Israelanjja machʼaw utjäna, ukatwa Noemí sat mä israelit warmejj esposopampi pä yoqapampi Moab oraqer sarjjapjjäna. Esposopajj ukan jiwjjäna. Yoqanakapajj Rut, Orpá sat moabita warminakampiw casarasipjjäna. Tiempompejja yoqanakapajj jiwjjapjjarakïnwa.

Israelan machʼajj tukusjjänwa, ukatwa Noemiajj markapar kuttʼañ amtäna. Rut warmisa Orpá warmisa jupamp chikaw sarapjjäna, thakinjja Noemiajj akham sänwa: ‘Jumanakajj suma esposa, suma yojjchʼa ukhamäpjjtawa. Wasitat casarasipjjañam munta. Moab markankir utanakamar kuttʼjjapjjam’ sasa. Jupanakasti sapjjarakïnwa: ‘Wal munasipjjsma, janiw sapak jaytañ munapksmati’ sasa. Noemiajj walja kutiw ‘kuttʼjjapjjam’ sasin säna. Ukatwa Orpajj sarjjäna, ukampis Rut warmejj janiw sarkänti. Noemiajj jupar akham sänwa: ‘Orpá yojjchʼa masimajj markaparu diosanakaparuw kuttʼjje. Jumajj jupamp kuttʼjjarakim’ sasa. Ukampis Rut warmejj sänwa: ‘Janiw jaytjkämati. Markamajj markajäniwa, Diosamasti Diosajarakïniwa’ sasa. Ukham satajj ¿janit Noemí warmejj kusiskpachäna?

Cebada cosechajj qalltkäna ukhaw uka pä warmejj Israelar puripjjäna. Mä urojj Boaz sat jaqen yapuparuw Rut warmejj cebada pallasir saräna. Boazajj Rahab warmin yoqapänwa. Boazarojj akham sasaw yatiyapjjäna: ‘Rut warmejj moabitawa. Suegrapar jan jaytjiri suma warmiwa’ sasa. Ukatwa trabajirinakaparojj granonak jukʼamp jiltʼayapjjañapatak mayïna, ukhamat Rut warmin pallasiñapataki.

 Uka arumajja Noemiajj akham sasaw Rut warmir jisktʼäna: ‘¿Khitin yapupansa jichhürojj trabajta?’ sasa. Jupasti sarakïnwa: ‘Boaz chachan yapupanwa’ sasa. Noemí warmejj saskakïnwa: ‘Boazajj esposojan familiarapawa. Mayni tawaqonakampi ukan trabajiskakim. Ukanjja walikïskätawa’ sasa.

Rut warmejj cosecha tukusiñapkamaw Boazan yapupan trabajïna. Boazajj jupar wali trabajtʼiri suma warmit uñjäna. Uka tiemponjja, mä jaqetï jan wawani jiwäna ukhajja, warmipajj jupan mä familiarapampiw casarasispäna. Ukhamajj Boazajj Rut warmimpiw casarasjjäna. Mä wawanïpjjarakïnwa, Obed sasaw sutiyapjjäna. Tiempompejja Obedajj David reyin abuelopäjjänwa. Noemian amiganakapajj wal kusisipjjäna. Sapjjarakïnwa: ‘Nayraqatjja, Diosajj munasir suma yojjchʼa churtamjja. Jichhasti mä allchhinëjjaraktawa. Jehová Diosajj jachʼañchatäpan’ sasa.