Diosajj Jehová satawa. Uka sutejj “Jupaw taqe kunsa utjayi” sañwa munaspa. Jehová Diosajj taqe chʼamani Diosawa, taqe kunas jupan luratarakiwa. Kuntï lurañ amtki ukanak lurañatakis chʼamanirakiwa.

Diosan sutipajj Hebreo arun pusi letranakampi qellqatänwa. Aymara arunsti uka pusi letranakajj YHWH jan ukajj JHVH letranakampiw qellqasispa. Hebreo arut nayra qellqatanakanjja, Diosan sutipajj niya 7.000 kutiw uñsti. Oraqpachanjja jaqenakajj mayj mayjwa Jehová sut qellqapjje arsupjjaraki.

▸ 1 yatichäwi, 15 párrafo

Bibliajj Diosan qellqayatawa, jupaw walja jaqenakampi qellqayäna. Mä jefes secretariopar carta qellqarapita sasin siskaspa ukhamawa. Secretariojj jefepan arunakap cartan qellqe, ukhamajj uka cartajj jefenkiwa. Diosajj espíritu santopampi yanaptʼasaw jaqenakarojj amtanakap Bibliar qellqayäna. Diosan espíritu santopajj kunaymanitwa Biblia qellqerinakar yanaptʼäna, awisajj visionanaka jan ukajj samkanak taypiw Diosan amtanakap yatiyäna, ukhamat Bibliar qellqapjjañapataki.

▸ 2 yatichäwi, 5 párrafo

Biblian suma yatichäwinakapajja (principios), Biblian cheqa yatichäwinakapwa qhanañchi. Biblian utjki uka suma yatichäwinakat amuytʼañäni, maynïrejj siwa: “Jumanakatejj jan wali jaqenakampi chikachasipjjätajja, kuna suma luräwinaktï lurasipkta ukjja armasjjapjjätawa” sasa. Jan wali jaqenakampi chikachasiñajj jan waliruw purtʼasiyistaspa ukwa uka suma yatichäwejj yatichistu (1 Corintios 15:33). “Kuntï maynejj phawki, ukrakwa apthapini” siski uka suma yatichäwisti, kuntï maynejj lurki ukarjamaw walinsa jan walinsa uñjasini ukwa yaticharakistu (Gálatas 6:7).

▸ 2 yatichäwi, 12 párrafo

Mä profeciajj Diosan amuytʼayat mä yatiyäwiwa, ukasti Diosan munañapat mä qhanañchäwiwa jan ukajj mä yatiyäwiwa. Mä profeciajj sum sarnaqañjjatwa yatichaspa, jan ukajj Diosan mä mandatopata, mä juchañchäwipata jan ukajj kunas jutïrin pasani uka toqetwa parlarakispa. Biblian walja profecianakapaw phoqasjje.

▸ 2 yatichäwi, 13 párrafo

Mesiasat parlir walja profecianakajj Jesusaruw phoqasïna. Ukatakejj “ Mesiasat parlir profecianaka” siski uka recuadro uñjjattʼam.

▸ 2 yatichäwi, 17 párrafo, qhanañchäwi

Jehová Diosajj aka oraq mä suma paraisöñapatakiw luräna, jupar istʼir jaqenakajj ukan jakasipjjaspa uk munäna. Diosan uka amtapajj pachpakïskiwa, niyaw jan walinak aka oraqet chhaqtayjjani, servirinakaparojj wiñay jakañwa churarakini.

▸ 3 yatichäwi, 1 párrafo

Dios contra saytʼaskäna uka angelaw Supaya satajja. Uka sutejj “kutkatasiri” sañwa muni, Jehová Dios contra saytʼasitap laykuw uka sutimpi uñtʼasi. Juparojj Diablo sasaw uñtʼasiraki, ukajj “kʼarintiri” sañwa muni. Diosat kʼarinaka parlatap layku ukhamarak jaqenakar engañjatap laykuw uka sutimp uñtʼasiraki.

▸ 3 yatichäwi, 4 párrafo

Jehová Diosajja janïr aka oraq lurkäna ukhaw angelanakar luräna. Jupanakajj alajjpachan jakasiñataki luratäpjjewa.  Walja waranqa waranq angelanakaw utji (Daniel 7:10). Angelanakajj sapa mayniw sutinïpjje, may maya chuymanïpjjarakiwa. Jupanakajj wali humilde chuymanïpjjewa, janiw adorayasiñ munapkiti, jilapartejj janirakiw sutinakapsa yatiyañ munapkiti. Jupanak taypinjja jilïrinakaw utji, walja lurañanakanïpjjarakiwa, yaqhepanakajj Jehová Diosan tronop nayraqatan servipjje, yaqhanakasti yatiyirinakäpjjewa, yaqhepanakajj Jehová Diosan oraqenkir servirinakaparuw yanapapjje, yaqhepasti Diosan juicionakap phoqasiyapjje, yaqhepajj suma yatiyäwinakat yatiyasiski ukaruw yanaptʼapjjaraki (Salmo 34:7; Apocalipsis 14:6; 22:8, 9). Jutïrinjja jupanakaw Jesusarojj Armagedón guerran nuwasiñanjja yanaptʼapjjani (Apocalipsis 16:14, 16; 19:14, 15).

▸ 3 yatichäwi, 5 párrafo; 10 yatichäwi, 1 párrafo

Taqe kunanakatï Jehová Dios conträki, munañap conträki ukanakajj juchawa. Sañäni, chuyma manqhan jan walinak munañasa, jan walinak lupʼiñasa, jan walinak lurañasa juchawa. Juchajj janiw Diosamp sum apasiñatak yanaptʼkistuti, ukatwa Jehová Diosajj leyinaka, suma yatichäwinaka churistu. Ukaw juchanak amanut jan lurañatak yanaptʼistu. Qalltanjja Diosajj wali sumwa taqe kuns luräna, ukampis Adanampi Evampejj Diosar jan istʼañwa ajllipjjäna, ukhamatwa juchar purtʼasipjjäna, janiw perfecto jaqëjjapjjänti. Jupanakajj chuymankipstasaw jiwjjapjjäna. Ukatwa wawanakapjamajj chuymankipstasin jiwaraktanjja.

▸ 3 yatichäwi, 7 párrafo; 5 yatichäwi, 3 párrafo

Armagedonajj Diosan guerrapawa, ukanwa Diosajj Supayan apnaqata akapacharusa, jan wali lurir jaqenakarusa chhaqtayjjani.

▸ 3 yatichäwi, 13 párrafo; 8 yatichäwi, 18 párrafo

Diosan Reinopajj alajjpachan uttʼayata mä gobiernowa. Jesucristow Diosan Reinopan reyit apnaqjje. Jutïrinjja Jehová Diosajj Reinop taypiw taqe jan walinak aka oraqet chhaqtayjjani. Uka Reinow aka oraq apnaqarakini.

▸ 3 yatichäwi, 14 párrafo

Jehová Diosajj Jesusaruw nayraqat luräna. Diosaw Jesusarojj aka oraqer khitanïna, ukhamat taqe jaqenak layku jiwañapataki. Jesusar jiwayapkäna uka qhepatjja, Jehová Diosaw Jesusar jaktayjjäna. Jichhajja Diosan Reinopanwa Jesusajj reyit apnaqjje.

▸ 4 yatichäwi, 2 párrafo

Biblianjja kunapachas Mesiasajj jutañapäna uk sumwa qhanañchjjäna. Mesiasajja 69 semananak tukuyaruw uñstañapäna. Uka 69 semananakajja 455 (a.C.) marat qalltasajj 29 (d.C.) maranwa tukuyäna.

¿Kunatsa 69 semananakajj 29 (d.C.) maranwa tukuyäna sissna? 69 semananakajj 455 (a.C.) maranwa qalltäna. Nehemiasajj uka maranwa Jerusalenar purïna, ukhamat uka marka wasitat saytʼayañataki (Daniel 9:25; Nehemías 2:1, 5-8). Kunjamatï docena arojj 12 numerot amuytʼaykistojja, ukhamarakiw semana arojj 7 numerot amuytʼayistu. 69 semananakat parlir profeciajja, janiw 7 urunakani semanat parlkiti, jan ukasti 7 maranakatwa parli. Bibliarjamajja ‘mä urojj mä maramp’ sasiwa (Números 14:34; Ezequiel 4:6). Ukhamajja sapa semanajj 7 maranakawa, 69 semananakasti 483 maranakäspawa (69 x 7). 455 (a.C.) marat 29 (d.C.) marakamajja, 483 maranakawa. Jesusajj 29 maranwa bautisasïna, ukhamatwa Mesiasar tuküna (Lucas 3:1, 2, 21, 22).

 Uka pachpa profecianjja mä semanampitwa parlaraki, mä arunjja yaqha paqallqo maranakampitwa parli. Uka profeciarjamajja, uka semananwa, mä arunjja 33 (d.C.) maranwa Mesiasajj jiwayatäñapäna. 36 (d.C.) mara qalltatjja, Diosan Reinopat suma yatiyäwinakajj janiw judionakarukejj yatiyasjjañapäkänti, jan ukasti taqe markankir jaqenakaruw yatiyasjjañapäna (Daniel 9:24-27).

▸ 4 yatichäwi, 7 párrafo

Jehová Diosaw taqe kun Lurirejja, jupaw Jesusarojj taqe kunanakat sipansa nayraqat luräna sasaw Bibliajj yatichi (Colosenses 1:15, 16). Jesusajj janiw Taqe Chʼamani Diosäkiti. Diosampejj pachpakïkaspas ukham janipuniw kunapachas Jesusajj yatichkänti, antisas akham sänwa: ‘Alajjpachankir Awkejj nayat sipansa jilïriwa’ sasa (Juan 14:28; 1 Corintios 15:28). Yaqhep kʼari religionanakajja, Diosajj Trinidadawa sasaw yatichapjje. Diosajj kimsa diosanakat mayar apthapitäkaspas ukham amuyapjje: Awkimpi, Yoqampi, espíritu santompejj mayakïpjjewa sasaw sapjje. Ukampis trinidad arojj janiw Biblian uñstkiti, uka yatichäwejj janiw Bibliarjamäkiti.

Espíritu santojj Diosan jan uñjkañ chʼamapawa, uka chʼamampiw Diosajj amtanakap phoqasiyi. Sañäni, nayrïr cristianonakajj taqeniw “espíritu santompi phoqtʼatäpjjäna”. Jehová Diosajj akham sänwa: “Kunayman jaqenakjjaruw nayajj espíritu santojat warjjatanëjja” sasa (Hechos 2:1-4, 17).

▸ 4 yatichäwi, 12 párrafo; 15 yatichäwi, 17 párrafo

¿Kunatsa cristianonakajj Diosar cruzampi jan adorapki?

1. Cruzajj walja tiempow kʼari religionanakan apnaqasi. Jesusajj aka oraqer janïr jutkäna uka nayraw jaqenakajj Pachamamar adorañataki, walja wawanakanïñataki cruz apnaqapjjerïna. Ukampis cristianonakajja, Jesusajj jiwjjäna ukhat 300 maranakkamajj janiw cruz apnaqapkänti. Uka qhepatwa, Roma marka apnaqer Constantino emperadorajj cruz apnaqapjjañamawa sasin cristianonakar säna. Cruzat yatichasaw Diosar jan serviri jaqenakarojj iglesiar sarapjjañapatak chʼamañchapjjäna. Ukampis Jesusajj janiw mä cruzan jiwkänti. Mä libronjja, “Jesusajj aka oraqer janïr jutkäna ukhaw cruzajj apnaqasjjäna, Cristor jan uñtʼir jaqenakas apnaqapjjarakïnwa” sasaw qhanañchi.

2.   Kunjamtï yateqktanjja, Jesusajj janiw mä cruzan jiwkänti. Cruz arojj yaqhep Biblianakan uñstki ukhajja, nayra qellqatanakarjamajj “lawa” (poste) jan ukajj “árbol” sañwa muni. Griego arut nayra qellqatanakanjja (Nuevo Testamento) cruz arojj janiw mä cheqansa uñstkiti sasaw mä libron qhanañchi. Ukhamasti Jesusajj janiw mä cruzan jiwkänti, jan ukasti mä lawar chʼakkatataw jiwäna.

3. Jehová Diosajj janiw idolonakaru adorañas munkiti, janirakiw cruz apnaqañassa ni cruz seqesiñassa munkiti (Éxodo 20:4, 5; 1 Corintios 10:14).

▸ 5 yatichäwi, 12 párrafo

Jesusajja, jiwataj amtapjjätawa sasaw arkirinakapar säna. Ukatwa arkirinakapajj 14 de nisán urun Jesusan jiwatap sapa mara amtapjje. Israelitanakajj uka urunwa Pascua fiesta amtapjjarakirïna. Jesusan jiwatap amtaski uka urunjja, tʼantʼampi vinompiw Jesusan jiwatap amtir jutirinakarojj pasayasi. Tʼantʼajja Jesusan cuerpopampi sasiwa, vinosti Jesusan wilapampi sasirakiwa. Uka tʼantʼsa vinsa khitinakatï alajjpachat Jesusamp chika apnaqanipkani ukanakakiw manqʼapjjaspa umapjjarakispa. Khitinakatï aka oraqen wiñayatak jakapkani ukanakasti, Jesusan jiwatap amtir sarapjjarakiwa, ukampis janiw ukanjja tʼantʼa manqʼapkiti ni vinsa umapkarakiti.

▸ 5 yatichäwi, 21 párrafo

Hebreo ukhamarak Griego arunakat alma sasin jaqokipaski uka arojja, 1) jaqenakata, 2) animalanakata, jan ukajj 3) jaqenakana ukhamarak animalanakan jakañapatwa parli. Ukanakat mä qhawqha jichhajj yatjjatañäni:

• Jaqenaka. ‘Noé chachan urunakapanjja mä qhawqha jaqenakawa, mä arunjja kimsaqallqo jaqenakaw [jan ukajj “almanakaw”, qhanañchäwi] uma taypi salvatäpjjäna’ (1 Pedro 3:20). Uka qellqatan almanaka sasinjja, jaqenakatwa  parlaski. Uka jaqenakajj Noé, warmipa, kimsa yoqanakapa, warminakapa ukanakäpjjewa.

• Animalanaka. “Ukjjarojj Diosajj sarakïnwa: Umanjja taqe casta animalanak [jan ukajja, almanak] utjpan, ukhamarak oraqenjja altoqata thoqnaqeri jamachʼinakas utjarakpan” sasa. Ukjjarusti Diosajj sarakïnwa: “Aka oraqenjja taqe casta animalanak [jan ukajja, almanak] utjpan: uywañ animalanaka, ukhamaraki pampankir animalanakasa, ukhamaraki oraqenjam qatatnaqtir animalanakasa. Ukatsti ukhampuniw lurasïna” sasa (Génesis 1:20, 24).

• Jaqenakana ukhamarak animalanakan jakañapa. Diosajj Moisesar akham sänwa: “Jumaru [mä arunjja, almam] jiwayañ munirinakajja taqeniw jiwatäjjapjje” sasa (Éxodo 4:19). Jesusajja aka oraqenkkäna ukhajj akham sänwa: “Suma awatirejj nayätwa. Suma awatirejj ovejanak laykuw jakañap [jan ukajja, “almap”, qhanañchäwi] churaraki” sasa (Juan 10:11).

  Biblian taqe almampiw kuns lurañasa siski ukhajja, taqe chuyma jan ukajj taqe jakañampi luraña sañ muni (Deuteronomio 6:5; Mateo 22:37). Alma arojja, kuntï mä jakirejj wal munki uk uñachtʼayañatakiw apnaqasirakispa. Ukatsti mä jiwat jaqeta jan ukajj mä jiwat cuerpot parlañatakiw aytasirakispa (Números 6:6; Proverbios 23:2; Isaías 56:11; Hageo 2:13).

▸ 6 yatichäwi, 5 párrafo; 15 yatichäwi, 17 párrafo

Hebreo ukhamarak griego arunakat “espíritu” sasin jaqokipaski uka arojja, kunayman toqet parlañatakiw apnaqasi, ukampis jilpachajj kunatï jaqenakatak jan uñjkañäki ukanakat parlañatakiw apnaqasi. Sañäni, thaya, samana ukanakäspawa. Alajjpachan jakirinakata, Diosan chʼamapata jan ukajj espíritu santot parlañatakiw apnaqasiraki. Ukampis mä jiwat jaqen espiritupajj yaqha cheqansa jakaskaspa ukham janiw Bibliajj yatichkiti (Éxodo 35:21; Salmo 104:29; Mateo 12:43; Lucas 11:13).

▸ 6 yatichäwi, 5 párrafo; 15 yatichäwi, 17 párrafo

Jerusalén marka jakʼan mä vallejj utjkäna uka valleruw Gehena sutimpi uñtʼasïna. Ukanjja basuraw phichantasirïna. Ukampis uywanakasa jaqenakas jakkirpachaw Gehenan nakhantayatäna tʼaqesiyatäna sañatakejj janiw kuna qellqatas utjkiti. Ukhamasti Gehenajj janiw jaqenakan almanakap ninampi wiñay tʼaqesiyañatak mä jan uñjkañ lugaräkiti. Jesusajja Gehenat parlasajj wiñayatak jiwañatwa parlaskäna (Mateo 5:22; 10:28).

▸ 7 yatichäwi, 20 párrafo

Uka oracionjja, Jesusaw discipulonakapar yatichäna. Padrenuestro oracionajj kunjamsa Diosar mayisiñasa ukwa yatichistu. Akham sasaw mayisipjjäta sasaw Jesusajj säna:

• “Sutimajj jachʼañchatäpan”

  Ukham sasinjja, Jehová Diosan sutipajj santot uñjatäñapatakiw mayisktanjja. Mä arunjja, taqe kʼarinakat qʼomachatäñapatakiw mayisktanjja. Ukhamat alajjpachansa aka oraqensa taqeni Jehová Diosan sutip respetompi uñjapjjañapataki.

• “Reinomajj jutpan”

  Ukham sasinjja, Diosan Reinopajj Supayan apnaqat aka jan wali pacha tʼunjañapataki, uka Reinojj aka oraq apnaqasin mä suma paraisor tukuyañapatakiw mayisktanjja.

• “Munañamajj [...] aka oraqens luraspan”

  Ukham sasinjja, Diosan amtapajj aka oraqena phoqasiñapatakiw mayisktanjja. Ukhamat Diosar istʼiri jaqenakajj paraison jan juchani jakasipjjañapataki, kunjamtï Diosajj qalltan munkäna ukhama.

▸ 8 yatichäwi, 2 párrafo

Jehová Diosaw jaqenakarojj juchampita jiwañampit kutsuyistu. Diosar jan istʼasajja, Adán nayrïr chachajj wiñay jakañ aptʼasïna, Diosampis janirakiw sum apasjjänti. Juchampit jiwañampit kutsuyatäñatakisa, Diosampi wasitat sum apasjjañatakisa mä precio pagañaw munasïna. Ukatwa Diosajj Yoqapar aka oraqer khitanïna, ukhamat taqe jucharar jaqenak layku jiwañapataki. Jesusan jiwatap laykuw jaqenakajj jutïrin wiñay jakañ katoqañäni, jan juchanis jakasjjarakiñäni.

▸ 8 yatichäwi, 21 párrafo; 9 yatichäwi, 13 párrafo

Daniel 4 capitulon qellqatäki uka profeciajja, Diosan Reinopajj 1914 maranwa uttʼayasi sasaw qhanañchi.

Profecía: Jehová Diosajj mä samkanwa Nabucodonosor reyirojj mä profecía yatiyäna. Uka samkanjja, mä jachʼa arbolaw khuchunukutäna, ‘paqallqo maranak’ jan jiltañapatakejj hierrota, bronceta lurat cadenanakampi muyuntayatänwa. Paqallqo maranak pasatatsti wasitampiw arbolajj jiltarakïna (Daniel 4:1, 10-16).

¿Uka profeciajj kamsañsa muni? Arbolajj Diosan gobiernopampi sasiwa. Jehová Diosajj walja maranakaw Jerusalén markanjja reyinak uttʼayäna, ukhamat Israel marka apnaqapjjañapataki (1 Crónicas 29:23). Ukampis uka reyinakajj Diosat jitheqtapjjänwa, ukatwa jupanakajj jan apnaqjjapjjänti. Jerusalenajj 607 (a.C.) maranwa tʼunjatäna, uka maratwa ‘paqallqo maranak’ jakhuñajj qalltasïna (2 Reyes 25:1, 8-10; Ezequiel 21:25-27). Jesusajj akham sänwa: “Jerusalén markasti, yaqha markanakan taksutäniwa, yaqha markanakar churat tiemponakajj phoqasjjani ukapachkama” sasa. Ukham sasinjja, Jesusajj ‘paqallqo maranakatwa’ parlaskäna  (Lucas 21:24). Ukhamajja ‘paqallqo maranakajj’ janiw Jesusajj aka oraqenkkäna ukhajj tukuykänti. Jehová Diosajja, ‘paqallqo maranakajj’ tukuyjjani ukhaw mä Rey uttʼayäjja sasaw säna. Uka Reyiw Diosan taqe servirinakapatakejj walja bendicionanak apanini (Lucas 1:30-33).

Qhawqha tiempos ‘paqallqo maranakajja’: Uka ‘paqallqo maranakajja’, 2.520 maranaka sañ muni. Jiwasatï 2.520 maranak 607 (a.C) marat jakhuñ qalltañäni ukhajja, 1914 mararuw puriñäni. Mesiasarojja, mä arunjja Jesusarojja, uka maranwa Jehová Diosajj Reinopan Reyita alajjpachan uttʼayäna.

¿Kawkitsa 2.520 número apstanjja? Biblianjja, kimsa tiempo chikatanejja (kimsa mara chikatani) 1.260 urunakawa sasaw qhanañchi (Apocalipsis 12:6, 14). Ukhamasti ‘paqallqo maranakajj’ pä ukhäspawa, mä arunjja 2.520 urunakawa. Biblian profecianakaparjamajja, ‘mä urojj mä marampi’ sasiwa, ukhamasti 2.520 urunakajj 2.520 maranakäspawa (Números 14:34; Ezequiel 4:6).

▸ 8 yatichäwi, 23 párrafo

Arcángel sutejja “angelanakan jilïripa” sañwa muni. Biblianjja mä arcangelatak parli, uka arcangelarojj Miguel sutimpiw uñtʼasi (Daniel 12:1; Judas 9).

Miguelajja, Diosat jan jitheqtir angelanakan jilïripawa. Apocalipsis 12:7 qellqatajj akham siwa: “Miguelampi angelanakapampejj dragonampiw nuwasipjjäna, dragonampi angelanakapampisti jupanakampiw nuwasipjjarakïna” sasa. Apocalipsis qellqatanjja, Diosan ejercitopan pʼeqtiripajj Jesusawa sasaw qhanañchi, ukhamasti Jesusan yaqha sutipajj Miguelawa (Apocalipsis 19:14-16).

▸ 9 yatichäwi, 4 párrafo

Akapachajj janïr tʼunjatäkani uka nayrajj kunanakatï paskani uka tiemporuw qhepa urunaka sasin uñtʼasi. Biblianjja,  “akapachajj niya tukusiñampïskani”, ‘jaqen Yoqapan kuttʼaniñap tiempo’ sasin siski uka arunakajja, qhepa urunakatwa parlaraki (Mateo 24:3, 27, 37). ¿Kunapachas ‘qhepa urunakajjʼ qalltäna? Diosan Reinopajj 1914 maran alajjpachan apnaqañ qalltkäna ukhaw qalltäna. Supayajj Armagedonan tʼunjatäkani ukhaw uka qhepa urunakajj tukuyjjarakini (2 Timoteo 3:1; 2 Pedro 3:3).

▸ 9 yatichäwi, 2 párrafo

Diosajj jiwat jaqenakar wasitat jaktayki ukaruw jaktaña sasin uñtʼasi. Biblianjja, llätunka jaqenakan jaktatapatwa parli. Jupanakarojj Elías, Eliseo, Jesús, Pedro, Pablo jupanakaw jaktayapjjäna. Uka milagronakjja, Jehová Diosan chʼamapampiw lurapjjäna. Jehová Diosajj niyaw ‘cheqapar sarnaqer jaqenakarusa jan cheqapar sarnaqer jaqenakarus’ aka oraqen jaktayani (Hechos 24:15). Alajjpachan jakañataki jaktir jaqenakatsa Bibliajj parlarakiwa. Alajjpachan jakañataki ajllitanakarojja, Diosajj Jesusampi chika jakapjjañapatakiw jaktayani (Juan 5:28, 29; 11:25; Filipenses 3:11; Apocalipsis 20:5, 6).

▸ 9 yatichäwi, 13 párrafo

Yaqhepajj jiwatanakampi parlañatakejj layqanakaru jan ukajj chʼamakaninakaruw sarapjje. Yaqhepasti, jupanak pachpaw jiwatanakamp parlapjje. Jupanakajja, jiwatan espiritupajj yaqha cheqansa jakaskaspa, jan ukajj wali chʼamani espiriturus tukkaspa ukhamwa amuyapjje. Warawaranak uñchʼukis jutïrit yatiñasa, yatirinakar sarañasa, magianakasa, layqasiñanakasa, kunatï jan uñtʼatäki ukanakat yatiñ munañasa demonionakamp parlañampi sasiwa. Demonionakat jarkʼaqasiñatakejja, yaqhepajj uta pataru jan ukajj uta punkuruw cruzanak uchapjje. Yaqhepasti jan walinakat  jarkʼaqasiñatakejj cruz seqesipjjaraki. Taqe ukanakajj demonionakamp parlañampi sasirakiwa. Libronakasa, revistanakasa, horoscoponakasa, peliculanakasa, musicanakasa, cuadronakasa magianak lurañajj janis kuna jan walïkaspa, demonionakampi parlañajj walikïkaspasa ukhamwa amuyayistaspa. Maysa toqetjja, jiwatanakar imañatakejj walja costumbrenakaw utji. Waljaniw jiwatanakan mara jiwatap misayapjje, ofrendanak churapjje, chʼiyärat isisipjje, paqaraw almar velapjje. Taqe ukanak lurañajj demonionakampi mayachatarakiwa. Demonionakampi parlañatakejja, jaqenakajj drogasipjjarakiwa. Cheqas demonionakajj kunaymanitwa jaqenakar Diosat jitheqtayañ munapjje (Gálatas 5:20; Apocalipsis 21:8).

▸ 10 yatichäwi, 10 párrafo; 16 yatichäwi, 4 párrafo

Jehová Diosajj taqe chʼamaniwa, alajjpachasa aka oraqesa jupan luratawa (Apocalipsis 15:3). Ukhamasti taqe kunas jupankiwa, ukatwa taqe kunjjar munañanejja, jupakiw luratanakapar apnaqañatakejj derechonejja (Salmo 24:1; Isaías 40:21-23; Apocalipsis 4:11). Jehová Diosajj taqe luratanakaparuw leyinak uchi. Jupakirakiw jaqenakarojj apnaqerit uttʼayaspa. Jiwasatakitï Jehová Diosajj taqe kunjjar munañanïchejja, juparojj munasiñäniwa, istʼarakiñäniwa (1 Crónicas 29:11).

▸ 11 yatichäwi, 10 párrafo

Abortañajja, taykan purakapankaski uka wawar amanut jiwayañawa. Taykajj usuriptki ukhat aksarojja, wawajj jaqëjjewa. Ukhamasti abortañajj jaqe jiwayañampi sasiwa.

▸ 13 yatichäwi, 5 párrafo

Mä doctorampi yaqha jaqen wilapa jan ukajj wilat saraqer plasma, glóbulos rojos, glóbulos blancos, plaquetas ukanak uchayasiñajj janiw walïkiti. Janirakiw imat wila uchayasiñas walïkiti.

▸ 13 yatichäwi, 13 párrafo

Biblianjja, cheqañchaña arojj janiw castigaña sañ munkiti. Jan ukasti yatichaña, yanaptʼaña sañwa muni. Jehová Diosajj pantjasipki ukanakarojj janiw jan sinttʼasis cheqañchkiti (Proverbios 4:1, 2). Diosajj awk taykanakatakejj wali yateqaskayawa. Jehová Diosajj jiwasan sum sarnaqañasatakiw cheqañchistu, ukaw jupampi cheqañchatäñ munañatak yanaptʼistaspa (Proverbios 12:1). Jehová Diosajj servirinakapar wal munasi, yaticharakiwa. Jupajj jan wali amuyunak apanukupjjañapatakiw servirinakapar ewjjtʼi, ukaw servirinakaparojj kunjamtï Diosajj munki ukham amuyañatakisa, jupatakjam sarnaqañatakis yanaptʼi. Awk taykanakajja, kunatsa istʼasirïñajj wali wakiskirejja ukwa wawanakapar yatichapjjañapa. Jehová Diosaru munasiñsa, Bibliar munasiñsa, Biblian suma yatichäwinakap amuyañsa yatichapjjañaparakiwa.

▸ 14 yatichäwi, 13 párrafo

Demonionakajj jaqet sipansa wali chʼamani jan uñjkañ jan wali espiritunakawa. Jupanakajj jan wali angelanakawa. Diosar jan istʼasaw jan wali angelanakaru ukhamarak Diosan enemigopar tukupjjäna (Génesis 6:2; Judas 6). Demonionakajj Supayamp mayachtʼasisaw Jehová Dios contra saytʼasipjjäna (Deuteronomio 32:17; Lucas 8:30; Hechos 16:16; Santiago 2:19).

▸ 16 yatichäwi, 4 párrafo