Filipos markanjja, yatir mä tawaqow utjäna, jupajj demonion mantatäsaw kunas jutïrin pasani uk yatïna. Uywirinakapatakejj walja qollqe ganäna. Pablompi Silasampejj uka markar puripjjäna ukhajja, uka tawaqojj walja urunakaw jupanakar arknaqäna. Demoniow akham arnaqayäna: “Aka jaqenakajj Jachʼa Diosan esclavonakapawa” sasa. Ukatwa Pablojj uka demonior akham säna: ‘Jesusan sutipjjaruw sissma, uka tawaqot mistum’ sasa. Ukatwa demoniojj mistjjäna.

Uka tawaqon uywirinakapajj khitis qollqe ganani sasaw wal colerapjjäna. Ukatwa Pablompir Silasampirojj marka apnaqerinakan ukaru qatatipjjäna, akham sasa: ‘¡Aka jaqenakajj janiw ley phoqapkiti, markankirinakarus chʼajjwayapjjewa!’ sasa. Marka apnaqerinakajj Pablompir Silasampir jawqʼjayasaw carcelar llawintayapjjäna. Cárcel uñjirejj wali chʼamakäki uka manqharuw llawintäna, kayunakapsa pʼiyanakani tablanakaruw achuntayäna, ukajj cepo satänwa.

Carcelanjja Pablompi Silasampejj Jehová Diosar jachʼañchañatakiw arumajj cantapjjäna, mayni presonakas istʼapjjarakïnwa. Ukhamaruw mä jachʼa terremotojj cárcel khatatiyäna. Ukatwa punkunakajj jistʼartäna, cadenanakas jarartäna, cepos janiw presonakar katjjasjjänti. Cárcel uñjirejj tʼijukamaw manqhakam saräna, punkunak jistʼarat uñjasajja, presonakajj sarjjapjjpachawa sasin amuyasaw espadampi jupa pachpa jiwayasiñ munäna.

Ukaratuw Pablojj akham sasin artʼäna: ‘¡Jan jiwayasimti! ¡Taqeniw akankasipkta!’ sasa. Ukatwa cárcel uñjirejj Pablompin Silasampin ukar tʼijusajj nayraqatapan qonqortʼasïna. “¿Salvasiñatakejj kun lurañajas wakisi?” sasaw jisktʼarakïna. Jupanakajja ‘jumasa utamankirinakasa Jesusar creyipjjañamawa’ sasaw sapjjäna. Ukatsti Pablompi Silasampejj Jehová Diosan arunakapwa yatichapjjäna, ukhamatwa cárcel uñjiris utapankirinakas taqeni bautisasipjjäna.