Jesusajj 30 maran niya abril phajjsinwa Jerusalenar saräna. Walja jaqenakaw uka markar Pascua amtañatakejj sarapjjarakïna. Templonjja uywanakwa sacrificiot loqtapjjerïna. Yaqhepajj utapatwa uka uywanak apasipjjerïna, yaqhepasti Jerusalenanwa alasipjjerïna.

Jesusajj templor saräna ukhajja, templon uywanak aljirwa uñjäna. ¡Jehová Diosar adorañ utanwa negocionak lurasipkäna! ¿Jesusajj kamachänsa? Mä chicote lurtʼasïna, ukampiw ovejanaksa vacanaksa templot alisnuküna. Ukhamarakiw qollqe cambiapkäna ukanakan mesanakapsa jaqorpayäna, qollqenakapsa oraqeruw willtäna. Palomanak  aljirinakarojj akham sänwa: ‘¡Akanak jayar apasipjjam! ¡Jan Awkijan utap qhatur tukuyapjjamti!’ sasa.

Templonkasipkäna uka jaqenakajja, Jesusan ukham luratap uñjasajj wal musparapjjäna. Discipulonakapajj kuntï profeciajj Mesías toqet siskäna ukwa amtapjjäna, ukan akham sänwa: ‘Jehová Diosan utapar walpun munasëjja’ sasa.

Jesusajj ukhamarakiw 33 maranjja aljirinakar templot alisnuküna. Awkipan utaparojj janiw khitimpis respet faltayañ munkänti.