¿Kunatsa sinti chiqapar lurañ munir jaqïpachätxa?
27 YATICHÄWI
¿Kunatsa sinti chiqapar lurañ munir jaqïpachätxa?
Examenanakan jan jila nota apsutam laykuxa, ¿walt chuym ustʼayasta?
□ Jïsa
□ Janiwa
Kunapachatix mä pantjasitam uñxatayapxtam ukhaxa, ¿janis kunatakis walïkasma ukhamti amuyasta?
□ Jïsa
□ Janiwa
¿Kunatsa jan amigonakanïkta, jan pantjasipxañapti munta?
□ Jïsa
□ Janiwa
AKA jisktʼanakarutï mayarus “jïsa” sasin chimptʼawaystaxa, inas janipun pantjasiñ munir jaqinakjamästa. Taqi kuna sum lurañ munsta ukax wali askiwa. Chiqpachansa, Biblianxa ‘kunsa sum lurki’ uka jaqinakatxa sum parli (Proverbios 22:29). Ukhamasti, ¿kunas jan walïkixa? Yaqhipanakax janipuniw mä jukʼsa pantjasiñ munapkiti, sinti chiqapar lurañwa munapxi.
Javier sat 19 marani waynax yatiqañ utar sarañ niy tukuyasax kunjamas jikxatasïna uk akham sas arsu: “Examenan jan jila nota apsusaxa, jan wali yatiqirïkiristsa ukham amuyasiyäta. Piano yatichapkitäna ukansa ukham amuyasirakiyätxa. Kunjamtï ‘pianista profesionalax’ tuktʼkixa, ukham tukañwa munayäta” siwa.
Sinti chiqapar lurañ munir jaqixa, janiw Diosar sum yupaychkaspati. Amuytʼañataki, tama taypinxa mä waynaru akham sasaw sapxaspa: “Aka waynax yatiqaskañaw” sasa. Ukat juparukis taqinis uñchʼukiskaspa, janis mä jukʼs pantjasiñapäkaspa ukhamwa amuyasispa. Chiqasa, jilat kullakanakax ukham wayn tawaqunak utjipanxa wal kusisipxi. Ukampis uka waynatï “suma cristianot” uñtʼayasiñ layku, taqi kuns sinti chiqapar lurañatak chʼamachasini ukhax janiw kusisit chuymamp luqtxaspati. Ukham jikxatasisax yanaptʼwa mayiñapa, ukampis yaqhipanakax “suma cristianot” uñtʼayasiñ laykux janiw yanap mayipkiti. Yamas jan “suma cristianüñ” puedxasax inamayas chʼamachasiskaspa ukham amuyasipxaspa, ukat jaytañarus puripxaspawa.
Ukham amuyu kunjamatsa apanuksna
Janipun akchʼas pantjasis lurañax utjkaspasa ukhamwa yaqhipanakax amuyapxi. Ukampis janiw ukax ukhamäkiti, pantjasiñax utjakipuniwa. Bibliax qhanpachwa sixa: ‘Taqiniw juch lurapxixa’ sasa (Romanos 3:23). Jïsa, taqinis pantjasirïtanwa. Taqi kun sinti chiqapar lurañ munañaxa, “thuqtasinxa jamachʼjamaw jaltäxa” sañäkaspa ukhamäspawa. Inamayaw maynix chʼamachasiskaspa, ukampis pantjasiñax utjakipuniwa.
Ukhamaxa, sinti chiqapar lurañ munir jaqïsta ukhaxa, ¿kamachasmasa? Aka iwxtʼanakaw yanaptʼiristamxa:
Khitinakas chiqpachansa nayrar sartapxix ukwa sum amuytʼasiñamaxa. ¿Taqinir atipä sasati inamay qariskta? Biblianxa ukham chʼamachasiñarux “thayarusa katthapï” sapkaspa ukhamaw siwa (Eclesiastés 4:4). Chiqpachansa, mä qhawqhanikiw taqinir atipañarux puripxi. Ukampis kunapachatï maynix jachʼar puriski ukhaxa, jankʼakirakiw yaqhax uñstxaraki. Ukhamasti, nayrar sartañatakixa, janiw mayninakat jiläñax wakiskiti, jan ukasti chʼamasarjam suma lurañar uchasiñaw wakisixa (Gálatas 6:4).
Kunanaktix lurirjamäkta ukanakak amtañamaxa. Kuna amtäwi phuqañ munasasa, kunanaksa lurirjamäta jan ukanakak amtamti, jan ukasti kunanaksa jan lurirjamäkta uksa amtañamarakiwa. Altʼat chuymanïñamawa ukat kunanaksa lurasma uksa sumwa yatisiñamaraki, ukaw lurañjam amtäwinakar puriñamatakix yanaptʼätamxa. Apóstol Pablox akham sasaw iwxtʼäna: “Taqiniru[w] sapxsma: jan maynis jupa kipkatxa lupʼpati kuntix lupʼiñäki ukat jukʼampxa” sasa (Romanos 12:3). Mä arunxa, kuna amtäwinaksa chʼamamarjam lurasma ukat kunanaksa jan lurkarakisma ukwa amuykiptʼasiñama. Sum lurañatakix taqi chuymaw chʼamachtʼasiñama, ukampis janiw sinti “chiqaparupuni” lurañxa amtañamäkiti.
Jan lurirjamäxasax jan colerasimti. Jan lurañjamäki ukanak lurañaruw uchasisma, sañäni, música tukañwa yantʼasma. Ukampis jan tukirjamäxasax jan colerasimti. Pantjasstaxa, lartʼasim ukaw yanaptʼätamxa. “Laruñ horasa[w]” utji siw Bibliaxa (Eclesiastés 3:4). Pantjasïta ukhax ukham chuymanïñaw yanaptʼätamxa, yatiqkasax pantjasiñax utjapuniwa. Chiqasa, kuna luratas jan sumar mistki ukhaxa, llakisiñjamawa. Ukampis jan wali amuyunak apanukuñamataki chʼamachtʼasim ukat jan sinti juma kikpax kʼumisimti.
Jan armasimti: Jehová Diosax janiw “janipuni pantjasimti” siskistuti, jan ukasti “sum phuqham” siwa (Colosenses 4:17). Ukhamasti, sum phuqañataki chʼamachasïta ukhaxa, janisay chiqapar lurañjamäkchinixa, ukampis juma pachpatxa kusisitaw jikxatasïta.
Jichha tiempo jaqinakatakix chachapura warmipura chikañax askit uñjatäxiwa. Yuqall (imill) masimat lupʼiñax utjchi ukhaxa, ¿kamachasmasa?
BIBLIAX KAMSISA
“Ukampis aka uraqinxa janiw khitis aski jaqix utjkiti, janipun juch lurasa aski luririxa.” (Eclesiastés 7:20)
AKHAM LURASMAXA
“Pantjasiristcha” sasax kunsa jan lurktaxa, uka tuqitwa lupʼiñama. Kunapachkamas lurasmaxa ukwa amtañama ukat ukarjam phuqañatakiw chʼamachasiñama.
¿YATIYÄTATI?
Jehová Diosax jan pantjasirïkchisa, ukampis janiw sinti chiqapar lurañas waytʼkistuti, jupax amuytʼiriwa. Juchan jaqinakjamaxa kunjamätansa ukxa sum yatistu.
¡AKANAK LURÄ!
Sintipuni naya pachpa kʼumisï ukhaxa akanak lurä: ․․․․․
Mayninakar sinti kʼumitaj amuyasï ukhaxa akanak lurä: ․․․․․
Awkijarus jan ukax taykajarusa, ¿kuns aka tuqit jisktʼañ muntxa? ․․․․․
JUMASTI, ¿KAMSASMASA?
● Janipun phuqasirjamäkipansa, ¿kuna tuqitsa jakäwinam chʼamachasiskta?
● Jehová Diosax janiw janipun pantjasiñas suykiti, uk amuyañatakixa, ¿Bibliat kawkïr jiskʼa tʼaqanakas yanaptʼawaytamxa?
● Sinti chiqapar lurañ munirinakatxa, ¿kunatsa jaqinakax jithiqtapxi?
● Pantjasïta ukhaxa, ¿jichhat aksarux kamachätasa?
[226 janan qhanañchäwipa]
“Kun sum lurañataki chʼamachasiñax askiwa, ukampisa sinti chiqapar lurañ munañax janiw askïkiti.” (Megan)
[228 janan recuadropa]
Janipun mä jukʼsa pantjasiñ munasaxa, ¿amigonakanïsmati?
Kunjam lurañaptix munkta jan ukham luratap laykuxa, ¿janit jupamp parlxta? Suma jaqinakäsipkchisa, ukampis ¿kunatsa jan jakʼachasipkpachätamxa? ¿Janit sintïkpachäta? Bibliax akham iwxi: “Jan sinti suma jaqi tukumti, janirak sinti yatiñanis tukumti. ¿Kunatsa juma pachpax aynachtʼaskätaxa?” sasa (Eclesiastés 7:16). Jïsa, taqi kun sinti chiqapar lurañ munir jaqixa, ‘aynachtʼiwa’. Ukham amuyunïsax mayninakarus jayarstʼayiwa ukhamatwa jan amigonakanïkaspati. “Janiw khitis maynin jiskʼachatäñxa munkiti. Sinti chiqapar lurañ munir jaqinakarux uñtʼtwa, jan yäqañanakatakwa amigonakapsa aptʼasipxi” siw Amberaxa.
[229 janan fotopa]
Sinti chiqapar lurañ munañaxa, jamachʼjam thuqtas jaltañ munañamp sasiwa
