1, 2. ¿Kunatsa Bibliajj Diosan mä suma regalopawa sissna?

 AMIGOMAJJ mä regalo churiristam ukhajj wal kusisisma. Uka regalojj kunasa uksa jankʼakiw yatiñ munarakisma. Amigoman jumat amtasitapatjja wal yuspärasma.

² Bibliajj Diosan mä suma regaloparakiwa. Kunatï ukan yatichaski ukajj janiw kawkjansa utjkiti. Sañäni, Diosaw alajjpachsa, aka oraqsa, nayrïr chacha warmirus luri sasaw Bibliajj qhanañchi. Ukhamarusa Bibliajj jan walinakar saykatañatakejj suma ewjjanakaniwa. Diosajj kunjamsa amtanakap jutïrin phoqani uksa yaticharakistuwa. ¡Bibliajj Diosan mä suma regalopawa!

3. ¿Kunsa Bibliat yatjjatasajj yateqäta?

³ Bibliat yatjjatasajja, Diosajj amigomäñ munatapwa yateqäta. Jumatï Diosat jukʼamp yatjjatañatak chʼamachasïta ukhajja, jukʼampiw Jupar jakʼachasïta.

4. ¿Kunas Bibliat jumar wal musparaytamjja?

⁴ Bibliajj 2.800 arunakatsa jukʼamp jila arunakaruw jaqokipasi, walja millón millón Biblianakaw imprimisiraki. Ukhamasti pachpa arupat liyiñatakejj niya taqeninwa Bibliajj utji. Sapa semanaw niya mä millón Biblianakajj jaqenakar churasi. Bibliat sipansa yaqha librojj janipuniw utjkaspati.

5. ¿Kunatsa Bibliajj “Diosan amuytʼayatawa” sissna?

⁵ Bibliajj “Diosan amuytʼayatawa” (2 Timoteo 3:16 liytʼañataki). Ukampis inas yaqhepajj akham amuyapjjchi: “Bibliajj jaqenakan qellqatakiwa, ukhamajj ¿kunatsa Bibliajj Diosankiwa sissna?” sasa. Bibliajj akham siwa: “Espíritu santon yanaptʼapampiw jaqenakajj  Diosat parlapjjäna” sasa (2 Pedro 1:21). Mä jefes secretariopar carta qellqarapita sasin maykaspa ukham amuytʼañäni. Secretariojj jefepan arunakapwa cartan qellqe, ukhamajj uka cartajj ¿khitinkiw sasmasa? ¿Jefenkiti jan ukajj secretarionkicha? Uka cartajj jefenkiwa. Bibliampejj ukhamarakiwa, Diosajj espíritu santopampi yanaptʼasaw jaqenakar Biblia qellqayäna. Ukhamasti Bibliajj ‘Diosan arupawa’, janiw jaqen arupäkiti (1 Tesalonicenses 2:13; 2 qhanañchäwi uñjjattʼäta).

6, 7. ¿Kunatsa Bibliajj janiw may may parlkiti sissna?

⁶ Bibliajj 1.600 maranakanwa qellqasïna. Biblia qellqerinakajj janiw mä tiemponak jakapkänti. Jupanakat  yaqhepajj wali yatjjattʼatapjjänwa, yaqhepasti janiraki. Amuytʼañataki, jupanakat maynejj doctoränwa. Yaqhepajj yapuchirinaka, chawlla katurinaka, uywa awatirinaka, profetanaka, juezanaka, reyinaka ukhamapjjänwa. Bibliajj walja jaqenakan qellqatäkchisa, janiw may may parlkiti. *

⁷ Génesis libron nayrïr capitulonakapanjja kunjamsa jan walinakajj aka oraqen qalltäna uk qhanañchi. Apocalipsis libron qhepïr capitulonakapansti kunjamsa Diosajj jan walinak wiñayatak chhaqtayjjani, kunjamsa aka oraq paraisor tukuyjjani uka toqetwa parlaraki. Kunjamsa jaqenakajj waranq waranqa maranakan jakawayapjje, kunjamsa Diosan amtanakapajj phoqasiwayi uka toqetsa Bibliajj qhanañcharakiwa.

8. ¿Kunatsa Bibliajj ciencia toqet cheq parli sissna? Uk qhanañchtʼam.

⁸ Bibliajj janiw ciencia toqet yatichañatak qellqatäkiti, ukampis cienciat parlasajj cheq parli. Ukhamatwa Bibliajj Diosan arupätap yattanjja. Amuytʼañataki, Levítico libronjja, katuyir usunakat jarkʼaqasiñatakejj suma ewjjanakwa Diosajj israelitanakar churäna. Uka tiemponjja, kunjamatsa uka usunakajj yaqhanakar katkataspa ukajj janïraw yatiskänti, qhepatakwa virus, bacterias sat jan uñjkañ jiskʼa laqʼonakat sartatapajj yatisiskäna. Maysa toqetjja, aka oraqejj ‘jan kunjjaru’ warktʼatawa sasaw Bibliajj janïräkipan qhanañcharakïna (Job 26:7). Yaqhepajja, aka oraqejj janiw moroqʼökiti sasinwa amuyapjjäna, ukampis aka oraqejj moroqʼowa sasaw Bibliajj qhanañchjjäna (Isaías 40:22, NM).

9. Biblia qellqerinakan jan kun imtʼasa qellqapjjatapajja, ¿kuns amuytʼayistu?

 ⁹ Nayra tiemponakat qellqer jaqenakajja, janiw kunatï paskäna ukanak cheq qellqapkänti. Ukampis Bibliajj nayra tiemponakat cheq parli. Amuytʼañataki, yaqhep qellqerinakajja markapajj guerran atipayasipkäna ukanakjja janiw qellqapkänti. Ukampis Biblia qellqerinakajj janiw kunsa imtʼapkänti. Sañäni, Israel markajj uñisirinakapan atipjata uñjasipjjäna ukjja qellqapjjänwa, pantjasitanakapatsa qellqapjjarakïnwa. Ukanakat mayajj Números libron qellqatawa, ukanjja kunjamsa Moisesajj pantjasisajj Diosan cheqañchat uñjasïna uka toqetwa parli (Números 20:2-12). Biblia qellqerinakajj jan kun imtʼasaw qellqapjjäna, ukaw Bibliajj Diosan arupätap amuytʼayistu. Uk yatisajj kunatï ukan qellqatäki ukarojj jukʼampiw confiytanjja.

10. ¿Kunatsa Biblian ewjjanakapajj wal yanaptʼistaspa?

¹⁰ Bibliajj “Diosan amuytʼayatawa, sumarakiw yatichañataki, cheqañchañataki, kunatejj jan walïki ukanak askichañataki ukhamarak cheqapar sarnaqañ yatichañatakisa” (2 Timoteo 3:16). Biblian ewjjanakapajj jichhürunakan yanaptʼistaspawa. Diosajja kunjam luratätansa uk yatiwa, ukhamajj kunas amuyusansa chuymasansa utji uk sum yati. Jupajj sum uñtʼistu, kusisit jakasiñaswa munaraki. Kunanakas yanaptʼistaspa, kunanakas jan walir puriyistaspa uksa yatirakiwa.

11, 12. 1) Mateo libron 5, 6, 7 capitulonakapanjja, ¿kunanakatsa Jesusajj ewjjäna? 2) ¿Kunanakampsa Bibliajj yatichistu?

¹¹ Mateo libron 5, 6, 7 capitulonakanjja, Jesusan suma ewjjanakapaw utji. Jesusajja kunjamsa kusisit jakassna, kunjamsa jan waltʼayasiñanak askichsna, kunjamsa Diosar oración mayissna, kunjamsa qollqer  uñjañasa uka toqenakatwa ewjjäna. Jesusan uka ewjjanakapajj niya pä waranqa maranak nayras qellqaskchïnjja, jichhürunakan yanaptʼaskakistuwa.

¹² Jehová Diosajj suma yatichäwinakwa Biblian churistu. Ukanakaw familian sum jakasiñataki, sum trabajiñataki, mayninakamp sumankañataki yanaptʼistu. Biblian yatichäwinakapajj taqeniruw yanaptʼistaspa, khitïskañänisa, kawkinsa jakaskañäni, kuna jan walinsa uñjaskchiñänejja taqeniruw yanaptʼistaspa (Isaías 48:17 liytʼañataki; 3 qhanañchäwi uñjjattʼäta).

13. ¿Isaías profetajj Babilonia markat kamsänsa?

¹³ Biblian profecianakapajj waljaw phoqasjje. Amuytʼañataki, Isaías profetajja, Babilonia markajj tʼunjatäniwa sasaw qellqäna (Isaías 13:19). Babiloniajj kunjam tʼunjatänisa uk sum qhanañchäna. Uka markajja jachʼa punkunakampi mä jawirampi jarkʼaqatänwa. Isaías profetajja uka jawirajj wañtʼayatäniwa punkunakapas jistʼarataw jaytasini sasaw janïräkipan qellqäna. Uka markar katuntir soldadonakajj jan nuwasisakiw katuntapjjani, Ciro sat chachaw jupanakarojj pʼeqtʼani sasaw Isaiasajj qhanañcharakïna (Isaías 44:27-45:2 liytʼañataki; 4 qhanañchäwi uñjjattʼäta).

14, 15. ¿Kunjamsa Isaiasan profeciapajj phoqasïna?

¹⁴ Pä patak maranak qhepatjja, Babilonia markar katuntañatakejj mä ejercitow purïna. ¿Khitis uka ejército pʼeqtʼäna? Kunjamtï profeciajj siskänjja, Persia marka apnaqeri Ciro chachaw pʼeqtʼäna. Ukhamasti uka profeciajj niyaw phoqasiñampïskäna.

¹⁵ Babilonia markar katuntapkäna uka arumajja, babilonionakajj fiestankasipkänwa. Jawirampi jachʼa perqanakampi jarkʼaqatäsajj janiw kunas paskistaniti sasaw  amuyapjjäna. Ukäñkamajj Ciro chachampi soldadonakapampejj jawir umjja maysaruw irpanukupjjäna. Umajj jukʼakëjjänwa, ukhamatwa Persia markankir soldadonakajj jawir paskatapjjäna. ¿Kunjamsa jachʼa punkunakani Babiloniar mantapjjpachäna? Kunjamtï profeciajj siskänjja, uka markan punkunakapajj jistʼarataw jaytasïna, ukhamatwa soldadonakajj jan nuwasisaki mantapjjäna.

16. 1) Isaías profetan arunakaparjamajja, ¿kunas Babilonia markampejj pasañapäna? 2) ¿Kunjamatsa uka profecian phoqasitap yattanjja?

 ¹⁶ Isaías profetajja, kunas tiempompejj Babilonia markar pasani ukjja akham sasaw qellqäna: “Janipuniw jaqejj ukanjja jukʼampi utjkjjaniti” sasa (Isaías 13:20). ¿Uka profeciajj phoqasïnti? Jïsa, phoqasïnwa. Nayra Babilonia markajj qʼala tʼunjatawa. Ukasti Irak markankiwa, Bagdad capitalap jakʼana. Jichhürunakanjja janiw khitis ukan jakjjeti. Jehová Diosajja, Babilonia markarojj ‘pichañampjamaw tukjasin pichanuküna’ (Isaías 14:22, 23). *

17. ¿Kunatsa Diosan arunakapajj phoqasipuniniwa sasin confiytanjja?

¹⁷ Biblian walja profecianakapaw phoqasjje, ukatwa kuntï Diosajj jutïritak siski ukajj phoqasipuniniwa sasin confiytanjja. Jehová Diosajj paraisoruw aka oraq tukuyani, janipuniw ukat pächasiñasäkiti (Números 23:19 liytʼañataki). “Jan kʼarisir Diosaw uka wiñay jakañjja  churapjjämawa sasin nayratpach säna”, uka arunakan phoqasiñapwa suyasktanjja (Tito 1:2). *

18. ¿Apóstol Pablojj ‘Diosan arupat’ kamsänsa?

¹⁸ Bibliajj janiw yaqha libronakjamäkiti ukwa yateqtanjja. Bibliajj janiw may may parlkiti, ciencia toqetsa nayra tiemponakatsa cheqwa parli. Suma ewjjanakaniwa, kunjamsa walja profecianakajj phoqasïna uksa qhanañcharakiwa. Janiw ukakïkiti, apóstol Pablojj akham sasaw qellqäna: “Diosan arupajj jakkiriwa, wali chʼamanirakiwa” sasa. Uka arunakajj ¿kamsañsa munpacha? (Hebreos 4:12 liytʼañataki).

19, 20. 1) ¿Kunjamsa Bibliajj yanaptʼistu? 2) ¿Kunjamsa Diosarojj Bibliat yuspärsna?

¹⁹ Bibliajja jakäwisan yanaptʼistuwa. Kunjam jaqëtansa uk yatiñatakis yanaptʼarakistuwa, ukhamatwa kunas amuyusansa chuymasansa utji uk yattanjja. Amuytʼañataki, Diosarojj wal munasta sasajj inas sissna. Ukampis Diosar cheqpach munasitasajj janiw arukiñapäkiti, jan ukasti luratanakasampiw uñachtʼayañasa, ukwa Biblia liyisajj yateqtanjja. Ukhamasti Diosarutï cheqpachapun munasstanjja, Bibliarjamaw sarnaqañasa.

²⁰ Bibliajj Diosan arupäskapuniwa. Diosajja Biblia liysna, yatjjatsna, arupar munasiraksna ukwa muni. Ukhamasti Bibliat yateqaskakiñasawa, ukhamatwa Diosajj churkistu uka suma regalot yuspärañäni. Ukhamatarakwa Diosajj kunjam jakasiñassa muni uksa yateqañäni. Jutïr yatichäwinwa uka toqet yatjjatañäni.