¿Kunjamatsa kusisit suma jaqïristxa?
26 YATICHÄWI
¿Kunjamatsa kusisit suma jaqïristxa?
“¿NINAX wali askiw sasmati janicha?” sasin jisktʼapxiristam ukhaxa, ¿kamsasmasa? Inas jumax akham sischisma: “Awisax jan walinwa uñjasiyistaspa awisax askirakispawa” sasa. Juyphi pacha wali thaya arumanxa, qhiri kʼuchun ninamp juntʼuchtʼasiñax wali askïspawa. Ukampis uka pachpa ninarakiw jan sum uñjatäsaxa uta nakhantayaspa. Ukapachax janiw ninarux “askiw” sasax sisxasmati.
Niya ukhamarakiw jiwasampix pasaspa. Kunjam jaqïtansa uk sum amuytʼasisa parlañäni ukhaxa, mayninakampis sum apasiñäni. Ukampis jan amuytʼasisa kuns parlatataskakiñäni ukat kuns lurthapiskakiñäni ukhaxa, jiwaspachatakis janiw askïkaspati, mayninakampis janiw sum apasksnati.
Awisax jiwaspach apnaqasiñax chʼamäspawa. Inas thithiñax jan armañjamäkchispa. Jan ukax inas awisax llakimp aptʼayasiraksta. ¿Jan ukhamäñatakix kamachtʼasmasa? Aka iwxtʼanakaw yanaptʼiristamxa.
Juma pachpaw apnaqasiñama
Kunapachatï ina chʼusat tʼaqhisiyapxistu ukhax wal chuym ustʼayastanxa. Ukampis yaqhipanakax colerampiw atipjayasipxi. Biblianxa ukham jaqinakarux akham arunakampiw uñtʼi, “colerasiri jan wali jaqi[naka]” ‘mäki kunatsa coleririnaka’ sasa (Proverbios 22:24; 29:22). Ukham colerasiñamp atipjayasisaxa, maynix kuns arsukispawa jan ukax kuns lurakispawa, ukat qhipatakwa chuym liqʼisiskaspa. Ukhamasti, maynix chuym ustʼayätam ukhaxa, ¿kamachasmasa?
Nayraqatxa, pacienciampiw sum amuykiptʼañama. ¿‘Taqpach chuymamp amuythaptʼasax’ janit armkasma? * (Salmo 4:4.) ‘Jan walit jan wal kuttʼayañax’ janiw askïkiti, jukʼampstʼayaspawa, ukwa amtañama (1 Tesalonicenses 5:15). Sum lupʼikiptʼäta ukat Diosat maytʼasïta ukhaxa, chuym ustʼayapktam ukax inas pasawayxchini ukatxa janiw ukham coleratäxarakismati (Salmo 37:8).
Chuymax ususkakstam ukhaxa, ¿kamachasmasa? “Amuktʼañ horasasa], parlañ horasasa]” utjiw siw Bibliaxa (Eclesiastés 3:7). Khititix chuym ustʼayktam ukamp parlañaw askïspa. Uk lurañax jan askjamächi ukhaxa, tatamar jan ukax mamamaruw awistʼañama jan ukax yatxattʼat jilïr amigomarus awistʼasirakismawa. Ñanqha chuymanïsina jumar tʼaqhisiystam ukhaxa, jan jumax ukham phuqsusirakimti, jan ukasti munasiñ chuymamp jupar uñjarakma. Aka uñkatasin jikxataski uka cuadrow colerasiñamp jan atipjayasiñatakix yanaptʼätamxa.
Ukampis chuym ustʼayapktam uk armxañatakix Jehová Diosar mayisiñamapuniwa, ukaw wali askixa. Pasawayxchixa janiw kamachksnasa, ukampis chuym ustʼayatax jutïrin kamachätas ukwa sum amuytʼasiñama. Colerataki sarnaqaskätaxa, colerayktam uka jaqimpis amuyunakamsa chuymamsa apnaqayasiskasma ukhamäspawa, kunjamtï anzuelo achthapiri chawllax apnaqayaski ukhama. ¿Janit askïkaspa juma pachpa apnaqasiñamaxa? (Romanos 12:19.)
Kunjamatsa jan llakisksna
“Sapa kutitjamwa jukʼamp mayjtʼañar mayjtʼañar purta ukat sintjamarakiw naya pachpax tʼaqhista. Janiw kunas chuym qhanartaykituti. Awisax ikjañkamaw jachta” siw Laura sat 16 marani tawaqitaxa. Walja wayn tawaqunakawa jakäwin ukham tʼaqhisiyatax uñjasipxi. Inas jumax ukham jikxatasiraksta. Inas awk taykamasa, amigonakamasa, yatiqañ utan yatichirimasa sinti waykatapxstma; inas cuerpomana amuyunakaman mayjtʼäwinak pasasksta; inas kun lurañ jan yatisa llakisisksta..., taqi ukanakaw qʼal aynachtʼayiristamxa.
Yamas yaqhip wayn tawaqunakax jan llakisiñatakix cuerpoparuw jan walinak lurasipxi. * Jumax ukhamästaxa, kunatsa ukham lurtaxa uk sum amuytʼasiñamawa. ¿Kunas wal llakisiytamxa? Kunatix familiamar jan ukax amigonakamar pasaski, ¿ukati llakisiytamxa?
Jan ukham llakisit sarnaqaskakiñamatakixa awk taykamampiwa parlañama jan ukax ‘llakisiñansa mä jiljam chuymachaski’ uka yatxattʼat jilïr cristianompiw parlañama (Proverbios 17:17). Liliana sat 16 marani tawaqitaxa, yaqhip cristiana kullakanakaruw awistʼasitayna. “Jupanakax jilïrinakjamax wali sum iwxtʼapxitu, jichhax amiganakajäxiwa” siw Lilianaxa. * Dana sat 15 marani tawaqitarux Diosat jukʼamp parlir mistuñaw yanaptʼatayna. “Askpun ukham lurtxa. Janipuniw ukham kusisitax jikxatasirïkti” siwa.
Ukampis wali llakitäskstasa, Diosat mayisiñxa jan armasimti. Salmo qillqiri Davitaxa, kunayman jan waltʼäwinakwa jakäwipanxa pasawayäna, ukat jupax akham sasaw qillqäna: “[Jehová] Diosar llakinakam katuyam [...], Diosar jaysirin aynachtʼañapxa, janipuniw jupax munkaniti” sasa (Salmo 55:22). Kunjamas jikxatasta ukxa Jehová Diosax sum yati. Ukhamaraki ‘jupax jumat llakisiwa’ (1 Pedro 5:7). Chuymamax aynachtʼatächi ukhaxa, amtasim “Diosax jukʼamp jachʼawa chuymasat sipansa, jupasti taqi kunwa yatiraki” (1 Juan 3:20). Kunatsa llakista ukxa Jehová Diosax jumat sipansa jukʼamp sum yati ukat chuymachtʼarakiristamwa.
Llakisiñax jan saraqkstam ukhaxa, usutäsmawa, sañäni, yaqhipanakax depresión sat usumpiw usuntapxi. * Ukhamächi ukhax doctoramp uñjayasiriw sarañama. Walikïsktwa sañax janiw walïkaspati. Auto apnaqirit amuytʼañäni, motoran jan waltʼäwip jan istʼañatak jachʼat radio tuktʼayasispa ukhaxa, ¿uka jan waltʼäwi askichaspati? Janiwa. Niya ukamp sasirakïspawa amuk aguantasiñaxa. Jukʼamp usuntasmaxa. Ukhamasti yanaptʼayasirix sarañamawa. Janiw phinqʼasiñamäkiti. Ukham depresión usump jan ukax ukham yaqha usunakamp katutäpkäna uka walja wayn tawaqunakaw doctoramp yanaptʼasisax uka usunakat mistuwayapxi.
¿Kuns aka yatichäwin yatiqawaytanxa? Kunjam jaqïtansa ukax ninjamäspawa. Amuytʼasïta ukhaxa, jumatakix wali askïniwa; colertʼasïta jan ukax chuymamamp aptʼayasïta ukhax jan waltʼañanwa uñjasisma ukat mayninakarus tʼaqhisiyarakismawa. Ukhamax juma pachpa apnaqasim ukaw wali askixa. Awisax pantjasiñanakax utjapuniwa, inas arsutamat jan ukax luratamat qhipatak arrepentischïta, ukampis paciencianïñamawa. Tiempompix sum juma pachpax apnaqasxäta, janiw colerampis chuymamampis atipjayaskätati.
¿Sinti chiqapar lurañ munir jaqïtati? ¿Kunjamatsa pantjaskasas paciencianïsmaxa?
[Qhanañchäwinaka]
^ Yatiqañ utan qallasipxstam ukhaxa, 14 yatichäwinwa suma iwxtʼanak jikxatäta. Ukat wali munat amigom chuym ustʼaystam ukhaxa 10 yatichäwi uñakiptʼarakma.
^ Ukham jaqinakax jupanakpachawa: kharinuqasipxi, ninamp nakharayasipxi, nuwjasipxi, jatʼinuqasipxi ukat yaqha ukhamanakamp lurasipxi.
^ Maynimp ukham parltʼañ axsarayassta ukhaxa, telefonotwa parlasma jan ukax cartnamwa qillqasma. Chiqpachansa, chuymas qhanartata jikxatasiñatakixa llakisiykistu uka tuqit maynir awistʼasiñax askipuniwa.
^ Llaki usut jukʼampi yatxatañatakix mayïr libron 13 yatichäwipwa uñxatarakisma.
BIBLIAX KAMSISA
“Jan ñanqhampix atipjayasimti, ukatsipan ñanqharux askimpi atipjam.” (Romanos 12:21)
AKHAM LURASMAXA
Kunas pastam ukxa sapüruw awk taykamar awistʼañama, janis wakiskirjamäkchixa awistʼasañamawa. Ukhamasti kunapachatix kuna jan waltʼäwis utjani ukhaxa, facilakiw jupanakamp parltʼäta. Ukat jupanakasa jankʼakiw istʼapxarakïtamxa.
¿YATIYÄTATI?
Sum manqʼtʼasïta ukat sum samartʼäta ukhaw coleramp jan atipayaskätati ukat kusisitaw jakasirakïta.
¡AKANAK LURÄ!
Suma chuymanïñajatakixa akanakaw chʼamaxa ․․․․․
Ak lurasaw suma chuymanïristxa: ․․․․․
Awkijarus jan ukax taykajarusa, ¿kuns aka tuqit jisktʼañ muntxa? ․․․․․
JUMASTI, ¿KAMSASMASA?
● ¿Kunatsa Diosax colerasiñamp jan atipjayasiñam munkpachaxa?
● Colerasiñamp atipjayasisaxa, ¿kuna jan waltʼäwinakarus purtaxa?
● ¿Kunjamatsa llakisiñanak jaytanukusmaxa?
[223 janan qhanañchäwipa]
“Mayniw nayatjam llakisiskäna uk yatiñaw yanaptʼawayitu, juparuw wali llakitäskayäta ukhax awistʼasta.” (Jennifer)
[221 janan tablapa/fotonakapa]
Wakichasiñatak jananaka
Juma pachp apnaqasiñamawa
Aka cuadrox phuqachañatakiwa
¿Kunanakas colerasiyiristamxa?
Yatiqir masijaw sawkasitu
Coleramp atipjayasiña
Qhuru arunakampiw tuqinuqä
Coleramp jan atipjayasiña
Janiw colerasiykitaspati uk amuyañapatakix janiw yäqkäti
¿Kunanakas colerasiyiristamxa?
Kullakajaw “mayt’astwa” sas zapatoj jamasata apsutayna
Coleramp atipjayasiña
Nayax “mayt’astwa” sasax zapatop jamasat apsurakïwa
Coleramp jan atipjayasiña
․․․․․
¿Kunanakas colerasiyiristamxa?
Castigatatwa: tataj mamajax janiw amigonakajampi khitañ munapkituti
Coleramp atipjayasiña
․․․․․
Coleramp jan atipjayasiña
․․․․․
[220 janan fotopa]
Khititix colerap chuymar imxasiski uka jaqixa, anzuelo achthapir chawlljamawa: kunattix yaqhampiw apnaqayasi
