxa, ukax chuymamankaskiwa (Efesios 6:1). Ukat kunatsa uka imillampix jan ukax uka yuqallampix jan khitañ munapkpachätam ukxa sum yatisktaxa. Ukampis inas akham amuyasiraksta:
● “Kawkitäkiristsa ukham amuyasta. Taqiniw uñtʼatanïpxi.”
● “Mayniruw wal munta, ukampis janiw religionajankkiti.”
● “Cristiano masijampiw mistuñ munta, ukampis janiw jaqichasiñatak wakichatäkti.”
Ukham jikxatasta sasin awk taykamar sasma ukhax kamsiristamsa ukxa amuyasxpachätawa. Awk taykaman iwxtʼanakapan askïtapxa yatisktawa. Ukampis Manami sat tawaqjamaw jikxatasisma, jupax akham sänwa: “Yatiqir masinakamax sintipuniw panin mistsuñarux wiytapxtamxa, ukat awisax payachasiñjamäxiwa. ‘Janiw uñtʼatanïñ munkti’ satax janiw amuyapkiti. Ukhamaraki, sapakïñas janiw askïkiti” sasa. Ukham jan waltʼäwinakan uñjasisaw yaqhip wayn tawaqunakax awk taykar jan yatiyasax mistsupxi. Ukampis ¿kunjamats awk taykax jan yatipki?
“Janiw awisätat sapxituwa”
Ukham jamasat mistsuñatakixa, waljaniw kʼarisiñar puripxi. Awisax telefonot jan ukax Internetnam parlasipxi. Mayninakan uñjkataxa, amigokïpxaspas ukham sarnaqapxi, ukampis Internetata, celularat qillqasipxatapasa, telefonot jawsasipxatapasa janiw ukhamäxiti.
Ukat yaqhipanakaxa, walja wayn tawaqunakamp mistusin panin sarnaqañatakiw wakiyapxi. Santiagox akham siwa: “Mä kutixa, mä lugarar sarapxañäni sasaw amtasitayna, ukampis mä yuqallamp mä imillamp chika sarnaqapxañapatakiw ukax wakiyasitayna. Ukat qhiparux janiw khitirus arsupxätati sasaw sapxitu”.
Kunjamtï Santiagox siskixa, awisax amigonakaw imxatapxi. “Khitis yatipuniwa, ukampis jan aljantañatakiw jan arsupkiti” sasaw Carol sat tawaqux saraki. Ukham sarnaqirinakaxa, awisax jan axsartʼasaw kʼarisiñar puripxi. Bety sat 17 maran mä tawaqux siwa: “Jan katjayasiñatakixa, awk taykarux kʼarinak parlapxi: kawkiruw sarä sasaxa, yaqha chiqaruw sarasipki” sasa. Misaki sat 19 marani mä tawaqux ukham sarnaqaskäna. “Jan amuyapxañapatakixa kunaymanitwa awk taykajatak parlirïta. Ukat kʼarit jan uñtʼayasiñatakixa, uñtʼataj tuqitakwa kʼarisirïta” sasaw uka tawaqux arsusxi.
¿Kunarus purtʼasismaxa?
Khitimp jamasat mistuñ lupʼisksta jan ukax mistsxsta ukhaxa, aka pä jisktʼwa jisktʼasiñama:
¿Ukat kamachapxäsa?¿Mä jukʼa tiempot casarasxañti amtta? “Jan jaqichasiñ munasa, maynimp mistsuñaxa, jan aljañ munkasina ‘aljañatakiw’ sasin muyuyañamp sasiwa” sasaw 20 marani Evan sat waynax satayna. Uk yatisaxa, ¿jumamp mistsuski uka tawaqusa jan ukax uka waynasa kamsanisa? Proverbios 13:12 qillqatax mä qhawqha arunakamp akham siwa: “Kuna suytʼäwinakatix jan phuqhaskxi ukasti chuyma usuyasiñakiwa” sasa. ¿Ukham tʼaqhisiyañti munta? Ukampis janiw ukakïkiti: awk taykamasa ukat jumat llakisipki ukanakasa kunjamtï sarnaqaskta uk jan yatisaxa, janiw kunjamatsa jan juchar puriñamatakix iwxtʼañ yatipkaniti (Gálatas 6:7).
¿Jehová Diosatakix walikïskpachati? “Taqi kunaw qhanstayata, ukhamarak jistʼarata khitirutix [cuenta] churkañäni ukan nayraqatapanxa” siw Bibliaxa (Hebreos 4:13). Ukhamasti, janiw Dios nayraqatan sarnaqatas imantksnati, ni amigosarus imantksnati, kunattix jupax yatxiwa. Ukhamax khitir kʼarinak parlasksta ukhaxa, amuytʼasïtawa, Jehová Diosax kʼarisiñarux uñisiwa. Kunanaksa uñisi ukanakax mä listanjam Arupan qillqatawa, ukat ‘kʼari parlañasti’ nayraqatankiwa (Proverbios 6:16-19).
Yatiyañamawa
Ukham jamasat khitimp mistusksta ukaxa, jankʼakiw awk taykamar jan ukax yatxattʼat cristianonakar yatiyañama. Jan ukax amigom ukham mistsuskchi ukaxa, jan imxatamti (1 Timoteo 5:22). Ukham sarnaqasin jan walir purtʼasipxaspa ukaxa, ¿janit jumax juchanïkasma?
Diabetes sat usuni amigomar musqʼanaka manqʼaskir uñjasma, ukat jupax janiw arsütati siristam ukhaxa, ¿kamachasmasa? ¿Imxatasmati? ¿Jan ukaxa, jukʼamp usuntasa jan jiwañapatakix yanaptʼasmacha?
Ukhamasti, jamasat amigomax mistsuskchi ukhax niya ukampi sasirakïspawa. Janiw amigojäñ munxaspati sasax jan axsarayasimti. Taqi chuyma amigomjam uñjstam ukaxa, tiempompix yanaptʼatamatxa yuspärätamwa (Salmo 141:5).
Kunatsa ukham sarnaqtaxa, ¿amuytʼasirïtam laykuti jan ukax imantañ laykucha?
Chiqasa, yaqhipanakax suma amtampiwa mayninakar jan yatiyañ amtapxi. Amuytʼañataki, mä waynamp mä tawaqumpix mä qhawqha tiempo sum uñtʼasiñwa amtapxaspa, ukampisa janiw taqinin yatiñapxa munapkaspati. Tomás sat mä waynaxa, “¿kunürus casarasxäta?” sas jan jiskhiyasiñ laykuw yaqhipanakax jan arsusiñ amtapxpacha sasaw arstʼaraki.
Chiqpachansa, jaqichasiñ tuqir wal wiytapxi ukax janiw tant askïkiti (El Cantar de los Cantares 2:7). Ukatwa yaqhip parejanakax uñtʼasisipki uk jan yatiyapkiti (Proverbios 10:19). “Ukhamatwa, panipäpxapunïnit janicha ukxa tiempomp sum amuytʼasipxaspa. Panipäpxapunin ukhaw yatiyasipkani” sasaw Anna sat 20 marani tawaqux qhanañchtʼaraki.
Ukhamäkipansa, yatipxañapäki ukanakar jan awisañax janiw askïkaspati, purapatwa awk taykanakapax yatipxañapa. Jan yatiyañ munksta ukhaxa, “¿kunatsa jan yatiyañ munktxa?” sasaw jisktʼasiñama. Kunanakatsa awk taykamax jan munkaspa ukxa inas jumax chuymaman yatisisksta.
“Kun lurañajas uk amtawayta”
Qalltan parlkayätan uka Natalia sat tawaquxa, jupjam jan waltʼäwin uñjaskatayna uka cristianan sarnaqäwipat istʼasawa pantjasitapat amuytʼasitayna. “Uka kullakax uñtʼatapar janiw sisxatayna uk istʼasawa, kun lurañajas uk amtawayta” siw Nataliaxa. “Hugo, janiw jumamp mistuñ munxtti” sañaxa, ¿janit chʼamäkpachäna? “Janiw jupjam chuymar purtʼkir suma yuqallax utjkänti. Walja semananakaw wal jachta” siw Nataliaxa.
Taqi kunat sipansa, Nataliax Jehová Diosaruw munasïna, pantjaskchïnsa, janiw jichhax wasitat pantjasiñ munkänti. Jukʼat jukʼatwa llakipax chhaqtxäna. “Jichhaxa, nayrat sipansa Jehová Diosampix jukʼamp sum apasta. Ukham horasapar yanaptʼa churistu ukatxa, ¡walpun Diosar yuspärta!” siw Nataliaxa.
Uñtʼasiñatakix wakichatäxtati, ukat khitimpis uñtʼasïta uk jikxatxtati. Ukampis ¿kunjamatsa jumatakjamätapxa yatisma?
BIBLIAX KAMSISA
“Yatisipxaraktwa nanakan chuymanakaxax walikïskatapa taqi kunans sum sarnaqañ munapxatanakax layku.” (Hebreos 13:18)
AKHAM LURASMAXA
Maynimp mistsusax janiw taqinir yatiyañax wakiskiti. Ukampisa purapatwa awk taykanakamar yatiyapxañama.
¿YATIYÄTATI?
Qhan parlañaw sum apasiñatakix wakisi. Ukhamasti, awk taykamar jan yatiyasa maynimp mistsüta ukhaxa, jumat payachasxapxaniwa ukat uñtʼatamampis janiw sum apasipkätati.
¡AKANAK LURÄ!
Mä cristianompitï jamasat mistsusktxa, ¿kun lurañajasa? ․․․․․
Mä amigojaw mä tawaqump jamasat mistsuski, ¿kuns luriristxa? ․․․․․
Awkijarus jan ukax taykajarusa, ¿kuns aka tuqit jisktʼañ muntxa? ․․․․․
JUMASTI, ¿KAMSASMASA?
● Chʼiyar letranakampi uñstki uka qillqatanak wasitat liytʼam ukax 22 janankiwa. ¿Jumax ukham jikxatasirïtati?
● Jan uka amuyunakampi apayasiñatakisa ukat jamasat maynimp jan mistsuñamatakisa, ¿kuns lurasma?
● Mä amigomatï jamasat maynimp uñtʼasiñatak mistsuskchi ukhaxa, ¿kamachasmasa? ¿Kunatsa?
[27 janan qhanañchäwipa]
“Hugompix janiw parlxapxtti. Chiqpachansa, sapüru jupamp yatiqañ utan uñjasisax walpun tʼaqhisiwayta. Ukampis Jehová Diosaw taqi kunsa sum yati, ukatwa jupar alkatañasa.” (Natalia)
[25 janan fotopa]
Jamasat mistsuski uka amigosar imxatañaxa, diabetes usun amigosarus musqʼanak manqʼatapat imxatksna ukampi sasiwa
