1. ¿Kunjamsa Diosar adorañasa uk khitis sistaspa?

 WALJA religionanakajja, Diosat kunatï cheqäki uksa yatichapkaspa ukham amuyapjje. Ukampis ukajj kʼariwa. Religionanakajj may may Diosat yatichapjje, kunjamsa jupar adorasiñapa jan ukajj yupaychasiñapa uksa mayj mayjwa yatichapjjaraki. Ukhamajj ¿kunjamsa Diosar adorañasa? ¿Kunjamatsa uk yatsna? Jehová Diosakiw uk sistaspa.

2. Kunjamsa Diosar adorañasa ukjja, ¿kunjamatsa yatsna?

² Diosajj kunjamsa jupar adorañasa uk yatiñasatakejj Biblia churistu. Ukhamasti Bibliat yatjjatam, Diosajj jumat wal llakisi, jupaw Biblian yatichäwinakap amuytʼañatakisa ukarjam sarnaqañatakis yanaptʼätam (Isaías 48:17).

3. ¿Kun lurañassa Diosajj muni?

³ Taqpach religionas Diosatak walïkaspa ukhamwa jaqenakajj amuyapjje, ukampis Jesusajj janiw ukham yatichkänti, jupajj sänwa: “Janiw taqe khitinakatï ‘Tatay, Tatay’ sasin sapkitu ukanakajj alajjpachankir Reinorojj mantapkaniti, jan ukasti taqe khitinakatï alajjpachankir Awkijan munañap lurapki ukanakakiw mantapjjani” sasa. Ukhamasti kunas Diosan munañapajja ukwa yateqañasa, ukarjam sarnaqañasarakiwa. Diosar jan istʼir jaqenakajj “jan walinak lurir” jaqenakampi sasiwa sasaw Jesusajj säna. Ukhamajj Diosan munañaparjam sarnaqañajj wali wakiskiriwa (Mateo 7:21-23).

4. ¿Jesusajj kamsänsa Diosan munañap lurañ toqetjja?

⁴ Diosatakjam sarnaqañ munir jaqenakajj jan walinakan uñjasipjjani sasaw Jesusajj säna. Jupasti sänwa:  “Kʼullkʼu punknam mantapjjam, jiwañar apir punkojj wali jachʼawa, thakipas anchorakiwa, waljanirakiw uknam mantasipki. Ukampis jakañar apir punkojj wali kʼullkʼuwa, thakipas kʼullkʼurakiwa, jukʼanikiw uka thaki jikjjatapjje” sasa (Mateo 7:13, 14). Kʼullkʼu thakejja, cheqa religionampi sasiwa, ukajj wiñay jakañaruw api. Ancho thakisti, kʼari religionanakampi sasiwa, ukasti jiwañaruw api. Jehová Diosajj janiw khitin jiwañapsa munkiti, ukatwa jupar uñtʼapjjañapatakejj taqenir tiempo churaski (2 Pedro 3:9).

5. ¿Khitinakas Diosar cheqpachapun servipjje uk kunjamatsa yatsna?

⁵ Khitinakas Diosar cheqpachapun servipjje uk yatsnawa sasaw Jesusajj säna. Ukjja luratanakap uñjasa, kunarus creyipjje ukanak yatjjatasaw yatsna. Jesusajj sänwa: “Achunakapatwa jupanakarojj uñtʼapjjäta” sasa. Ukatsti sarakïnwa: “Suma arbolajj suma achunakwa achoqaraki” sasa (Mateo 7:16, 17). Uka arunakajja, Diosan servirinakapajj janis pantjasirïpkaspa ukham janiw sañ munkiti. Jupanakajj Diosatakjam sarnaqañatakiw chʼamachasipjje. Jichhajja, khitinakas Diosar cheqpachapuni adorapjje uk kunjamatsa yatsna uk yatjjatañäni.

6, 7. 1) ¿Kunatsa Diosarojj kuntï Bibliajj yatichki ukarjam adorañasa? 2) ¿Kunsa Jesusat yateqsna?

⁶ Cheqa religionankirinakajj Bibliarjamaw yatichapjje. Biblian akham siwa: “Taqpach Qellqatajj Diosan amuytʼayatawa, sumarakiw yatichañataki, cheqañchañataki, kunatejj jan walïki ukanak askichañataki ukhamarak cheqapar sarnaqañ yatichañatakisa, ukhamat Diosan serviripajj suma yatjjatatäñapataki, taqe suma luräwinak lurañatakis suma wakichtʼatäñapataki” sasa (2 Timoteo 3:16, 17). Apóstol Pablojj cristianonakar  akham sänwa: “Jumanakajj Diosan arunakapa nanakat katoqapkta ukhajja, janiw jaqenakan arunakapjam katoqapktati, jan ukasti Diosan arunakapjam katoqapjjtajja” sasa (1 Tesalonicenses 2:13). Kuntï Bibliajj yatichki ukarjamaw Diosar adorañasa. Janiw jaqenakan amuyuparjamasa, costumbreparjamasa ni yaqha yatichäwinakarjamas adorañasäkiti.

⁷ Jesusajj Diosan Aruparjamaw yatichirïna (Juan 17:17 liytʼañataki). Diosan Arupatsa aytapunirïnwa (Mateo 4:4, 7, 10). Diosan cheqpach servirinakapajj Jesusat yateqasisaw Bibliarjam yatichapjjaraki.

8. ¿Kunsa Jesusajj Diosar adorañ toqet yatichistu?

⁸ Jehová Diosarukiw adorañasa. Traducción del Nuevo Mundo sat Biblianjja, Salmo 83:18 qellqatan akham siwa: “Jaqenakan yatipjjañapataki, jumajj Jehová sutinïtama, juma sapakiw oraqpachjjaru taqe Munañanïtajja” sasa. Jaqenakajj khitis cheqpach Diosajja uk yatipjjaspa ukwa Jesusajj munäna, ukatwa Diosan sutip jupanakar yatichäna (Juan 17:6 liytʼañataki). Jesusajj sänwa: “Jehová Diosamarukiw adorañama, jupa saparukiw serviñama” sasa (Mateo 4:10). Diosan servirinakapajj Jesusatwa yateqastanjja. Jehová Diosarukiw adortanjja, sutipsa aytasiraktanwa. Yaqhanakarus Diosan sutip yatichtanjja, kunsa Diosajj jaqenak laykojj jutïrin lurani uksa yatiyaraktanwa.

9, 10. ¿Kunjamsa mayninakar munasitas uñachtʼaytanjja?

⁹ Jaqe masisarojj munasiñasawa. Jesusajj maynit maynikam munasiñwa discipulonakapar yatichäna (Juan 13:35 liytʼañataki). Janiw costumbrenakasa, yaqha markan jakasiñasa, qamirïñasa ni pobrëñasa jilat kullakanakasat jitheqtaykistuti. Munasiñaw jilat kullakanakasampejj mayachtʼistu (Colosenses 3:14). Jaqe masisar munasitas laykojj janiw guerrarus sarktanti, ni jaqe masisarus  jiwayktanti. Biblianjja siwa: “Diosan wawanakapasa Diablon wawanakapasa akanwa qhan amuyasi: khititejj jan cheqapar sarnaqki, khititejj jilataparus jan munaski ukajja, janiw Diosat jutkiti” sasa. Ukatjja saskakiwa: “Jiwasanakajj maynit maynikam munasiñasawa. Janiw Cainar uñtasitäñasäkiti, jupajj Supayatwa jutäna, jilaparojj jan sinttʼasisaw jiwayarakïna” sasa (1 Juan 3:10-12; 4:20, 21).

¹⁰ Jiwasajj maynit maynikam chʼamañchtʼasiñataki yanaptʼasiñatakiw tiempo apstʼastanjja, chʼamasampisa kunatï utjkistu ukampisa jilat kullakanakasaruw yanaptʼtanjja (Hebreos 10:24, 25). ‘Taqenir yanaptʼañatakis’ chʼamachasiraktanwa (Gálatas 6:10).

11. ¿Kunatsa Jesús toqekiw salvasiñajj utji sasin sistanjja?

¹¹ Jesucristo toqew salvasiñajj utji sasaw confiytanjja. Bibliajj siwa: “Jupat sipanjja yaqha salvirejj janiw utjkiti, janirakiw Diosan ajllit yaqha sutejj aka oraqen utjkiti, ukhamat jiwasan salvasiñasataki” sasa (Hechos 4:12). Jehová Diosajj istʼasir jaqenakar salvañatakiw Jesusar aka oraqer khitanïna, ukwa 5 yatichäwin yateqaniwaytanjja (Mateo 20:28). Diosaw Jesusarojj aka oraq apnaqañapatak Reyit uttʼayi. Ukatwa wiñay jakañ katoqañatakejj Jesusaruw istʼapjjañama sasin Bibliajj chʼamañchistu (Juan 3:36 liytʼañataki).

12. ¿Kunatsa politicar jan mitisktanjja?

¹² Janiw politicar mitisiñasäkiti. Jesusajj janipuniw politicar mitisirïkänti. Jupajj juzgat uñjaskäna ukhajja, romankir Pilato gobernadorarojj akham sänwa: “Reinojajj janiw akapachankirïkiti” sasa (Juan 18:36 liytʼañataki). Jiwasajj Jesusjamarakiw Diosan alajjpachankir Reinoparuk yanaptʼtanjja. Ukhamasti kawki markansa jakstanjja, janipuniw politicar mitisiñasäkiti. Ukampis ‘jilïr autoridadanakar istʼapjjañamawa’ sasaw Bibliajj ewjjtʼistu (Romanos 13:1). Kawkjantï jakasktan uka markan  leyinakaparojj istʼtanwa. Ukampis uka leyinakatï Diosan leyip conträjjchi ukhajja janiw istʼjjtanti. Apostolonakatwa yateqastanjja, jupanakajj akham sapjjänwa: “Jaqenakar istʼañat sipansa Diosar istʼapjjañajawa” sasa (Hechos 5:29; Marcos 12:17).

13. ¿Diosan Reinopajj kunanak lurani sasas jaqenakar yatiyañasa?

¹³ Diosan Reinopakiw jan walinak askichani sasaw confiytanjja. Jesusajja “Reinon aka suma yatiyäwinakapajja aka oraqpachanwa yatiyasini” sasaw säna (Mateo 24:14 liytʼañataki). Kuntï Diosan Reinopajj lurkani ukanakjja, janipuniw jaqenakan kawkïr gobiernopas lurkaspati (Salmo 146:3). Diosan Reinop jutañapatakejj akham mayisiñwa Jesusajj yatichäna: “Reinomajj jutpan. Munañamajj luratäpan, kunjamatï alajjpachan luraski ukhamarak aka oraqens luraspan” sasa (Mateo 6:10). Diosan Reinopajj taqe gobiernonakaruw tʼunjani, “wiñayan wiñayapaw uka reinojj utjarakini” sasaw Bibliajj yatichi (Daniel 2:44).

14. ¿Khitinakas Diosarojj Bibliarjam adorasipki?

¹⁴ Ukanakat yatjjatasajja, akham jisktʼasim: “¿Khitinakas Diosarojj Bibliarjam adorapjje? ¿Khitinakas jaqe masiparojj Diosan sutip yatichapjje? ¿Khitinakas jaqe masiparojj taqe chuyma munasipjje? ¿Khitinakas Diosaw jaqenakar salvañatakejj Jesusar khitanïna sasin creyipjje? ¿Khitinakas politicar jan mitisipki? ¿Khitinakas Diosan Reinopakiw jan walinak askichani sasin confiyapjje?” sasa. Jehová Diosan Testigonakapakiw taqe ukanak lurapjje (Isaías 43:10-12).

15. ¿Kunjamsa Diosar adorañasa?

¹⁵ Diosajj utjiwa sasin janiw aleqak creyiñasäkiti. Demonionakas Diosan utjatap creyipjjarakiwa, ukampis janiw Diosar istʼapkiti (Santiago 2:19). Diosar adoratasajj  Jupa nayraqatan sumat uñjatäñapatakejja, janiw aleqakejj Diosajj utjiwa sasin creyiñasäkiti, jan ukasti kuntï Diosajj maykistu ukarjamaw sarnaqañasa.

16. ¿Kunatsa kʼari religionanakat jitheqtañasa?

¹⁶ Diosajj jupar adoratas sumat uñjañapatakejja, kʼari religionanakat jitheqtañasawa. Isaías profetajj akham qellqäna: “¡Mistunjjapjjam Babiloniatjja! ¡Jan kunampis qʼañuchtʼasipjjamti!” sasa (Isaías 52:11; 2 Corintios 6:17). Ukhamasti kunanakatï kʼari religionanakampi mayachtʼatäki ukanakat jitheqtañasawa.

17, 18. 1) ¿Kunas ‘Jachʼa Babiloniajja’? 2) ¿Kunatsa ‘Jachʼa Babiloniat’ jankʼak mistuñamajj wakisi?

¹⁷ ¿Kunjamas kʼari religionanakajja? Walja religionanakajja janiw Diosarojj Bibliarjam adorapkiti. Uka kʼari religionanakarojj “Jachʼa Babilonia” sasaw Biblian uñtʼasi (Apocalipsis 17:5). ¿Kunatsa Biblian ukham sispacha? Noé tiempon Uma Juiciojj paskäna uka qhepatjja, Babilonia markanwa kʼari yatichäwinakajj qalltäna. Qhepatsti uka kʼari yatichäwinakajj oraqpachanwa yatichasjjäna. Babiloniankir jaqenakajja, kimsa diosat mayar tukuyasaw diosanakaparojj adorapjjerïna. Jichhürunakanjja, ukhamarakiw walja religionanakajj kimsa diosas utjkaspa ukham yatichapjje. Ukampis Bibliajja, mä sapa cheqpach Diosakiw utji sasaw qhan yatichi. Jupajj Jehová satawa, Yoqapasti Jesús satarakiwa (Juan 17:3). Babilonia markankir jaqenakajja, maynejj jiwjje ukhajj jakaskaspasa, yaqha cheqansa tʼaqeskaspa ukhamwa amuyapjjarakïna. Ukampis ukajj kʼari yatichäwiwa (14, 17, 18 qhanañchäwinak uñjjattʼäta).

¹⁸ Jehová Diosajj niyaw taqe kʼari religionanakar tʼunjani (Apocalipsis 18:8). Ukatwa kʼari religionanakat mistuñamajj wakisi. Jehová Diosajj jankʼak uk lurasma ukwa muni (Apocalipsis 18:4).

19. ¿Kunsa Jehová Diosajj jupar serviñ amtatamat lurani?

 ¹⁹ Kʼari religionat mistusin Jehová Diosar serviñ amtatamatjja, inas yaqhep amigonakamasa familiaranakamas jan amuyapkchiniti, inas jan walinaksa lurapjjchïtam. Ukhamäni ukhajja Diosajj janiw jaytkätamti. Aka oraqpachanjja, walja jilat kullakanakaw utji, jupanakajj maynit maynikamaw munasipjje, jupanakaw familiamäpjjani. Jutïrïnsa wiñayatakiw jakasirakïta (Marcos 10:28-30). Qhepatjja Diosar serviñam jan munapki uka amigonakamasa, familiaranakamasa, inas Bibliat yatjjatañ munjjapjjarakchini.

20. ¿Kunatsa cheqa religionar mantañama?

²⁰ Niyaw Jehová Diosajj jan walinak chhaqtayjjani, Reinopaw aka oraqsa apnaqjjarakini (2 Pedro 3:9, 13). ¡Ukan jakasiñajj wali sumäniwa! Uka tiemponjja, taqeniw Jehová Diosarojj kunjamtï jupajj munki ukham adorapjjani. Ukhamasti jichhatpachaw cheqa religionar mantañatak chʼamachasiñama.