Munat awk taykanaka

Wawanakatakixa, waynaru, tawaquru puriñkam jilsuñaxa chʼamawa, bicicleta apnaqañs yatiqasipkaspa ukhamawa: qalltanxa janiw kunjam apnaqañsa yatipkiti ukat axsarayasipxarakiwa. Chiqpachansa, wawanakan ukham uñjasiñapxa janis munkstanxa, ukampis uka jakäwxa pasapxañapawa. Ukhamasti, jan jaqusipxañapatakix kattʼasin nuktʼksnas ukham yanaptʼapxañasawa. Ukhamax suma amuytʼasiri wayn tawaqunakar puripxañapatakixa, awk taykanaka, jumanakaw jukʼamp sum yanaptʼapxasmaxa.

Chiqasa, arsuñax janiw chʼamäkiti, ukampis phuqañaw chʼamaxa. Pasïr urunakakiw yuqall wawamax jan samartʼasa taqi kun parlaskäna, ukampis jichhax janiw kun arsuñs munxiti. Ukhamarakiw imill wawamaxa, jumanakar lipʼkatatapuniw sarnaqirïna, ukampis jichhax jumanakamp chika sarnaqirxa janiw khitimpis uñjayasiñ munxiti.

Taqi uka mayjtʼäwinakarjam yanaptʼañatakix janiw jumanakatak sinti chʼamäkiti. Kunattix wali suma iwxtʼanakanïpxtawa, mä arunxa, Diosan Arupanïpxtawa.

Liyiskta uka libroxa, wayn tawaqunakarux kunayman tuqit Bibliarjam amuykiptʼapxañapatakiw yanaptʼi (4 ukat 5 jananakan jikxataski uka yatichäwinak uñxattʼma). Ukampis janiw yatipxañapatak mayakïkiti, jan ukasti yaqha yanaptʼäwinakaniwa:

1) Amuytʼasin qillqtʼasipxañapatakiw yanaptʼi. Walja chiqanakanwa qillqtʼasipxañapatakix mayisi. “¿Jan walir wiytatax kamachasmasa?” (132, 133 jananaka) satäkis ukaxa, janïr kuna yantʼäwis utjkipan wakichatäñapatakiw yanaptʼi ukat kuna yantʼan uñjasini ukhax kamachanis uk amtañapatakis yanaptʼarakiniwa. Aka librox llätunkar jaljatawa,  sapa jalja tukuyaruxa “Amuytʼäwinakama” sat chiqaw utji, ukaruw wawanakamax liytʼasax kunsa amuyapxi ukxa qillqtʼasipxaspa.

2) Jumanakamp parltʼapxañapatakiw yanaptʼi. Uka tuqitxa 63 ukat 64 janakan uñachtʼayasi, uka chiqasti akham satawa: “Chacha warmi ikthapiñatxa, ¿kamsasas awkijampis taykajampis parliristxa?” sasa. Ukat sapa yatichäwi tukuyxaruxa, “Jumasti, ¿kamsasmasa?” sat jisktʼanakan recuadrow utji. Ukax janiw yatiqatanak amtañatakikïkiti, jan ukasti wawanakamp awk taykamp parlapxañapatakiwa. Ukatxa, sapa yatichäwinwa “¡Akanak lurä!” sat recuadrox utjaraki, ukan akham jisktʼaw utji: “Awkijarus jan ukax taykajarusa, ¿kuns aka tuqit jisktʼañ muntxa?”. Uka jisktʼax jumanakar jisktʼasipxañapatak wakiyatawa.

Chiqpachansa, wawanakamax kunatï chuymapan utjki uk aka libror qillqtʼasipxañapatakixa, “janiw uñxatapkäti” sasaw amtapxañama. Ukhamarjamatï phuqapxätaxa, kuns qillqasipxi ukxa awistʼapxarakiristamwa.

Sapa maynitï aka libronïpxäta ukat suma yatxatapxarakïta ukax wali askipunïniwa. Liytʼkasaxa, wawam ukha maranixa, kunjamas jikxatasipxirïta uk amtañaruw chʼamachasiñama. Wakischi ukhaxa, kunjamäpxirïtas ukxa awistʼapxarakismawa, ukhamat wawanakamax jukʼamp atinisipxarakïtamxa. Ukampis parltʼapxätam ukhax sum istʼapxma. Jan jupanakamp parltʼañjamäkchi ukhaxa, yantʼasipkakim jan qaripxamti. Amuyatax janis ukhamjamäkchixa, wawanakax masinakapan arunakapar istʼañat sipansa, awk taykan iwxanakaparuw istʼapxi.

Awk taykanaka, Bibliat apstʼat iwxanakani aka qillqat wakiyañaxa wali askiw nänakatakixa. Aka qillqatax familpach kusisit jakasiñataki yanaptʼaspa ukwa munapxta.

Qillqirinaka